အာဆင်နယ်နည်းပြ မီကယ် အာတီတာက မန်ချက်စတာယူနိုက်တက်ကို အနိုင်ယူပြီး တော့တင်ဟမ်အသင်းက ယူရိုပါလိဂ်ဖလားရရှိသွားခဲ့ရင်တောင် စိတ်ပူမှာမဟုတ်ဘူးလို့ ပြောကြားလိုက်ပါတယ်။ အာဆင်နယ်အသင်းဟာ ချန်ပီယံလိဂ် ဆီမီးဖိုင်နယ်မှာ ပီအက်စ်ဂျီကို ရှုံးနိမ့်ခဲ့တာကြောင့် ဒီရာသီမှာ ဖလားလက်မဲ့ဖြစ်ခဲ့ရပါတယ်။ 

ဒါပေမဲ့ အန်ဂီပိုစတီကိုဂလူရဲ့ တော့တင်ဟမ်အသင်းကတော့ ယူရိုပါလိဂ်ဖိုင်နယ်အထိ တက်ရောက်လာနိုင်ခဲ့တာကြောင့် ၂၀၀၈ ခုနှစ် လိဂ်ဖလားရရှိခဲ့ပြီးနောက် ပထမဆုံးဖလားကို ရယူဖို့ အခွင့်အရေးရရှိလာခဲ့ပါတယ်။  တော့တင်ဟမ်အသင်းဟာ ၁၉၈၄ ခုနှစ်က ယူအီးအက်ဖ်အေဖလားကို နောက်ဆုံးရရှိခဲ့တာဖြစ်ပါတယ်။

မြောက်လန်ဒန်ပြိုင်ဘက်တွေ ယူရိုပါလိဂ်ဖလားကို ကိုင်မြှောက်သွားနိုင်ခြေရှိတာနဲ့ပတ်သက်ပြီး မေးမြန်းခဲ့တဲ့အခါ အာတီတာက "ကျွန်တော့်အတွက်တော့ ကိုယ့်အသင်းအကြောင်းပဲ ကြည့်နေပါတယ်" လို့ တိုတိုတုတ်တုတ်ပဲ ဖြေကြားခဲ့ပါတယ်။ အာတီတာကတော့ ဂျာဂင်ကလော့ပ်ရဲ့နေရာမှာဝင်ရောက်လာတဲ့ လီဗာပူးနည်းပြ အန်းစလော့ကိုလည်း ချီးကျူးခဲ့ပါတယ်။ အာဆင်နယ်နည်းပြက စလော့ဟာ အန်ဖီးလ်မှာ အခြေခံကောင်းတွေရရှိခဲ့တယ်ဆိုတာကို ဝန်ခံပြောကြားခဲ့ပါတယ်။

"စလော့ဘာလုပ်ခဲ့တယ်ဆိုတာက အရမ်းကို ဉာဏ်ကောင်းပါတယ်။ သူက အရာအားလုံးရရှိထားပြီးသားပါ - ပြီးခဲ့တဲ့ ၁၀ နှစ်အတွင်း ဖလားတွေရယူပြီး ယှဉ်ပြိုင်ခဲ့တဲ့အသင်းတစ်သင်းပါပဲ။ ဒါက ဘာမှအသစ်အဆန်းတော့ မဟုတ်ပါဘူး။ သူက သူ့ရဲ့တန်ဖိုးတွေကိုထည့်သွင်းခဲ့ပြီး အရာတော်တော်များများကို ထိန်းသိမ်းခဲ့ပါတယ်။ သူ့ရဲ့လက်ရာတွေကလည်း အရမ်းကိုကောင်းမွန်ပါတယ်။

အရေးကြီးဆုံးအချက်ကတော့ ကစားသမားတွေရဲ့ အကောင်းဆုံးစွမ်းဆောင်ရည်တွေကို ရယူနိုင်ခဲ့တာပါပဲ။ ကွာခြားမှုတွေဖန်တီးပေးနိုင်တဲ့ ကစားသမားတွေကလည်း အမြဲရှိနေပြီး သူတို့အတွက် ကွာခြားမှုတွေကို ဖန်တီးပေးခဲ့ပါတယ်။ ဒါက ဘယ်ဖလားကိုမဆိုရယူနိုင်ဖို့အတွက် အဓိကကျပါတယ်" လို့ အာတီတာက ပြောကြားခဲ့ပါတယ်။