ဒီလထဲမှာ ကစားမယ့် ချန်ပီယံလိဂ်ဗိုလ်လုပွဲ မတိုင်ခင် ပီအက်စ်ဂျီနည်းပြ လူးဝစ်အင်းနရစ်က အာဆင်နယ်အသင်းကို အမွှမ်းတင် ချီးကျူးလိုက်ပြီး သူတို့ကို ဘောလုံးမရှိတဲ့အချိန် (ခံစစ်ကစားပုံ) မှာ ကမ္ဘာ့အကောင်းဆုံးအသင်းလို့ တင်စားလိုက်ပါတယ်။

အာဆင်နယ်အသင်းဟာ ၂၂ နှစ်ကြာ စောင့်ဆိုင်းခဲ့ရတဲ့ ပရီးမီးယားလိဂ်ဖလားကို ပြီးခဲ့တဲ့ အင်္ဂါနေ့ကမှ ဆွတ်ခူးနိုင်ခဲ့တာဖြစ်ပြီး သူတို့အနေနဲ့ အခုလို ဥရောပရဲ့ အဆင့်မြင့်ဆုံး ကလပ်ပြိုင်ပွဲ ဗိုလ်လုပွဲကို တက်လှမ်းနိုင်ခဲ့တာဟာ အံ့ဩစရာမဟုတ်ဘူးလို့ လူးဝစ်အင်းနရစ်က သတင်းထောက်တွေကို ပြောကြားခဲ့ပါတယ်။

"ကျွန်တော်တို့မှာ မီကယ်အာတီတာရဲ့ အာဆင်နယ်အသင်းနဲ့ ရင်ဆိုင်ခဲ့ဖူးတဲ့ အတွေ့အကြုံတွေရှိပါတယ်၊ သူတို့ ဘောလုံးရထားတဲ့အချိန်မှာ ဘယ်လောက်တောင် ကောင်းသလဲဆိုတာကိုလည်း ကောင်းကောင်းကြီး သိထားပါတယ်" လို့ ဗုဒ္ဓဟူးနေ့က သူက ပြောခဲ့ပါတယ်။

"ဘောလုံးမရှိတဲ့အချိန်မှာတော့ သူတို့က ကမ္ဘာ့အကောင်းဆုံးအသင်းဆိုတာ သံသယဖြစ်စရာ မလိုပါဘူး။ ဘောလုံးရထားတဲ့အချိန်မှာလည်း သူတို့က ဂိုးတွေအများကြီး သွင်းနိုင်စွမ်း ရှိကြပါတယ်။ ဒါကြောင့် သူတို့ကို ဗိုလ်လုပွဲမှာ မြင်တွေ့ရတာဟာ သဘာဝကျပါတယ်။ ကစားဟန်ချင်း မတူညီတဲ့ အသင်းနှစ်သင်း ရင်ဆိုင်ရမှာဖြစ်လို့ တကယ့်ကို ခက်ခဲတဲ့ ဗိုလ်လုပွဲ ဖြစ်လာမှာပါ။ ဒါပေမဲ့ တကယ့်ကို ကြည့်ကောင်းမယ့် ဗိုလ်လုပွဲကြီး ဖြစ်လာမယ်လို့ ကျွန်တော် ထင်ပါတယ်" လို့လည်း ဆိုပါတယ်။

မေလ ၃၀ ရက်နေ့မှာ ဘူဒါပတ်စ်မြို့၌ ကျင်းပမယ့် ချန်ပီယံလိဂ် ဗိုလ်လုပွဲမတိုင်ခင် ပီအက်စ်ဂျီနည်းပြက ပရက်ဆင်း (Pressing) လုပ်တာနဲ့ ခံစစ်ဆင်တာရဲ့ အရေးပါမှုကို အလေးပေးပြောကြားခဲ့ပြီး ကြယ်ပွင့်တိုက်စစ်မှူး အူစမန်ဒမ်ဘီလီရဲ့ အလုပ်ကြိုးစားမှုကိုလည်း ထုတ်ဖော်ချီးကျူးခဲ့ပါတယ်။

"ဘယ်လိုပွဲမျိုးပဲဖြစ်ဖြစ်၊ ဘယ်အချိန်မှာပဲဖြစ်ဖြစ် သူက အမြဲတမ်း ခံစစ်ကူပေးနေတာပါ" လို့ စပိန်လူမျိုးနည်းပြက ပြောပါတယ်။ "သူ့လိုကစားသမားမျိုး ရှိနေဖို့က အရေးကြီးပါတယ်။ ဘာလို့လဲဆိုတော့ ကျွန်တော်တို့က တိုက်စစ်မှူးတွေ ဂိုးသွင်းတာ ဒါမှမဟုတ် ဂိုးဖန်တီးတာတွေကိုပဲ အမြဲတမ်း အသားပေးပြောလေ့ရှိကြပြီး သူတို့ ခံစစ်မှာ ဘယ်လောက်အလုပ်အကျွေးပြုသလဲ ဆိုတာကိုတော့ အလေးထားပြောလေ့မရှိကြလို့ပါ။ အသင်းတစ်သင်းမှာ ဘောလုံးမရှိတော့ဘူးဆိုရင် ခံစစ်ကို မဖြစ်မနေ ကစားရမှာပါ" လို့ ၎င်းက ဆက်လက်ပြောကြားခဲ့ပါတယ်။