အာမိုရင်က ယူနိုက်တက်အသင်း ကစားသမားတစ်ဦးနဲ့ပတ်သက်ပြီး အပြည့်အဝ စိတ်ကျေနပ်မှုမရှိဘူးလို့ ပြောကြားလိုက်တဲ့ ဂယ်ရီ နဗီးလ်
ကိုဘီ မိုင်နူးက ၂၀၂၃-၂၀၂၄ ဘောလုံးရာသီမှာ အိုးလ်ထရက်ဖို့ဒ်မှာ ပုံစံကောင်းတွေ ပြသခဲ့ပြီးနောက် ယူရို ၂၀၂၄ အတွက် အင်္ဂလန်လက်ရွေးစင်အသင်းမှာ ပါဝင်ခွင့်ရရှိခဲ့ကာ နောက်ဆုံးမှာတော့ စပိန်နဲ့ ဗိုလ်လုပွဲမှာလည်း ပါဝင်ကစားခဲ့ပါတယ်။ဒါပေမဲ့ ဒုတိယ ဘောလုံးရာသီမှာတော့ ဒဏ်ရာပြဿနာတွေနဲ့ ခြေစွမ်းမတည်ငြိမ်မှုတွေကြောင့် ပုံစံကောင်းတွေ ရရှိဖို့ မိုင်နူး ရုန်းကန်ခဲ့ရပါတယ်။အသက် ၂၀ အရွယ်ရှိ မိုင်နူးက အဲရစ် တန်ဟက်နဲ့ ရူဘင် အမ်မိုရင်တို့ လက်အောက်မှာ ၁၉ ပွဲသာ ပွဲထွက်ခွင့် ရခဲ့ပါတယ်။
ဒီရာသီမှာတော့ မိုင်နူးက ပုံစံကောင်းတွေ ပြန်ရဖို့ မျှော်လင့်နေပေမဲ့ အမ်မိုရင်ရဲ့ ကွင်းလယ်လူ ၂ ဦးထဲမှာ ပါဝင်ဖို့ဆိုတာတော့ တော်တော်လေးကို ခက်ခဲနိုင်ပါတယ်။ မက်သီးယက်စ် ကွန်ညာနဲ့ ဘရိုင်ယန် အမ်ဘိုမိုတို့ ရောက်ရှိလာတာကြောင့် ဘရူနို ဖာနန်ဒက်စ်က ပိုနိမ့်တဲ့ ကွင်းလယ်နေရာမှာ ကစားရနိုင်ပါတယ်။ ရာသီအကြိုပွဲတွေမှာလည်း ကက်စ်မဲရိုးနဲ့ အူဂါတေးတို့ကို မိုင်နူးထက် ပိုဦးစားပေး ကစားခဲ့တာလည်း ရှိခဲ့ပါတယ်။
စာချုပ်သစ် ဆွေးနွေးမှုတွေလည်း ရပ်တန့်နေပြီး ချဲလ်ဆီးနဲ့ သတင်းတွေလည်း ထွက်ပေါ်နေတဲ့အတွက် ဒီရာသီမှာ မိုင်နူးဟာ အမ်မိုရင်လက်အောက်မှာ မရေရာတဲ့ အခြေအနေနဲ့ ရင်ဆိုင်ရနိုင်တယ်လို့ နဗီးလ်က ယုံကြည်နေပါတယ်။ “အူဂါတေး၊ ကက်စ်မဲရိုးနဲ့ မိုင်နူးတို့ ပါဝင်တဲ့ ကွင်းလယ်ကတော့ စိုးရိမ်စရာ ဖြစ်နေပါတယ်” လို့ နဗီးလ်က The Overlap’s Stick to Football အစီအစဉ်မှာ ပြောပါတယ်။
“ပြီးခဲ့တဲ့ ရက်သတ္တပတ်က ကိုဘီ မိုင်နူးကို ကြည့်လိုက်တဲ့အခါမှာတော့ သူက ရုပ်ပိုင်းဆိုင်ရာ ပြောင်းလဲသွားခဲ့တယ်လို့ ထင်ရပါတယ်” “သူက ပိုသန်မာပြီး ပိုခိုင်မာလာတယ်လို့ ထင်ရပါတယ်။ အခုကတော့ စောပါသေးတယ်။ ဒါပေမဲ့ ကိုဘီ မိုင်နူးဟာ နောက်ထပ် ၅ နှစ်၊ ၁၀ နှစ်လောက်အထိ ယူနိုက်တက်ရဲ့ ကွင်းလယ်လူ ၂ ဦးထဲမှာ သေချာပေါက် ပါဝင်လာလိမ့်မယ်လို့ ကျွန်တော် တွေးထားခဲ့ပါတယ်”
“ဒါပေမဲ့ နည်းပြကတော့ ဒီကိစ္စနဲ့ပတ်သက်ပြီး အပြည့်အဝ စိတ်ကျေနပ်မှုမရှိဘူးလို့ ခံစားမိပါတယ်” လို့ ပြောခဲ့ပါတယ်။ ယူနိုက်တက်အသင်းက ဘရိုက်တန် ကွင်းလယ်လူ ကားလို့စ် ဘာလေဘာကို ခေါ်ယူဖို့ ကြိုးစားနေတယ်လို့ သတင်းတွေ ထွက်ပေါ်နေတာကြောင့် မိုင်နူး ပထမအသင်းမှာ ပါဝင်ဖို့ လမ်းက ပိုပြီးတော့ ခက်ခဲလာနိုင်ပါတယ်။
ယူနိုက်တက်အသင်းခေါင်းဆောင်ဟောင်း ရွန်နီကလည်း ယူနိုက်တက်အသင်းအနေနဲ့ ကွင်းလယ်မှာ တောင့်တင်းတဲ့ လူစာရင်း ပိုဖြည့်ဆည်းဖို့ လိုအပ်တယ်လို့ ယုံကြည်နေပါတယ်။ “အသင်းအတွက် ပွဲတွေကို ထိန်းချုပ်ပေးနိုင်ပြီး ဘောလုံးပေးပို့မှုတွေကို တည်ဆောက်နိုင်မယ့် ကွင်းလယ်လူတစ်ဦးကို ခေါ်ယူစေချင်ပါတယ်”
“ကျွန်တော် နောက်ထပ်တစ်ယောက်ကို လိုချင်ပါသေးတယ်။ ဘရူနိုကိုတော့ ရှေ့တန်းကို တက်ပြီး ကစားစေချင်ပါတယ်” “ဒါကြောင့် သူတို့ဟာ ကောင်းမွန်တဲ့ ကစားသမားတွေ ခေါ်ယူထားတယ်လို့ ကျွန်တော်ထင်ပါတယ်။ ဒါပေမဲ့ နောက်ထပ် တစ်ယောက်၊ နှစ်ယောက်လောက် ထပ်ခေါ်စေချင်ပါတယ်” လို့ ရွန်နီက ပြောပါတယ်။
