မန်ချက်စတာယူနိုက်တက်နည်းပြ ရူဘင်အာမိုရင်က မန်ချက်စတာစီးတီးကနေ ရာသီကုန်မှာ ထွက်ခွာတော့မယ့် ကွင်းလယ်လူ ကယ်ဗင်ဒီဘရိုင်းကို ချီးကျူးပြောဆိုမှုတွေပြုလုပ်ခဲ့ပြီး ဘယ်လ်ဂျီယံသားဟာ ယူနိုက်တက်ကစားသမားဖြစ်ခဲ့သင့်တယ်လို့ ပြက်လုံးထုတ်ပြောကြားလာခဲ့ပါတယ်။ 

သောကြောနေ့နံနက်က ဒီဘရိုင်းဟာ သူ့အနေနဲ့ ရာသီကုန်မှာ မန်စီးတီးမှ ထွက်ခွာတော့မှာဖြစ်ကြောင်း တရားဝင်ကြေညာခဲ့ပြီး ၁၀ နှစ်ကြာနေထိုင်ခဲ့တဲ့ အီတီဟတ်ကို ခွဲခွာသွားတော့မှာဖြစ်ပါတယ်။ ဘယ်လ်ဂျီယံလက်ရွေးစင်ဟာ အင်္ဂလိပ်ပရီးမီးယားလိဂ်သမိုင်းတစ်လျှောက် အထူးချွန်ဆုံးသော ကွင်းလယ်လူစာရင်းမှာ ပါဝင်နိုင်ခဲ့ပြီး ပရီးမီးယားလိဂ်ဖလား ၆ ကြိမ်နဲ့ ချန်ပီယံလိဂ်ဖလား ၁ ကြိမ်အပါအဝင် စုစုပေါင်း ဆုဖလား ၁၆ လုံးအထိ အောင်မြင်မှုရရှိခဲ့ပါတယ်။ 

ယူနိုက်တက်အနေနဲ့လည်း မန်စီးတီးသို့ ဒီဘရိုင်းရောက်ရှိလာပြီးနောက်ပိုင်းမှာ မြို့ခံပြိုင်ဘက်ကို အနိုင်ရဖို့ အတော်လေးရုန်းကန်ခဲ့ရလည်းဖြစ်ပါတယ်။ ယခုအခါမှာတော့ အာမိုရင်က ဒီဘရိုင်းဟာ မှားယွင်းတဲ့ မန်ချက်စတာမြို့ခံအသင်းအတွက် ကစားပေးခဲ့ကြောင်းနဲ့ ယူနိုက်တက်ကစားသမားဖြစ်ခဲ့သင့်ကြောင်း ပြောကြားခဲ့ပါတယ်။ 

ပေါ်တူဂီသားနည်းပြက “သူက ပရီးမီးယားလိဂ်ရဲ့ အကောင်းဆုံးကွင်းလယ်လူတွေထဲက တစ်ယောက်ပါ။ အချိန်နဲ့အမျှ ဘယ်အရာမှ မတည်မြဲပါဘူး။ အခုလို ခွဲခွာရတာက သဘာဝပါပဲ။ သူက မှားယွင်းတဲ့ မန်ချက်စတာမြို့ဘက်ခြမ်းမှာ ကစားခဲ့ပါတယ်။ ကံကောင်းပါစေလို့ ဆုတောင်းပေးပါတယ်။ ကျွန်တော်‌ ပေါ်တူဂီမှာကတည်းက သူ့ကို စောင့်ကြည့်နေခဲ့တာပါ။ အသက်ထက်ဆုံး ပျော်ရွှင်စေဖို့ မျှော်လင့်ပါတယ်” လို့ပြောကြားခဲ့ပါတယ်။ 

ဒီဘရိုင်းအနေနဲ့ မန်စီးတီးကစားသမားဘဝ နောက်ဆုံးရာသီမှာ ဆုဖလားလက်မဲ့နဲ့ မကုန်ဆုံးစေဖို့ ပက်ဂွါဒီယိုလာရဲ့အသင်းအနေနဲ့ အက်ဖ်အေဖလားကို ဆွတ်ခူးနိုင်ဖို့ ကြိုးစားသွားရပါမယ်။ လာမယ့်တနင်္ဂနွေနေ့မှာတော့ ယူနိုက်တက်နဲ့ မန်စီးတီးတို့ဟာ ပရီးမီးယားလိဂ်ပွဲစဉ်အဖြစ် အိုးလ်ထရက်ဖို့ဒ်မှာ ယှဉ်ပြိုင်သွားရပါမယ်။