လက်စတာကို ၂-၀ နဲ့အနိုင်ရခဲ့တဲ့ပွဲမှာ ဂိုးသွင်းနိုင်ခဲ့ပြီးနောက် မန်စီးတီးစတား ဂရီးလစ်ချ်တစ်ယောက် ရုတ်တရက်ကွယ်လွန်ခဲ့တဲ့ ညီဖြစ်သသူ ကီလန်ကို ရည်ရွယ်ပြီး အောင်ပွဲခံခဲ့တယ်လို့ သိရပါတယ်။ အင်္ဂလန်သားဟာ ၁၆ လအတွင်း ပထမဆုံးအကြိမ် ပရီးမီးယားလိဂ်သွင်းဂိုးပြန်ရခဲ့တာဖြစ်ပါတယ်။ အဆိုပါသွင်းဂိုးပြန်ရချိန်မှာလည်း လွန်ခဲ့တဲ့ ၉ လတုန်းက ရုတ်တရက်ကွယ်လွန်ခဲ့တဲ့ညီဖြစ်သူ ကီလန်ရဲ့အထိမ်းအမှတ်နေ့နဲ့ တိုက်ဆိုင်နေတာဖြစ်ပါတယ်။

“ဒီနေ့က ကျွန်တော့်မိသားစုအတွက် အမြဲတမ်းခက်ခဲပါတယ်။ ဒါပေမယ့် ကျွန်တော် ဂိုးသွင်းနိုင်လို့ ပျော်ပါတယ်။ ကျွန်တော့်အမေ နဲ့ အဖေက ဒီမှာရှိနေပါတယ်။ ဒါကြောင့်ဂိုးသွင်းနိုင်ခဲ့တဲ့အပြင် နိုင်ပွဲရလို့ ပျော်ပါတယ်”လို့ ဂရီးလစ်ချ်က ပြောကြားခဲ့ပါတယ်။ ဒိုဂူ နဲ့ ဆာဗင်ဟိုတို့ စွမ်းဆောင်ရည်ကောင်းတွေပြသနေတာကြောင့် ဂရီးလစ်ချ်တစ်ယောက် ပုံမှန်ကစားခွင့်ရဖို့ ရုန်းကန်နေရပါတယ်။

အဆိုပါကစားသမား ၃ ဦးစလုံးဟာ လက်စတာနဲ့ပွဲမှာ ပွဲဦးထွက်ပါဝင်လာခဲ့ပြီး ၂ မိနစ်အကြာမှာ ဂရီးလစ်ချ်ဂိုးကို အတူတူဖန်တီးနိုင်ခဲ့ပါတယ်။ စီးတီးနည်းပြ ဂွါဒီယိုလာက “ဂျက်က လူသားတစ်ဦးအနေနဲ့ သူ့အပြုအမူတွေက တကယ့်ကိုလေးစားစရာပါ။ ကျွန်တော် အဲ့တာကို မသိပါဘူး။ ဘယ်လောက်ခက်ခဲလဲဆိုတာ ကျွန်တော်စိတ်ကူးယဉ်လို့တောင်မရပါဘူး။

အခုတော့ သူဂိုးသွင်းနိုင်ခဲ့သလို ပွဲကောင်းတစ်ပွဲကိုလည်း ကစားနိုင်ခဲ့ပါတယ်။ သူ့အတွက် ကျွန်တော်ပျော်ပါတယ်။ ပုံမှန်ကစားခွင့်မရချိန်မှာ ဘယ်လောက်ခက်ခဲလဲဆိုတာ ကျွန်တော်သိပါတယ်။ နောက်တန်းမှာ ၁၀ ယောက် ပိတ်ကစားတာကို ကန်ရတာက မလွယ်ပါဘူး။ ကျွန်တော်တို့ တတိယဂိုးလွဲချော်ခဲ့ပေမယ့် အဆင်ပြေပါတယ်။ ချေပဂိုးမပေးရတဲ့အပြင် စွမ်းဆောင်ရည်ကောင်းအတွက် ကျွန်တော် ကျေနပ်ပါတယ်”လို့ ဂွါဒီယိုလာက ပြောကြားခဲ့ပါတယ်။ ဟာလန်းကတော့ ခြေကျင်းဝတ်ဒဏ်ရာကြောင့် လက်ကျန်ရာသီကို လွဲချော်တော့မှာဖြစ်ပြီး ၆ ပတ်လောက်အနည်းဆုံးနားရဖွယ်ရှိနေပါတယ်။