ရီးရဲလ်မက်ဒရစ်နဲ့ ပွဲစဉ်မှာ ရှုံးနိမ့်ခဲ့ပေမဲ့လည်း ချန်ပီယံလိဂ်ခရီးစဉ်မှာ ဘယ်သူမှ လက်လျှော့မှာ မဟုတ်ဘူးလို့ မန်စီးတီးနည်းပြ ပက်ဂွာဒီယိုလာက အခိုင်အမာ ပြောကြားလိုက်ပါတယ်။

ဗုဒ္ဓဟူးနေ့ညက ကစားခဲ့တဲ့ ၁၆ သင်းအဆင့် ပထမအကျော့ပွဲစဉ်မှာ ဖယ်ဒီ ဗယ်ဗာဒီက ဟက်ထရစ် သွင်းယူခဲ့တာကြောင့် ရီးရဲလ်မက်ဒရစ်က ၃-၀ နဲ့ အနိုင်ရရှိခဲ့တာပါ။

"အခုလောလောဆယ်တော့ အခွင့်အရေး အများကြီးမရှိသေးဘူး" လို့ ပွဲအပြီး အခြေအနေကို ပြန်လည်အလှည့်အပြောင်း လုပ်နိုင်မလားဆိုတဲ့ မေးခွန်းအပေါ် ဂွာဒီယိုလာက ဖြေကြားခဲ့ပါတယ်။ "ဒါပေမဲ့ ကျွန်တော်တို့ ကြိုးစားသွားမှာပါ။ အခုချိန်မှာ ခက်ခဲနေတာတော့ အမှန်ပါပဲ။ ဒါပေမဲ့ ကျွန်တော်တို့ ပရိသတ်တွေနဲ့အတူ အကောင်းဆုံး ပြန်လာခဲ့မှာပါ။ ပြိုင်ဘက်ရဲ့ ဂိုးဧရိယာအနီးမှာ ပိုပြီး ထိထိရောက်ရောက် ကစားနိုင်အောင် ကြိုးစားသွားမှာပါ" လို့ သူက ဆိုပါတယ်။

မန်စီးတီးဂိုးသမား ဒွန်နာရမ်မာက ဗီနီစီးယပ်စ်ရဲ့ ပင်နယ်တီကို ကာကွယ်နိုင်ခဲ့တာနဲ့ ပတ်သက်ပြီး ဂွာဒီယိုလာက "၄-၀ ထက်စာရင် ၃-၀ က ပိုကောင်းတယ်ဆိုတာ ငြင်းလို့မရပါဘူး" လို့ ဆက်ပြောပါတယ်။

"ဘောလုံးအဆုံးရှုံးခံရပြီး သူတို့ဆီက ကောင်တာဝင်လာတဲ့အခါ ထိန်းချုပ်ဖို့ တစ်ခါတလေ ခက်ခဲတတ်ပါတယ်။ သူတို့က ဘောလုံးကို အလဟဿ အဆုံးရှုံးမခံသလို ဗီနီစီးယပ်စ်လို ကစားသမားမျိုးတွေကလည်း အလွန်မြန်တာလေ။ ကျွန်တော့်အမြင်အရတော့ ကစားတာ တော်တော်လေး အဆင်ပြေခဲ့သလို ကောင်းလည်း ကောင်းခဲ့ပါတယ်။ ကျွန်တော်တို့ ပြိုင်ဘက်ရဲ့ ဂိုးစည်းနားအထိ အကြိမ်ကြိမ် ရောက်ခဲ့ပါတယ်။ ဂျေရမီ ဒိုကူရဲ့ တစ်ဦးချင်းစွမ်းဆောင်ရည်တွေ၊ ဒုတိယပိုင်းမှာ အန်တွမ်နီ ဆယ်မန်ယိုနဲ့ နီကို အိုရွိုင်လီတို့ဆီ ပေးပို့တဲ့ ဘောလုံးအရှည်တွေ၊ နောက်ပြီး ဂိုးဧရိယာထဲအထိ ဘောလုံးပေးပို့မှုတွေ ရှိခဲ့ပေမဲ့ (ရီးရဲလ်ဂိုးသမား) ကော်တိုအာကို မကျော်နိုင်ခဲ့တာပါ။ ပထမမိနစ် ၅၀ မှာ အဲ့ဒီလို အခွင့်အရေးတွေကို လွဲချော်ခဲ့ပါတယ်။ ပထမဦးဆုံး ပေးလိုက်ရတဲ့ ဂိုးကလည်း ကောင်းကောင်း မကာကွယ်နိုင်ခဲ့သလို နောက်ပိုင်းမှာလည်း သူတို့ရဲ့ အရည်အသွေးတွေက တကယ်ကောင်းလွန်းပါတယ်" လို့ ၎င်းက ဆိုပါတယ်။

သူကပဲ ဆက်လက်ပြီး "ကျွန်တော်တို့ အစွမ်းကုန် ကြိုးစားခဲ့ကြတယ်လို့ ထင်ပါတယ်။ ဒါပေမဲ့ ကော်တိုအာ အတင်းကာကွယ်ရလောက်တဲ့အထိ အခွင့်အရေးမျိုးတွေတော့ မဖန်တီးနိုင်ခဲ့ဘူး။ ပြိုင်ဘက် ဂိုးဧရိယာထဲကို အကြိမ်ကြိမ် ရောက်ခဲ့တာကတော့ ကျွန်တော်တို့ရဲ့ ကစားကွက် တည်ဆောက်မှု ကောင်းမွန်တယ်ဆိုတာကို ပြနေတာပါပဲ။ သူတို့က အမြဲတမ်း အန္တရာယ်ရှိတဲ့ အသင်းပါ။ ဒါပေမဲ့ ကော်တိုအာက တကယ်ကို လက်စွမ်းပြသွားတယ်လို့တော့ ကျွန်တော် မခံစားရဘူး။ ကျွန်တော်တို့ သူတို့ ဂိုးစည်းနားအထိ ခဏခဏ ရောက်ခဲ့ပေမဲ့ အဆုံးသတ်ပိုင်း အနည်းငယ် လိုအပ်သွားတာပါ" လို့ ပြောကြားခဲ့ပါတယ်။