မန်ချက်စတာယူနိုက်တက်ယာယီနည်းပြ မိုက်ကယ်ကာရစ်က ပြီးခဲ့တဲ့ရက်သတ္တပတ်မှာ မန်စီးတီးကို အနိုင်ရပြီးနောက် ပွဲစဉ်တစ်ပွဲကို အနိုင်ရရုံနဲ့ အသင်းကို အသင်းကောင်းတစ်သင်းအဖြစ် သတ်မှတ်လို့မရနိုင်ကြောင်း ပြောကြားလာခဲ့ပါတယ်။ မန်ချက်စတာဒါဘီမှာ မန်စီးတီးကိုအနိုင်ရခဲ့တာကြောင့် ယူနိုက်တက်ဟာ ပရီးမီးယားလိဂ်အမှတ်ပေးဇယားရဲ့ အဆင့် ၅ နေရာမှာရပ်တည်နေပြီး အဆင့် ၄ နေရာက လီဗာပူးနဲ့ ရမှတ် ၁ မှတ်သာ ကွာဟတော့တာဖြစ်ပါတယ်။ 

လာမယ့်တနင်္ဂနွေနေ့မှာတော့ ယူနိုက်တက်ဟာ နောက်ထပ်ခက်ခဲတဲ့ပွဲစဉ်အဖြစ် အာဆင်နယ်ကို အဝေးကွင်းမှာသွားရောက်ရင်ဆိုင်ရမှာဖြစ်ပြီး ယူနိုက်တက်ဟာ အာဆင်နယ်ကို အမ်းမရိတ်စ်မှာ ၂၀၁၇ ခုနှစ်က နောက်ဆုံးအကြိမ်အနိုင်ရထားခဲ့တာဖြစ်ပါတယ်။ ယခုအခါမှာ ကာရစ်က "ဒီအပတ်အတွင်းမှာ ကျွန်တော့်အနာဂတ်နဲ့ပတ်သက်ပြီး ထူးထူးခြားခြားမရှိပါဘူး။ နည်းပြအဖွဲ့ရဲ့ဆုံးဖြတ်ချက်အတိုင်း ဆက်သွားမှာဖြစ်ပြီး အသင်းရဲ့လက်ရှိအခက်အခဲတွေကို တတ်နိုင်သလောက်ဖြေရှင်းပေးဖို့ကြိုးစားနေပါတယ်။ ကျွန်တော်တို့ အခက်အခဲတွေကို ကျော်ဖြတ်သွားရပါမယ်" လို့ပြောကြားခဲ့ပါတယ်။ 

မန်စီးတီးကိုအနိုင်ရခဲ့ခြင်းက ယူနိုက်တက်အတွက်အတော်လေးအားတက်စရာဖြစ်လာခဲ့ပြီး ကာရစ်ကို အမြဲတမ်းနည်းပြအဖြစ် ခန့်အပ်သင့်ကြောင်းလည်း ထောက်ခံမှုတွေရှိလာခဲ့ပါတယ်။ သို့သော်လည်း ကာရစ်ကတော့ အသင်းအနေနဲ့ ခြေစွမ်းတည်ငြိမ်မှုမရှိပါက အဆိုပါနိုင်ပွဲကလည်း အဓိပ္ပာယ်မရှိကြောင်း ပြောကြားလာခဲ့ပါတယ်။

ကွင်းလယ်လူဟောင်းက "အာဆင်နယ်နဲ့ပွဲအတွက် ပွဲထွက်လူစာရင်းကိုတော့ ကျွန်‌တော်ပြောမှာမဟုတ်ပါဘူး။ ကစားသမားတွေအားလုံး မန်စီးတီးနဲ့ပွဲအပြီးမှာ အခြေအနေကောင်းနေပါတယ်။ ကစားသမားတွေ ဒဏ်ရာမရှိရင် ကွင်းအတွင်းခံစားချက်ကို မြှင့်တင်ပေးနိုင်ပါတယ်။ အရေးကြီးတာက မန်စီးတီးနဲ့ပွဲက ရလဒ်ကို ယုံကြည်မှုရှိဖို့နဲ့ တစ်ဖက်မှာ ဘဝင်မမြင့်ဘဲ ခြေစွမ်းကိုထိန်းသိမ်းနိုင်ဖို့ လိုပါတယ်"

"ပွဲစဉ်တစ်ပွဲလောက်နဲ့ အသင်းကိုအသင်းကောင်းအဖြစ် မဆုံးဖြတ်နိုင်ပါဘူး။ ဒါက တိုးတက်ဖို့အတွက် အခြေအနေကောင်းတစ်ရပ်ပဲဖြစ်ပါတယ်။ အသင်းမှာ ယုံကြည်မှုအပြည့်ရှိနေပေမယ့် ရှေ့မှာ ခက်ခဲတဲ့ပွဲစဉ်တွေအတွက်လည်း အကောင်းဆုံးပြင်ဆင်ထားရပါမယ်" လို့ထပ်လောင်းပြောကြားခဲ့ပါတယ်။
မကြာသေးမီက ရာသီကုန်မှာ အသင်းကနေထွက်ခွာသွားမယ်လို့ ကြေညာထားခဲ့တဲ့ ကွင်းလယ်လူ ကတ်စ်မဲရိုးနဲ့ပတ်သက်ပြီး‌တော့လည်း ကာရစ်က "ကတ်စ်မဲရိုးနဲ့ပတ်သက်ရင်တော့ အချိန်တန်ရင် သင့်တော်တဲ့ဆွေးနွေးမှုတွေရှိလာမယ်လို့ထင်ပါတယ်။ သူထွက်ခွာမယ့်အကြောင်း အသိပေးခဲ့တာက ပရိသတ်တွေကို ရှင်းလင်းစေချင်လို့ပါ။ ဒါက ကျွန်တော် မရောက်ခင်ကတည်းက ချမှတ်ထားခဲ့တဲ့ ဆုံးဖြတ်ချက်ပါ"

"ပြီးခဲ့တဲ့အပတ်က သူပြသခဲ့တဲ့ ခြေစွမ်း၊ စိတ်ဓာတ်နဲ့ အသင်းမှာ ရှိနေချင်တဲ့ ဆန္ဒတွေကို ကြည့်ရင် သူ့အပေါ် သံသယဖြစ်စရာ မရှိပါဘူး။ သူနဲ့ ကျွန်တော် စကားပြောပြီးပါပြီ။ သူက ဒီရာသီကို အကောင်းဆုံး အဆုံးသတ်ချင်နေတာပါ။ ဒါကြောင့် သူ့အပေါ် ကျွန်တော် လုံးဝယုံကြည်မှု ရှိပါတယ်" လို့ပြောကြားခဲ့ပါတယ်။