အာဆင်နယ်ဟာ အသင်းရဲ့အားထားရတဲ့ ဗဟိုခံစစ်မှူး ဂါဘရီရယ်မက်ဂါဟေးစ်ကို စာချုပ်သစ်ချုပ်ဆိုပြီး အသင်းမှာ ဆက်လက်ထိန်းသိမ်းထားနိုင်ဖို့ နီးစပ်လာကြောင်း သတင်းတွေက ဖော်ပြလာခဲ့ပါတယ်။ 

BBC သတင်းဌာနရဲ့အဆိုအရ မီခေးလ်အာတီတာရဲ့အသင်းဟာ ၂၀၂၇ ခုနှစ်မှာ အသင်းနဲ့စာချုပ်သက်တမ်းကုန်ဆုံးသွားမယ့် ဂါဘရီရယ်ကို ကာလရှည်စာချုပ်ချုပ်ဆိုနိုင်ဖို့ ရည်ရွယ်ထားတယ်လို့သိရပါတယ်။ ပြီးခဲ့တဲ့ ရက်သတ္တပတ်အချို့မှာ အသင်းနဲ့ ကစားသမားရဲ့ကိုယ်စားလှယ်တွေအကြား ဆွေးနွေးညှိနှိုင်းမှုတွေပြုလုပ်ခဲ့ကြပြီး သဘောတူညီမှုရဖို့ နီးစပ်နေလို့ ဘရာဇီးသားဟာ အမ်းမရိတ်စ်မှာ ဆက်လက်နေထိုင်သွားဖွယ်ရှိပါတယ်။ 

အသက်-၂၇ နှစ်အရွယ်စွယ်စုံရနောက်ခံလူဟာ ဖူလ်ဟမ်နဲ့ယှဉ်ပြိုင်ခဲ့တဲ့ ပရီးမီးယားလိဂ်ပွဲစဉ်မှာ တံကောက်ကြောဒဏ်ရာပြင်းပြင်းထန်ထန်ကြုံတွေ့ခဲ့လို့ ရာသီကုန်အထိ အနားယူနေခဲ့ရတာဖြစ်ပါတယ်။ ၂၀၂၄-၂၅ ရာသီအတွင်းမှာ ဘရာဇီးလက်ရွေးစင်ဟာ အာဆင်နယ်အတွက် တသမတ်တည်းဖြစ်တဲ့ခြေစွမ်းမျိုးကို တောက်လျှောက်ပြသပြီး အသင်းဖော် ဝီလီယမ်ဆာလီဘာနဲ့အတူ အသင်းရဲ့နောက်တန်းကို အကောင်းဆုံး ထိန်းကျောင်းပေးနိုင်ခဲ့ပါတယ်။ 

ဒါ့အပြင် ဂါဘရီရယ်ဟာ ဒဏ်ရာပြဿနာမကြုံတွေ့မီက ပရီးမီးယားလိဂ်ရဲ့ အကောင်းဆုံးဗဟိုခံစစ်မှူးစာရင်းမှာပါဝင်ခဲ့ပြီး အာဆင်နယ်အတွက် ခေါင်းတိုက်ဂိုး ၅ ကြိမ်အထိ သွင်းယူပေးထားနိုင်ခဲ့တာလည်းဖြစ်ပါတယ်။ နွေရာသီအပြောင်းအရွှေ့ဈေးကွက်မှာတော့ အာဆင်နယ်ဟာ မာတင်ဇူဘီမန်ဒီအပါအဝင် တိုက်စစ်ပိုင်းကို အဓိကအင်အားဖြည့်တင်းဖို့ ဥရောပတစ်ဝှမ်း ထိပ်တန်းတိုက်စစ်မှူးတွေကို ချိတ်ဆက်မှုတွေပြုလုပ်နေတယ်လို့သိရပါတယ်။ ဂါဘရီရယ်ကတော့ လက်ရှိအချိန်မှာ ပြန်လည်ထူထောင်ရေးလုပ်ငန်းတွေ လုပ်ဆောင်နေပြီး ၂၀၂၅-၂၆ ရာသီအတွက် အာဆင်နယ်ရဲ့ ခြေစမ်းပွဲစဉ်တွေမှာ ပြန်လည်ပါဝင်ကစားသွားနိုင်ချေရှိပါတယ်။