အဲဗာတန်အသင်းကို အနိုင်ရရှိခဲ့ပြီးနောက်မှာ အသင်းသားတွေအနေနဲ့ ဘာကိုမှ ပေါ့ပေါ့ဆဆ သဘောမထားကြဘူးလို့ အာဆင်နယ်နောက်ခံလူ ဝီလီယံဆာလီဘာက ပြောကြားလိုက်ပါတယ်။

အာဆင်နယ်အသင်းဟာ ဗစ်တာဂျိုကရက်စ်နဲ့ မက်စ်ဒေါမန်တို့ရဲ့ သွင်းဂိုးတွေကြောင့် ၂ ဂိုး - ဂိုးမရှိနဲ့ အနိုင်ရရှိခဲ့ပြီး အမှတ်ပေးဇယားထိပ်မှာ ၉ မှတ်အထိ ဖြတ်ကာ ဦးဆောင်နိုင်ခဲ့တာပါ။

ဝီလီယံဆာလီဘာက "ကျွန်တော်တို့တွေ အခြေအနေကောင်းနေတာ မှန်ပေမဲ့ ပရီးမီးယားလိဂ်က ရာသီမကုန်မချင်း ဘာမှ အတည်ပြုလို့ မရသေးပါဘူး။ ကျွန်တော်တို့မှာ လက်ကျန်ပွဲစဉ် ၇ ပွဲ ရှိပါသေးတယ်။ အဲဒီပွဲအားလုံးကို အနိုင်ရခဲ့မယ်ဆိုရင်တော့ ကျွန်တော်တို့ ချန်ပီယံ ဖြစ်မှာပါ" လို့ ပြောပါတယ်။

မက်စ်ဒေါမန်နဲ့ ပတ်သက်ပြီးတော့လည်း "အမှန်အတိုင်း ပြောရရင် အသက် ၁၆ နှစ်ပဲ ရှိသေးတဲ့ ကစားသမားတစ်ယောက်က အခုလိုမျိုး ကစားပြနိုင်တာ၊ ကွင်းထဲဝင်လာပြီး ပွဲအဖြေကို ပြောင်းလဲပေးနိုင်တာဟာ တကယ်ကို အံ့ဩစရာပါပဲ။ သူက လူကောင်းလေးတစ်ယောက်ဖြစ်သလို နှိမ့်ချမှုလည်း ရှိတယ်၊ နေ့တိုင်းလည်း တိုးတက်အောင် ကြိုးစားနေတဲ့သူပါ။ သူ့အတွက် တကယ်ကို ဝမ်းသာပါတယ်၊ အခုလိုပဲ အတူတူ ဆက်သွားပြီး အနိုင်ရလဒ်တွေ ဆက်ဖော်ဆောင်နိုင်ဖို့ မျှော်လင့်ပါတယ်" လို့ ဆက်ပြောပါတယ်။

ဗစ်တာဂျိုကရက်စ်နဲ့ ပတ်သက်ပြီးတော့လည်း "သူ့အတွက်လည်း တကယ်ကို ဝမ်းသာမိပါတယ်။ သူက နေ့တိုင်း ကြိုးကြိုးစားစား အလုပ်လုပ်သလို ကျွန်တော်တို့အတွက် အရေးကြီးတဲ့ အနိုင်ရလဒ်တွေ ရအောင်လည်း လုပ်ပေးထားပါတယ်။ ဒီနေ့မှာလည်း သူက မက်စ်လိုပဲ လူစားဝင်လာပြီး ပွဲကို ပြောင်းလဲပေးခဲ့တာပါ။ အဲဗာတန်နဲ့ အဝေးကွင်းပွဲတုန်းကလည်း သူ ဂိုးသွင်းခဲ့ပါသေးတယ်။ ကျွန်တော်တို့ကို ကူညီပေးဖို့ သူ အခုလိုပဲ ဆက်ပြီး ခြေစွမ်းပြနိုင်မယ်လို့ ကျွန်တော် ယုံကြည်ပါတယ်" လို့ ဖြည့်စွက်ပြောကြားခဲ့ပါတယ်။