ဘရာဇီးဂန္ထဝင်ကစားသမားကြီးရိုနယ်ဒိုက နည်းပြကာလိုအန်ဆယ်လော့တီရဲ့ လတ်တလောလုပ်ဆောင်ချက်တွေကို သဘောကျမိတယ်လို့ ဝန်ခံပြောကြားလိုက်ပါတယ်။

ရိုနယ်ဒိုက ဘရာဇီးလက်ရွေးစင်အသင်းနည်းပြအဖြစ် ရီးရဲလ်မက်ဒရစ်နည်းပြဟောင်းတာဝန်ယူမှုကို မြင်တွေ့ရဖို့ အမြဲတမ်းလိုလို စိတ်အားထက်သန်နေခဲ့ပါတယ်။

"အန်ဆယ်လော့တီက ကမ္ဘာ့ဖလားမတိုင်ခင်မှာ ကျွန်တော်တို့ လိုအပ်နေတဲ့ အချက်အလက်သေးသေးလေးတွေကို ပြုပြင်ဖြည့်ဆည်းပေးနိုင်လိမ့်မယ်လို့ ကျွန်တော် ယုံကြည်ပါတယ်" လို့ ရိုနယ်ဒိုက ဆိုပါတယ်။

"လက်ရွေးစင်အသင်းတစ်ဖွဲ့လုံးကို အခုလို ပြန်တွေ့ရတာ တကယ့်ကို ကောင်းပါတယ်။ (လာမယ့်အင်္ဂါနေ့မှာကစားမယ့်) ခရိုအေးရှားနဲ့ပွဲစဉ်ကို အဆုံးအဖြတ်လို့တော့ ကျွန်တော် မပြောလိုပါဘူး။ ပြင်ဆင်မှုတွေ လုပ်ဆောင်နေဆဲဖြစ်ပြီး အသင်းမှာ ထူးချွန်တဲ့ အရည်အချင်းရှိသူတွေနဲ့ အံ့ဩစရာကောင်းလောက်အောင်ထက်မြက်တဲ့နည်းပြ ရှိနေပါတယ်။ ကမ္ဘာ့ဖလားအတွက် လိုအပ်နေသေးတဲ့ အသေးစိတ်အချက်တွေကို သူ သေချာပေါက် ညှိနှိုင်းပေးသွားနိုင်ပါလိမ့်မယ်" လို့ ၎င်းက ပြောခဲ့ပါတယ်။

"ကမ္ဘာ့ဖလားမတိုင်ခင် ဖိအားတွေရှိနေချိန် အသင်းရဲ့အငွေ့အသက်နဲ့ စည်းလုံးမှုကိုမြင်တွေ့ရတာ တော်တော်လေး ကောင်းပါတယ်။ ဒီခံစားချက်ကို ကိုယ်တိုင်ခံစားဖို့နဲ့ သူတို့ကို အကောင်းမြင်စိတ်တွေ ဝေမျှပေးနိုင်ဖို့အတွက် ဒီကို လာခဲ့တဲ့ခရီးလမ်းက တကယ့်ကို ကောင်းမွန်တဲ့အတွေ့အကြုံပါပဲ။"

"ဘရာဇီးအသင်းဆိုတာတော့ အမြဲတမ်းရေပန်းအစားဆုံး ဖြစ်နေပါလိမ့်မယ်။ ကျွန်တော်တို့ဆီမှာ ကမ္ဘာ့အကောင်းဆုံးကစားသမားတွေ အမြဲရှိနေပါတယ်။ သူတို့လည်း ဒါကို သိကြပါတယ်။ ဘရာဇီးပြည်သူတွေက ကျွန်တော်တို့ကစားသမားတွေအပေါ် အများကြီးမျှော်လင့်ထားကြတာမို့ အဲဒီမျှော်လင့်ချက်နဲ့အညီ ကြိုးစားအားထုတ်ဖို့ဆိုတာလည်း သူတို့အတွက် အရေးကြီးပါတယ်" လို့ ရိုနယ်ဒိုက ပြောကြားခဲ့ပါတယ်။