The network connection is lost.

Banner Image

ချဲလ်ဆီးက အမှတ်ပေးဖလားစိန်ခေါ်နိုင်တဲ့အသင်းဖြစ်ဖို့ လုံးဝထိုက်တန်ကြောင်း အာတီတာပြောကြား

အာဆင်နယ်နည်းပြ မီခေးလ်အာတီတာက ချဲလ်ဆီးအသင်းဟာ ကျွန်တော် ကြည့်ရတာ အနှစ်သက်ဆုံး အသင်းတွေထဲက တစ်သင်းပါလို့ ပြောပြီး ပရီးမီးယားလိဂ်ဖလား စိန်ခေါ်နိုင်တဲ့အသင်းစာရင်းမှာ ပါဝင်ဖို့‌ လုံးဝထိုက်တန်ပါတယ်လို့ ယုံကြည်ကြောင်း ပြောပါတယ်။ ဇယားကထိပ်ဆုံး နှစ်သင်းဟာ မနက်ဖြန်ည စတန်းဖို့ဒ်ဘရစ်ချ်မှာ အကြိတ်အနယ် ယှဉ်ပြိုင်ကြမှာဖြစ်ပြီး အမှတ်ပေးဇယားကို ဦးဆောင်နေတဲ့ အာဆင်နယ်ကတော့ ပြိုင်ဘက် ချဲလ်ဆီးကို ၆ မှတ်ဖြတ်ထားတဲ့ အနေအထားကို ပိုပြီး ကွာဟအောင် လုပ်ဖို့ မျှော်လင့်နေတာပါ။

ဂိုးမပေးရဘဲ ၃ ပွဲဆက်အနိုင်ရထားတဲ့ ရလဒ်က အန်ဇိုမာရက်စကာရဲ့ အသင်းကို အမှတ်ပေးဇယား ဒုတိယနေရာအထိ ရောက်လာစေခဲ့ပါတယ်။ အင်္ဂါနေ့က ချန်ပီယံလိဂ်မှာ ဘာစီလိုနာကို ၃-၀ နဲ့ အနိုင်ရခဲ့တဲ့ ခြေစွမ်းကလည်း လတ်လတ်ဆတ်ဆတ် ရှိနေပါသေးတယ်။ ဒါပေမဲ့ ချဲလ်ဆီး ဒီလို တောက်ပလာတဲ့ အခြေအနေက အာတီတာအတွက်တော့ အံ့သြစရာ မဟုတ်ပါဘူး။

အာတီတာက"ကျွန်တော်တို့ အားလုံး အဲဒီနေရာမှာ ရှိနေကြတယ်၊ ပြီးတော့ သူတို့ လွန်ခဲ့တဲ့ နှစ်အနည်းငယ်က လုပ်ခဲ့တာတွေကြောင့် အဲဒီနေရာမှာ ရှိနေဖို့ လုံးဝ ထိုက်တန်ပါတယ်။ သူတို့ စုစည်းထားတဲ့ လူစာရင်း၊ သူတို့ဆီက အရေအတွက်၊ သူတို့ဆီက အရည်အသွေး၊ သူတို့ဆီက နည်းပြအရေအတွက်၊ အဲဒီမှာ ဖြစ်ပျက်နေတာတွေက အရမ်း အရမ်းကို အပြုသဘောဆောင်တယ် ဆိုတာ အဓိပ္ပာယ် ရှိပါတယ်။ သူတို့ အဲဒီမှာ ရှိနေဖို့ ထိုက်တန်ပါတယ်။ သူတို့က ကျွန်တော် ကြည့်ရတာ အနှစ်သက်ဆုံး အသင်းတွေထဲက တစ်သင်းပါ။ သူတို့က အရမ်းသွက်လက်တယ်၊ ခြိမ်းခြောက်မှုတွေ အများကြီး ပေးနိုင်တယ်၊ တစ်ဦးချင်း အရည်အချင်းတွေ အများကြီး ရှိတယ်၊ သူတို့ ဘာလုပ်ချင်လဲဆိုတာ အရမ်း ရှင်းလင်းပြတ်သားတယ်၊ အဲဒါကြောင့် သူတို့က အရမ်း ခက်ခဲတဲ့ အသင်းဖြစ်နေတာပါ" လို့ ပြောခဲ့ပါတယ်။