ဘာစီလိုနာဂိုးသမား ဆက်ဇနီဟာ သူ့ရဲ့ ကစားသမားဘဝအနာဂတ်ကို မကြာမီမှာပဲ ဆုံးဖြတ်ချက်ချသွားမယ်လို့ဆိုလာခဲ့ပြီး ဘာစီလိုနာဘက်ကတော့ ကစားသမားကို အသင်းမှာ နောက်ရာသီအထိ ဆက်လက်ထိန်းသိမ်းလိုနေတယ်လို့သိရပါတယ်။ 

ဘာစီလိုနာသို့စတင်ရောက်ရှိချိန်ကတည်းက တည်ငြိမ်တဲ့လက်စွမ်းကို တောက်လျှောက် ထိန်းသိမ်းထားနိုင်တဲ့ ဝါရင့်ဂိုးသမားဟာ နည်းပြဟန်ဆီဖလစ်ရဲ့ စိတ်ကြိုက်ကစားသမားတစ်ယောက်ဖြစ်လာသလို၊ အသင်းပရိသတ်တွေရဲ့ သူရဲကောင်းတစ်ယောက်အဖြစ်လည်း ရပ်တည်ထားနိုင်တာဖြစ်ပါတယ်။ 

၂၀၂၄ အောက်တိုဘာလမှာ ဘာစီလိုနာသို့စတင်ရောက်ရှိလာခဲ့တဲ့ ဆက်ဇနီဟာ ယခုအခါမှာ အသင်းအတွက် အလွန်အရေးပါတဲ့ဂိုးသမားဖြစ်ပြီး ဘာစီလိုနာရဲ့ နံပါတ်နှစ်ဂိုးသမား အီနာကီပီနာကို ကျော်ဖြတ်ပြီး နေရာရနေတာဖြစ်ပါတယ်။ဘာစီလိုနာအသင်းရဲ့ နံပါတ် ၁ ဂိုးသမား မာ့ခ်အန်ဒရီတာစတီဂန်ဟာ ဧပြီ သို့မဟုတ် မေလအထိ အနားယူဖို့လိုအပ်နေတာကြောင့် ဟန်ဆီဖလစ်က ပိုလန်သားကို အရေးပေါ်ခေါ်ယူခဲ့တာဖြစ်ပြီး ယခုအခါမှာ ကစားသမားရဲ့ လက်စွမ်းပြသမှုတွေကြောင့် အသင်းမှာ နောက်ရာသီအထိ ဆက်လက်ထားရှိချင်နေတာဖြစ်ပါတယ်။ 

ယခုအခါမှာ အသက်-၃၄ နှစ်အရွယ် ဝါရင့်ဂိုးသမားက "ကျွန်တော့်ရဲ့အနာဂတ်နဲ့ပတ်သက်ပြီး မကြာခင်မှာပဲ ဆုံးဖြတ်ချက်ချသွားရမှာပါ။ လောလောဆယ်မှာအရေးကြီးဆုံးကတော့ ကျွန်တော့်ရဲ့ရုပ်ပိုင်းနဲ့ စိတ်ပိုင်းဆိုင်ရာကို လာမယ့်ပွဲစဉ်တွေအတွက် ပြင်ဆင်သွားဖို့ပါပဲ။ ကျွန်တော်တို့ အကောင်းဆုံးခြေစွမ်းနဲ့ကစားသွားရပါမယ်" လို့ပြောကြားခဲ့ပါတယ်။ 

ပြီးခဲ့တဲ့ရာသီကုန်မှာ ဘောလုံးကစားသမားဘဝမှ အနားယူခဲ့တဲ့ ဆက်ဇနီဟာ ကွင်းထဲသို့ပြန်လည်ခြေချချိန်မှာ ထိပ်တန်းစွမ်းဆောင်ရည်ကို ဆက်လက်ပြသထားနိုင်တာကြောင့် ဘာစီလိုနာနည်းပြ ဟန်ဆီဖလစ်အနေနဲ့ အနာဂတ်မှာ ဂျာမန်လက်ရွေးစင် တာစတီဂန်နဲ့ ပိုလန်သားတို့အကြား ခက်ခဲတဲ့ဆုံးဖြတ်ချက်ကို ချမှတ်သွားရဖို့ရှိနေပါတယ်။ 

ဆက်လက်ပြီး ဆက်ဇနီက "ကျွန်တော်က ကံတရားကိုအပြစ်တင်တတ်တဲ့လူတစ်ယောက်မဟုတ်ပါဘူး။ ဘယ်လိုပဲကြုံရကြုံရ ကျွန်တော်ကျေနပ်ပါတယ်။ ဘာစီလိုနာအတွက်ကစားပေးရတာ အရမ်းစိတ်လှုပ်ရှားစရာကောင်းပါတယ်။ ကျွန်တော်က အတွေ့အကြုံရင့် ဂိုးသမားတစ်ယောက်ဖြစ်ပေမယ့် ဒီမှာကစားရတဲ့အတွေ့အကြုံက ထူးခြားပါတယ်"

"ကျွန်တော်က နှိုင်းယှဉ်ရတာကို မကြိုက်ပါဘူး။ ဒါပေမယ့် ဂျူဗင်တပ်စ်မှာကစားတုန်းက ရလဒ်က အရေးပါဆုံးအရာဖြစ်ခဲ့ပါတယ်။ ဒါပေမယ့် ဘာစီလိုနာမှာတော့ အသင်းရဲ့ကစားပုံက အရေးပါဆုံးအရာဖြစ်နေပါတယ်။ အက်သလက်တီကိုကို အနိုင်ရခဲ့လို့ ကျွန်တော်တို့ အရမ်းကျေနပ်ပါတယ်။ ဒါပေမယ့် သူတို့အတွက် နည်းနည်းစိတ်မကောင်းဖြစ်မိတာတော့ အမှန်ပါပဲ။ ဘောလုံးအားကစားက ရက်စက်ကြမ်းတမ်းပါတယ်။ အက်သလက်တီကိုက ပွဲပြီးကာနီးမှာ ခွန်အားတွေပျောက်ဆုံးခဲ့ပုံရပါတယ်" လို့ပြောကြားခဲ့ပါတယ်။ 

ဘာစီလိုနာနဲ့ ဆက်ဇနီတို့ဟာ နိုင်ငံတကာပွဲစဉ်တွေအပြီးမှာ ကိုပါဒယ်ရေးဆီမီးဖိုင်နယ် ဒုတိယအကျော့ပွဲစဉ်အဖြစ် အက်သလက်တီကိုနဲ့ ထပ်မရင်ဆိုင်သွားရဦးမှာဖြစ်ပြီး ပထမအကျော့မှာ ၄-၄ နဲ့သရေကျထားခဲ့တာကြောင့် ယခုတစ်ခေါက်ပြန်လည်တွေ့ဆုံချိန်မှာလည်း ဗိုလ်လုပွဲကိုတက်ရောက်နိုင်ဖို့ အနိုင်ရလဒ်ကို မဖြစ်မနေအနိုင်ပုံဖော်သွားရဦးမှာဖြစ်ပါတယ်။