ရက်ရှ်ဖို့ဒ်ဟာ ဇန်နဝါရီ အပြောင်းအရွှေ့မှာ ယူနိုက်တက်ကနေ အက်စတွန်ဗီလာကို အငှားနဲ့ ပြောင်းရွှေ့ပြီးနောက် သူ့ရဲ့ခြေစွမ်းကို ပြန်လည်ရရှိခဲ့ပြီး ကောင်းမွန်စွာနဲ့ ပြန်လည်ကစားနေပါတယ်။ အသက် ၂၇ နှစ်အရွယ် တိုက်စစ်မှူးဟာ ဆောင်းရာသီမှာ အသင်းမပြောင်းရွှေ့မီ ယူနိုက်တက်မှာ ၁၈ လကြာအထိ ကြောက်မက်ဖွယ်ရာ အချိန်ကာလကို ဖြတ်သန်းခဲ့ရပေမယ့် မကြာသေးခင်ပတ်တွေအတွင်း မျက်စိကျစရာ ခြေစွမ်းတွေပြသခဲ့တာကြောင့် အမ်မရီရဲ့ အဓိက (၁၁) ဦးစာရင်းမှာ နေရာရရှိခဲ့ပါတယ်။

ယူနိုက်တက်ရဲ့ ဂန္တဝင်ကစားသမား ဝိန်းရွန်နီက ဗီလာရဲ့ ချန်ပီယံလိဂ် ကွာတားဖိုင်နယ်အဖြစ် ပီအက်စ်ဂျီကို ရှုံးနိမ့်ခဲ့တဲ့ပွဲမှာ ရက်ရှ်ဖို့ဒ်ရဲ့ ခြေစွမ်းကောင်းမွန်ခဲ့မှုအပေါ် အိုးလ်ထရက်ဖို့ဒ်မှာ သူ့ရဲ့ ‘အမွေအနှစ်’ ကို ဆက်လက်တည်ဆောက်ဖို့ တိုက်တွန်းခဲ့ပါတယ်။ ဒါပေမဲ့ အင်္ဂလန်တိုက်စစ်မှူးဟာ အမ်မိုရင်ရဲ့ သူ့စိတ်နေစိတ်ထားအပေါ် ထပ်ခါတလဲလဲ ဝေဖန်မှုတွေကြောင့် သူ့ရဲ့ ငယ်ဘဝကလပ်အသင်းကို ပြန်လည်ရောက်ရှိဖို့ တွန့်ဆုတ်နေပြီး ရာသီကုန်ဆုံးပြီးနောက် ဗီလာပါ့ခ်မှာသာ ဆက်လက်နေထိုင်လိုကြောင်း နီးစပ်သူတွေကို ပြောကြားခဲ့တယ်လို့ သတင်းတွေထွက်ပေါ်နေပါတယ်။

The Daily Star ရဲ့အဆိုအရ ယူနိုက်တက်ဟာ ရက်ရှ်ဖို့ဒ်ကို အပြီးသတ် လက်လွှတ်ဖို့ အသင့်ရှိနေပြီး အက်ဖ်အေဖလား နှစ်ကြိမ်ရရှိထားတဲ့ တိုက်စစ်မှူးကို အသုံးပြုကာ ဝက်ကင်းစ်ကို Theatre of Dreams ဆီ ဆွဲဆောင်နိုင်ပါတယ်။ ယူနိုက်တက်ရဲ့ အကြီးအကဲတွေဟာ ရက်ရှ်ဖို့ဒ်ကို ဗီလာအသင်းထံ ကမ်းလှမ်းခြင်းနဲ့အတူ ‘သိသာထင်ရှားတဲ့’ ပြောင်းရွှေ့ကြေးကိုပါ ပေးအပ်ခြင်းဖြင့် နွေရာသီ အပြောင်းအရွှေ့ဈေးကွက်ဖွင့်လှစ်ချိန်မှာ ဝက်ကင်းစ်ကို ခေါ်ယူနိုင်ခြေ ပိုများလာမယ်လို့ ယုံကြည်ကြောင်း သတင်းမှာ ဖော်ပြထားပါတယ်။

အာဆင်နယ်အသင်းကလည်း ဝက်ကင်းစ်ကို ခေါ်ယူဖို့ စိတ်ဝင်စားမှုပြင်းထန်နေတယ်လို့ သတင်းတွေထွက်ပေါ်ခဲ့ပြီး ဇန်နဝါရီလမှာ ပေါင်သန်း ၆၀ ဝန်းကျင်နဲ့ ကမ်းလှမ်းခဲ့ပေမယ့် ပရီးမီးယားလိဂ်ပြိုင်ဘက်ရဲ့ ချက်ချင်းပယ်ချမှုကို ခံခဲ့ရတာကြောင့် ဗီလာတိုက်စစ်မှူးကို ခေါ်ယူဖို့ သဘောတူညီမှု မရရှိခဲ့ပါဘူး။ ဝက်ကင်စ်ဟာ ဗီလာအသင်းရဲ့ ဦးစားပေးတိုက်စစ်မှူးစာရင်းမှာ ရက်ရှ်ဖို့ဒ်ရဲ့နောက်ကို ရောက်ရှိခဲ့ပြီး နယူးကာဆယ်ကို ၄-၁ ဂိုး နဲ့ အနိုင်ရခဲ့တဲ့ပွဲအပြီးမှာ အင်္ဂလန်တိုက်စစ်မှူးက အမ်မရီအပေါ် ဒေါသထွက်ခဲ့ကြောင်း ဝန်ခံခဲ့ပါတယ်။

“ကျွန်တော်က ပီအက်စ်ဂျီနဲ့ နှစ်ပွဲစလုံးမှာ မိနစ် ၂၀ စီပဲ ကစားခဲ့တယ်။ ကျွန်တော် လိမ်ပြောမှာမဟုတ်ဘူး၊ ကျွန်တော် မကစားခဲ့ရလို့ အရမ်းဒေါသထွက်ခဲ့‌ကြောင်းကို ကျွန်တော်က နည်းပြ အမ်မရီထံ သိစေခဲ့တယ်” လို့ ဝက်ကင်းစ်က Sky Sports ကို ပြောကြားခဲ့ပါတယ်။ “သူက မန်နေဂျာပါ၊ သူ့ဆုံးဖြတ်ချက်ကို လေးစားရမယ်၊ ဒါပေမဲ့ ကျွန်တော်က အရန်ခုံမှာ ထိုင်နေရတာကို ပျော်ရွှင်တဲ့ ကစားသမားတွေထဲက တစ်ယောက် မဟုတ်ပါဘူး'

“ဒါက ကျွန်တော်အရင်က မကြုံဖူးတဲ့အရာတစ်ခုပါ၊ အကြီးမားဆုံးစင်မြင့်မှာ ပါဝင်ခွင့်မရတာမျိုးပါ။ ကျွန်တော် ပွဲကွင်းထဲမှာ အများကြီး ပိုကစားချင်ခဲ့တယ်"

“ဒီနေ့ ကျွန်တော်တို့ ရောက်ရှိနေတဲ့နေရာကို ရောက်ရှိဖို့ ကျွန်တော် အဓိကအခန်းကဏ္ဍကနေ ပါဝင်ခဲ့ပြီး အဲဒီပွဲတွေမှာ ကျွန်တော် ကစားချင်ပါတယ်” လို့ ဝက်ကင်းစ်က ဆိုပါတယ်။ ဝက်ကင်းစ်ရဲ့ မှတ်ချက်တွေအပေါ် သူ့ရဲ့တုံ့ပြန်မှုကို မေးမြန်းရာမှာ အမ်မရီက “ဒေါသထွက်တာက အရမ်းကောင်းပါတယ်။ ပြီးတော့ သူက နယူးကာဆယ်နဲ့ပွဲမှာ ကစားခဲ့သလို ကစားတာကလည်း အရမ်းကောင်းပါတယ်” လို့ ပြန်လည်ဖြေကြားခဲ့ပါတယ်။

ရက်ရှ်ဖို့ဒ်ရဲ့ အနာဂတ်နဲ့ပတ်သက်ပြီး မေးမြန်းရာမှာ အမ်မရီက “အခုအချိန်မှာ အဲဒါကို စီစဉ်ဖို့ ခက်ခဲပါတယ်” လို့ ထပ်လောင်းပြောကြားခဲ့ပါတယ်။ “ကျွန်တော်တို့ အရမ်းပျော်ရွှင်ပါတယ်။ သူပျော်ရွှင်ရင် ကျွန်တော်တို့လည်း ပျော်ရွှင်ပါတယ်။ အခုအချိန်နဲ့ နောက်လာမယ့် ရက်သတ္တပတ်တွေရဲ့ အခြေအနေတွေပေါ်မှာ မူတည်ပါတယ်” လို့ အမ်မရီက ဆိုပါတယ်။
ဝက်ကင်းစ်ဟာ ၂၀၂၈ ခုနှစ် ဇွန်လအထိ ဗီလာပါ့ခ်မှာ စာချုပ်ချုပ်ဆိုထားပြီး အဲဒီနွေရာသီမှာပဲ ရက်ရှ်ဖို့ဒ်ရဲ့ ယူနိုက်တက်နဲ့ စာချုပ်သက်တမ်းက ကုန်ဆုံးမှာ ဖြစ်ပါတယ်။