ဝက်စ်ဟမ်းနဲ့ သရေကျခဲ့ပေမဲ့ ချန်ပီယံဆုအတွက် မျှော်လင့်ချက် မကုန်သေးဘူးလို့ ဂွါဒီယိုလာ အခိုင်အမာဆို
စနေနေ့က ကစားခဲ့တဲ့ ဝက်စ်ဟမ်းနဲ့ပွဲမှာ ၁-ဂိုး စီ သရေကျခဲ့တာကြောင့် မန်စီးတီးအသင်းဟာ ဇယားထိပ်က အာဆင်နယ်နဲ့ ၉ မှတ်အထိ ကွာဟသွားခဲ့ပေမဲ့ ပရီးမီးယားလိဂ် ချန်ပီယံလုပွဲကတော့ အဆုံးမသတ်သေးဘူးလို့ ပက်ဂွါဒီယိုလာက အခိုင်အမာ ပြောကြားလိုက်ပါတယ်။ လန်ဒန်စတေဒီယံမှာ ကစားခဲ့တဲ့ ဒီပွဲရဲ့ ပထမပိုင်းမှာ ဘာနာဒိုဆေးလ်ဗားရဲ့ ဂိုးနဲ့ မန်စီးတီးတို့ ဦးဆောင်နိုင်ခဲ့ပေမဲ့ ပွဲချိန်ဝက် မတိုင်ခင်မှာပဲ မာဗရိုပါးနော့စ်က ဝက်စ်ဟမ်းအတွက် ချေပဂိုး ခေါင်းတိုက်သွင်းယူပေးခဲ့တာကြောင့် အသာစီးရမှုကို လက်လွှတ်ခဲ့ရပါတယ်။ အဲဗာတန်ကို ၂-၀ နဲ့ အနိုင်ရရှိခဲ့တဲ့ပွဲမှာ အာဆင်နယ်အသင်းက ပွဲပြီးခါနီး မိနစ်ပိုင်းတွေအတွင်း ဂိုးတွေ သွင်းယူခဲ့ပြီး နာရီပိုင်းအကြာမှာပဲ ဂွါဒီယိုလာရဲ့ အသင်းကတော့ အနိုင်ရဖို့အတွက် တုံ့ပြန်မှု မပြသနိုင်ခဲ့တာ ဖြစ်ပါတယ်။
အဆင့် (၂) နေရာက မန်စီးတီးဟာ အာဆင်နယ်ထက် တစ်ပွဲလျော့ ကစားထားရသေးသလို ဧပြီလမှာလည်း အိမ်ကွင်းမှာ အာဆင်နယ်ကို လက်ခံကစားရမှာ ဖြစ်ပါတယ်။ ဒါပေမဲ့ ပုံစံကောင်းရဖို့ ရုန်းကန်နေရတဲ့ စိန်ခေါ်သူ မန်စီးတီးအတွက် လက်ကျန်ပွဲစဉ် ၈ ပွဲသာ ကျန်ရှိတော့တာကြောင့် ဝေဖန်သုံးသပ်သူ အများအပြားကတော့ သူတို့ကို ချန်ပီယံလမ်းကြောင်းကနေ ဖယ်ထုတ်ထားကြပြီ ဖြစ်ပါတယ်။ ဒါပေမဲ့ ဂွါဒီယိုလာကတော့ အရှုံးမပေးသေးဘဲ မန်စီးတီးအနေနဲ့ အလံဖြူထောင်မှာ မဟုတ်ဘူးလို့ ပြတ်ပြတ်သားသား ပြောဆိုခဲ့ပါတယ်။
"ဒါက အဆုံးသတ်သွားပြီလို့ ဘယ်သူပြောလဲ။ ကျွန်တော်တို့ ရှုံးမှမရှုံးသေးတာ၊ ဆက်ပြီး ကြိုးစားသွားဦးမှာပါ" လို့ သူက ဆိုပါတယ်။ "အာဆင်နယ်လို အသင်းနဲ့ ၉ မှတ်ကွာဟတယ်ဆိုတာ များပြားတဲ့ ပမာဏဖြစ်ပေမဲ့ ဒါမျိုးက ဖြစ်တတ်ပါတယ်။ ကျွန်တော်တို့မှာ သူတို့နဲ့ အိမ်ကွင်းပွဲစဉ် ကျန်ပါသေးတယ်၊ ဒါကြောင့် နောက်ဆုံးအချိန်အထိ ကြိုးစားရပါလိမ့်မယ်။ တကယ်လို့ မဖြစ်နိုင်တော့ဘူးဆိုရင်တော့ ချန်ပီယံဖြစ်မယ့်သူကို ဂုဏ်ပြုပေးရမှာပေါ့၊ ဒါပေမဲ့ အခုတော့ ကျွန်တော်တို့ ကြိုးစားရဦးမယ်" လို့လည်း သူက ပြောပါတယ်။ ပရီးမီးယားလိဂ်မှာ ပွဲပေါင်း ၃၀ ကျော် ကစားပြီးချိန်မှာ ဇယားထိပ်က အသင်းနဲ့ အနည်းဆုံး ၉ မှတ်အထိ ကွာဟခဲ့ပြီးမှ ချန်ပီယံဆုကို အရယူနိုင်ခဲ့တဲ့ တစ်သင်းတည်းသော အသင်းကတော့ ၂၀၁၃-၁၄ ရာသီက မန်စီးတီးအသင်းပဲ ဖြစ်ပါတယ်။
