ဝက်စ်ဟမ်းကစားသမားတွေနဲ့ ပရိသတ်တွေကို နူနိုက စိတ်ဓာတ်တက်ကြွအောင် လုပ်ပေးနိုင်ခဲ့တယ်လို့ ပဲလေ့စ်ပိုင်ရှင်ဟောင်း ဂျော်ဒန် အခိုင်အမာပြော
ခရစ္စတယ်ပဲလေ့စ်အသင်းရဲ့ ပိုင်ရှင်ဟောင်း ဆိုင်မွန်ဂျော်ဒန်က ဝက်စ်ဟမ်းအသင်း တန်းမဆင်းရရေး တိုက်ပွဲဝင်နေရတဲ့နေရာမှာ နည်းပြ နူနိုဟာ အဓိကသော့ချက်ဖြစ်တယ်လို့ ပြောဆိုလိုက်ပါတယ်။
ပြီးခဲ့တဲ့ စနေနေ့က အဲဗာတန်အသင်းကို အနိုင်ရရှိခဲ့တာကြောင့် ဝက်စ်ဟမ်းဟာ တန်းဆင်းဇုန်အထက် ၂ မှတ်အကွာမှာ ဆက်လက်ရပ်တည်နေနိုင်တာပါ။
နူနိုဟာ အသင်းအတွက် သိသိသာသာ ပြောင်းလဲပေးနိုင်သူ ဖြစ်တယ်လို့ ဂျော်ဒန်က talkSPORT အစီအစဉ်မှာ အခုလို အခိုင်အမာ ပြောကြားခဲ့ပါတယ် - "ဒီလူကတော့ သူတို့ကို အခက်အခဲထဲကနေ ဘယ်တော့မှ ဆွဲထုတ်နိုင်မှာ မဟုတ်ဘူးဆိုပြီး လူအမျိုးမျိုးဆီကနေ ခင်ဗျား (တွဲဖက်တင်ဆက်သူ ဂျင်ဝိုက်) ဆီကို မက်ဆေ့ချ်တွေ အများကြီး ရောက်ခဲ့တာ ကျွန်တော် သိပါတယ်။"
"အခုတော့ သူက အသင်းကို အခက်အခဲထဲက ဆွဲထုတ်ပေးနိုင်ရုံတင်မကဘဲ တကယ့်ကို အားမာန်အပြည့်နဲ့ ပြန်လည်တိုက်ပွဲဝင်နိုင်အောင် လုပ်ဆောင်ပေးနေတာပါ။ သူ့ရဲ့ စိတ်နေစိတ်ထားကလည်း အရမ်းကို တည်ငြိမ်ပြီး အေးအေးဆေးဆေး ရှိလှပါတယ်။ ကစားသမားတွေကလည်း သူ့အတွက်ကို တကယ်ကစားပေးချင်စိတ် ရှိနေကြတာ သိသာပါတယ်။"
"ပြီးတော့ အသင်းရဲ့ အစဉ်အလာကို ကြည့်လိုက်ပါဦး၊ အခု ဝက်စ်ဟမ်းပရိသတ်တွေဟာ သူတို့အသင်းနဲ့ နည်းပြနောက်မှာ အပြည့်အဝ ဝန်းရံပေးနေကြပြီ။ သူတို့ဟာ အသင်းရဲ့ ၁၂ ယောက်မြောက် ကစားသမားတွေ ဖြစ်လာကြပြီလေ။ နည်းပြတစ်ယောက်အနေနဲ့ အခုသူလုပ်ပြခဲ့တာထက် ပိုကောင်းအောင် လုပ်ပြဖို့ဆိုတာ မရှိနိုင်တော့ပါဘူး" လို့ ၎င်းက ဆိုပါတယ်။
