မားကပ်စ်ရက်ရှ်ဖို့ဒ်ဟာ မန်ချက်စတာယူနိုက်တက်ကနေ ထွက်ခွာခဲ့ပြီးနောက်မှာ သူ့ရဲ့ ယူနိုက်တက်ကစားသမားဘဝကို "တဝက်လောက် အလဟဿ ဖြုန်းတီးပစ်ခဲ့တယ်" လို့ အသင်းအတွင်းလူဟောင်းတစ်ဦးက စွပ်စွဲပြောကြားလိုက်ပါတယ်။

ဒီမှတ်ချက်တွေဟာ ရက်ရှ်ဖို့ဒ်အနေနဲ့ အိုးထရက်ဖို့ဒ်ဆီ ပြန်လာနိုင်တဲ့ လမ်းစရှိနေသေးတယ်လို့ ပြောဆိုထားတဲ့ ရီနေးမျူလန်စတင်းရဲ့ အမြင်နဲ့ သိသိသာသာ ကွဲလွဲနေတာပါ။

ရက်ရှ်ဖို့ဒ်ဟာ လက်ရှိမှာ ဘာစီလိုနာအသင်းဆီ အငှားနဲ့ သွားရောက်ကစားနေပြီး ၃၄ ပွဲမှာ ၁၀ ဂိုးသွင်း၊ ဂိုးဖန်တီးမှု ၁၃ ကြိမ် ပြုလုပ်ထားပါတယ်။ ဒါပေမဲ့ ယူနိုက်တက်အသင်းရဲ့ ပထမအသင်း အနှိပ်သည်ဟောင်း ရော့ဒ်သွန်းလေကတော့ ရက်ရှ်ဖို့ဒ်ရဲ့ ယူနိုက်တက်မှာ ခြေစွမ်းကျဆင်းသွားရတာဟာ သူ့ဘာသာသူ လုပ်ခဲ့တာလို့ ယုံကြည်နေပါတယ်။

"ကျွန်တော် ပွင့်ပွင့်လင်းလင်းပဲ ပြောမယ်၊ အားမနာပါဘူး။ ကျွန်တော် မားကပ်စ်ကို သိပါတယ်။ ကျွန်တော်ပြောတာကို သူသဘောမကျဘူးဆိုရင်လည်း ဂရုမစိုက်ပါဘူး" လို့ သွန်းလေက The Busby Way Podcast မှာ ပြောခဲ့ပါတယ်။

"သူ စိတ်မပျော်တော့ဘူး။ တခြားလူတစ်ယောက်လို ဖြစ်သွားခဲ့တယ်။ အရင်က ပျော်ပျော်ရွှင်ရွှင်နဲ့ ချစ်ဖို့ကောင်းတဲ့ ကောင်လေးတစ်ယောက်က အထူးသဖြင့် ကလပ်အသင်းထဲမှာဆိုရင် မျက်နှာမကောင်းဘဲ ဟိုနားဒီနား လျှောက်သွားနေတာကို ကျွန်တော် မြင်ခဲ့ရပါတယ်။ အသင်းပြင်ပမှာတော့ သူ့ကို ရံဖန်ရံခါ တွေ့တတ်ပြီး သူက အဆင်ပြေပါတယ်။ ဒါပေမဲ့ အသင်းထဲမှာကျတော့ သူ့ရဲ့ အပြုအမူတွေက သိပ်မကောင်းလှဘူး။"

"အဲဒါတွေက ကွင်းထဲအထိ ကူးစက်သွားပြီး ကွင်းထဲမှာ သူလမ်းလျှောက်နေတာကို တွေ့ရမယ်။ သူ့ဆီကနေ စွမ်းအင်အပြည့်နဲ့ ကစားတာမျိုးပဲ လိုချင်ခဲ့ကြတာပါ။ အခု မိုက်ကယ်ကားရစ် လုပ်နေသလိုမျိုးပေါ့။ သူက ကစားသမားတွေဆီကနေ စွမ်းအင်တွေကို ထုတ်ယူနိုင်ပေမဲ့ မားကပ်စ်ဆီကတော့ အဲဒါမျိုး မရခဲ့ပါဘူး။ အခြေခံအားဖြင့်တော့ သူက အလဟဿ ဖြုန်းတီးပစ်ခဲ့တာပါ။ ကျွန်တော့်အမြင်မှာတော့ သူ့ဆီကနေ ယူနိုက်တက်ကစားသမားဘဝကို အတင်းအဓမ္မ လုယူသွားတာမျိုး မဟုတ်ဘဲ သူကိုယ်တိုင်ကသာ တဝက်လောက် ဖြုန်းတီးပစ်ခဲ့တာပါ" လို့ ဆိုပါတယ်။

ရက်ရှ်ဖို့ဒ်ဟာ ၂၀၂၄ ခုနှစ် ဒီဇင်ဘာလနောက်ပိုင်းမှာ ယူနိုက်တက်အတွက် ပွဲမကစားခဲ့ရတော့သလို နည်းပြဟောင်း ရူဘင်အာမိုရင်လက်ထက်မှာ နံပါတ် ၁၀ ဂျာစီကို မားသီးရပ်စ်ကူးညာဆီ လက်လွှတ်ခဲ့ရပါတယ်။ ဒါ့အပြင် ဘာစီလိုနာကို အငှားမထွက်ခင်မှာ ပထမအသင်းနဲ့ သီးခြားခွဲပြီး လေ့ကျင့်ခန်းဆင်းခဲ့ရပါသေးတယ်။

အာမိုရင်က အရင်တုန်းက အစွမ်းကုန် မကြိုးစားတဲ့ ကစားသမားကို ရွေးချယ်မယ့်အစား အသက် ၆၃ နှစ်အရွယ် ဂိုးနည်းပြကိုတောင် လူစားလဲကစားသမားအဖြစ် ထည့်သွင်းချင်တယ်လို့ ပြောခဲ့ဖူးပါတယ်။ ဒါဟာ အဲဒီလို ခက်ခဲတဲ့အချိန်အတွင်းမှာ ရက်ရှ်ဖို့ဒ်ကို ရည်ရွယ်ပြီး ပြောခဲ့တာလို့ အများက ယူဆနေကြပါတယ်။

အင်္ဂလန်လက်ရွေးစင်ကစားသမားဟာ ပြီးခဲ့တဲ့ရာသီ ဒုတိယဝက်ကို အက်စတွန်ဗီလာမှာ အငှားနဲ့ ကုန်ဆုံးခဲ့ပြီးမှ ကမ့်နူးဆီ အငှားနဲ့ ပြောင်းရွှေ့ခဲ့တာပါ။ ဘာစီလိုနာအနေနဲ့ ဒီနွေရာသီမှာ ပေါင် ၂၆ သန်းပေးပြီး အမြဲတမ်းခေါ်ယူနိုင်မယ့် အခွင့်အရေးလည်း ရှိနေပါတယ်။

စပိန်မှာ စာရင်းဇယားကောင်းတွေ ပိုင်ဆိုင်ထားပေမဲ့ သူ့ရဲ့ ရေရှည်အနာဂတ်ကတော့ မသေချာသေးပါဘူး။ ဘာစီလိုနာနည်းပြ ဟန်ဆီဖလစ်ခ်က စာချုပ်ပါ အချက်ကို အသုံးပြု၊ မပြုဆိုတာကို ချက်ချင်း ဆုံးဖြတ်မှာမဟုတ်ဘူးလို့ မကြာသေးခင်က အရိပ်အမြွက် ပြောကြားခဲ့ပါတယ်။

"အားကစားဒါရိုက်တာ ဒီကိုနဲ့ ကျွန်တော်ကတော့ အသင်းအကြောင်းနဲ့ ဘာတွေလုပ်နိုင်မလဲဆိုတာ အမြဲဆွေးနွေးဖြစ်ပါတယ်။ မားကပ်စ်ရဲ့ ခြေစွမ်းက အခုအချိန်အထိ တကယ့်ကို ကောင်းမွန်နေပေမဲ့ ကျွန်တော်တို့ ဒါကို သေချာကိုင်တွယ်ရမှာပါ။ နောက်ရာသီအတွက် ပြင်ဆင်ဖို့က ဒီကိုနဲ့ ကလပ်အသင်းရဲ့ အလုပ်ဖြစ်တာကြောင့် စောင့်ကြည့်ရဦးမှာပါ။ ကျွန်တော်တို့ဆီမှာ အချိန်အများကြီး ရှိပါသေးတယ်။ ရှေ့မှာ လတွေ၊ ရက်တွေ၊ ပတ်တွေ အများကြီး ကျန်နေသေးတာမို့လို့ ဒီအတိုင်းပဲ စောင့်ကြည့်သွားရမှာပါ" လို့ ပြောခဲ့ပါတယ်။