ခရစ္စတယ်ပဲလေ့စ်နဲ့ပွဲစဉ်ကို ကွန်ညာလွဲချော်သွားမယ်လို့ အာမိုရင်အတည်ပြု
မန်ချက်စတာယူနိုက်တက်နည်းပြရူဘင်အာမိုရင်က အသင်းရဲ့တောင်ပံကစားသမား မားသီးယက်စ်ကွန်ညာဟာ ပြီးခဲ့တဲ့တနင်္လာနေ့က အဲဗာတန်နဲ့ပွဲစဉ်ကို လွဲချော်ခဲ့သလို ယခုအခါမှာလည်း ဒဏ်ရာပြဿနာကျန်ရှိနေဆဲဖြစ်လို့ တနင်္ဂနွေနေ့ ခရစ္စတယ်ပဲလေ့စ်နဲ့ပွဲစဉ်မှာလည်း ပါဝင်နိုင်ခြင်းရှိမှာမဟုတ်ကြောင်း အသိပေးပြောကြားလာခဲ့ပါတယ်။
ကွန်ညာဟာ ယခုရာသီမှာယူနိုက်တက်အတွက် ၁၁ ပွဲကစားပြီးချိန်မှာ ၁ ဂိုးသာသွင်းယူထားနိုင်သော်လည်း အသင်းရဲ့တိုက်စစ်အတွက်အလွန်အရေးပါတဲ့စွမ်းဆောင်ရည်တွေကို ပြသထားနိုင်ပြီးဖြစ်ပါတယ်။ တိုက်စစ်မှူး ဘင်ဂျမင်ဆက်စ်ကိုက ဒူးဒဏ်ရာကြောင့်အနားယူနေရချိန် အခုလို ကွန်ညာပါဒဏ်ရာမှပြန်မလာနိုင်သေးတာကြောင့် ယူနိုက်တက်ရဲ့တိုက်စစ်ဟာအတော်လေးအားနည်းနေပြီလို့ ဆိုရမှာဖြစ်ပါတယ်။
တစ်ချိန်တည်းမှာပဲ နောက်ခံလူဟယ်ရီမက်ဂွါရီကလည်း နိုင်ငံတကာပွဲစဉ်တွေမစတင်မီရရှိခဲ့တဲ့ ပေါင်ခြံဒဏ်ရာကြောင့် ဆက်လက်အနားယူနေရဆဲဖြစ်ပါတယ်။ အာမိုရင်က "ဆက်စ်ကိုက အချိန်ယူရပါဦးမယ်။ ဟယ်ရီလည်းအတူတူပါပဲ။ မားသီးယက်စ်ကွန်ညာကလည်း ပဲလေ့စ်နဲ့ပွဲကိုလွဲချော်သွားမှာဖြစ်ပေမယ့် နောက်အပတ်ကြာသပတေးနေ့ ဝက်စ်ဟမ်းနဲ့ပွဲမှာ ပြန်ကစားနိုင်မယ်ထင်ပါတယ်။ ပဲလေ့စ်နဲ့ပွဲကိုတော့ သူလွဲချော်သွားမှာပါ" လို့ပြောကြားခဲ့ပါတယ်။
ဆက်လက်ပြီး အာမိုရင်က အဲဗာတန်ကိုရှုံးနိမ့်ခဲ့ခြင်းမှာ ပွဲကိုထိန်းချုပ်နိုင်စွမ်းမရှိခဲ့လို့ဖြစ်တယ်လို့ ဝန်ခံပြောကြားလာခဲ့ပြီး ခက်ခဲတဲ့ ရက်သတ္တပတ်တစ်ခုဖြစ်တယ်လို့ဆိုပါတယ်။ ပေါ်တူဂီသားနည်းပြက "ဒီပွဲမှာရှုံးနိမ့်ခဲ့လို့ ပြီးခဲ့တဲ့ရာသီက အနိုင်ရဖို့လိုအပ်တဲ့ပွဲတွေလိုဖြစ်ခဲ့ရပါတယ်။ ပြီးခဲ့တဲ့နှစ်က ကျွန်တော်တို့ မနိုင်လို့ ဝေဖန်ခံခဲ့ရပြီး အခုလည်းအတူတူပါပဲ။ ဘာမှဆင်ခြေပေးစရာမရှိပါဘူး။ ပွဲကိုကြည့်မယ်ဆိုရင် ကျွန်တော်တို့နိုင်သင့်တယ်ဆိုတာ သိသာပါတယ်။ ဒါပေမယ့်ပွဲကိုမထိန်းချုပ်နိုင်ခဲ့တာက စိတ်ပျက်စရာပါ။ ဒါက ခက်ခဲတဲ့ရက်သတ္တပတ်တစ်ခုဖြစ်စေခဲ့ပါတယ်။ ဒါပေမယ့် အသင်းရဲ့ပုံစံကိုတော့ဆက်လက်ထိန်းသိမ်းပြီး နောက်ပွဲအတွက်အာရုံစိုက်သွားရပါမယ်" လို့ပြောကြားခဲ့ပါတယ်။
