မက်တွန်မီနေးဟာ သူ့ရဲ့ ငယ်ဘဝကလပ်အတွက် ပွဲပေါင်း ၂၅၀ ကျော် ကစားခဲ့ပြီး ပြီးခဲ့တဲ့ နွေရာသီမှာ ပေါင် ၂၅ သန်းနဲ့ အီတလီကလပ် နာပိုလီကို ပြောင်းရွှေ့ခဲ့ပါတယ်။ စကော့တလန် လက်ရွေးစင်ဟာ ၂၀၁၉-၂၀ နဲ့ ၂၀၂၃-၂၄ ကြား ရာသီတိုင်း အနည်းဆုံး ၃၅ ပွဲ ကစားခဲ့ပြီး ငါးနှစ်ကြာ အိုးထရက်ဖို့ဒ် အသင်းရဲ့ အဓိက ကစားသမားတစ်ဦး ဖြစ်ခဲ့ပါတယ်။

မက်တွန်မီနေးကို PSR အကြောင်းပြချက်တစ်စိတ်တစ်ပိုင်းနဲ့ ရောင်းချခဲ့တာဖြစ်ပြီး အသက် ၂၈ နှစ်အရွယ် ကစားသမားဟာ နာပိုလီအတွက် ခြေစွမ်းပြနေတာကြောင့် ဒီအပြောင်းအရွှေ့ ဆုံးဖြတ်ချက်ဟာ ဒီရာသီမှာ ပိုပြီး သံသယဖြစ်စရာကောင်းလာပါတယ်။

၃၄ ပွဲမှာ ၁၂ ဂိုး သွင်းယူနိုင်ခဲ့တဲ့ မက်တွန်မီနေးဟာ နာပိုလီမှာ ပရိသတ်အကြိုက် ကစားသမားတစ်ဦးအဖြစ် လျင်မြန်စွာ ရောက်ရှိခဲ့ပြီး အန်တိုနီယို ကွန်တီရဲ့အသင်းကို နှစ်ပွဲသာ ကျန်တော့ချိန်မှာ စီးရီးအေရဲ့ ထိပ်ဆုံးကို တက်လှမ်းနိုင်ဖို့ ကူညီပေးခဲ့ပါတယ်။

ချန်ပီယံဖြစ်ဖို့ ရေပန်းစားနေတဲ့ နာပိုလီအတွက် မက်တွန်မီနေးရဲ့ ခြေစွမ်းကြောင့် ယူနိုက်တက်ဟာ သူ့ကို ရောင်းချခဲ့တာ မှားယွင်းတဲ့ ဆုံးဖြတ်ချက်ဖြစ်တယ်လို့ အခိုင်အမာဆိုမှုတွေ ရှိခဲ့ပေမယ့် ကိန်းကတော့ အဲ့ဒီလို မထင်နေတာပါ။ အိုးထရက်ဖို့ဒ် အသင်းခေါင်းဆောင်ဟောင်းကတော့ မက်တွန်မီနေးဟာ ဖရက်ဒ်နဲ့ ပတ်သက်မှုကြောင့် ယူနိုက်တက်မှာ ရှိစဉ်က မတရားသဖြင့် မြင်ခံခဲ့ရတယ်ဆိုတာကိုတော့ အသိအမှတ်ပြုပါတယ်။

မက်ဖရက်ဒ် ကွင်းလယ်အတွဲဟာ ကျယ်ကျယ်ပြန့်ပြန့် ဝေဖန်ခံခဲ့ရပြီး ကိန်းက ဘရာဇီး လက်ရွေးစင် ဖရက်ဒ်ကို အိပ်မက်ပြဇာတ်ရုံမှာ ငါးနှစ်ကြာ ရှိနေစဉ်အတွင်း အထူးသဖြင့် ဝေဖန်ခဲ့ပါတယ်။

"စကော့အတွက် အကူအညီ မဖြစ်ခဲ့တာက သူနဲ့ ဖရက်ဒ် အတူတူ ရှိနေတာပဲ။ ဒါဟာ ကောင်းတဲ့အတွဲ မဟုတ်ပါဘူး" "အိုလီက သူတို့နှစ်ဦးစလုံးကို ချီးကျူးတာကို ကျွန်တော် နားမလည်နိုင်ပါဘူး။ စကော့မှာ တစ်ခုခု ရှိတယ်လို့ ကျွန်တော် အမြဲတမ်း ထင်ခဲ့ပါတယ်"

"သူ့မှာ ဖရက်ဒ်ထက် ပိုကောင်းတဲ့အရာတွေ ရှိခဲ့ပေမယ့် အတွဲအဖြစ်နဲ့တော့ အလုပ်မဖြစ်ခဲ့ဘူး။ ဘာမှ ဖြစ်မလာဘူး ယူနိုက်တက်ဟာ ကွင်းလယ်မှာ ယှဉ်ပြိုင်နိုင်စွမ်း မရှိခဲ့ဘူး" "မက်ဖရက်ဒ် မဟုတ်လား အဲဒါက သူ့ကို နည်းနည်း ခြေစွမ်းကျသွားစေခဲ့ပါတယ်။ သူ့ရဲ့ ကစားဟန်ကို သူ တိုးတက်အောင် လုပ်ခဲ့တာကိုတော့ ချီးကျူးရမယ်။ သူ့မှာ ဂိုးသွင်းနိုင်တဲ့ အရည်အသွေး အမြဲတမ်း ရှိခဲ့ပေမယ့် အခု အဲဒါကို နောက်တစ်ဆင့် တိုးမြှင့်လိုက်ပါပြီ"

"နာပိုလီမှာ သူ ဂိုးတွေ မသွင်းခဲ့ရင် ကျွန်တော်တို့ သူ့အကြောင်း ပြောနေမှာ မဟုတ်ဘူး။ ဒါပေမဲ့ အသင်းကြီးတစ်ခုက ထွက်သွားတဲ့ ကစားသမားတွေအကြောင်း ဆက်ပြောပြီး သူတို့ကို ထိန်းသိမ်းထားသင့်တယ်လို့ ပြောနေလို့ မရဘူး" "လူတိုင်းကို ထိန်းသိမ်းထားလို့ မရဘူး။ မက်တွန်မီနေးဟာ အသင်းမှာ ပါဝင်သင့်တယ်လို့ ၁၀၀% ယုံကြည်ပါတယ်။ ဒါပေမဲ့ ပွဲတိုင်း ကစားရမှာလား။ ယူနိုက်တက်ကို ထိပ်ဆုံးကို ပြန်ရောက်ဖို့ လိုအပ်တဲ့ ကစားသမားတွေအကြောင်း ကျွန်တော် ပြောနေတာပါ"

"သူတို့ ပိုကောင်းတဲ့ ကစားသမားတွေကို မခေါ်ယူခဲ့တာဟာ ကလပ်အသင်းအတွက် ပြဿနာပဲ။ ယူနိုက်တက်ရဲ့ ခေါ်ယူမှုက အရမ်းညံ့ဖျင်းခဲ့တာကြောင့် အရင်က ကစားသမားတွေအကြောင်းကိုတောင် ဆက်ပြောနေရပါတယ်" လို့ ကိန်းက Stick to Football မှာ ပြောကြားခဲ့ပါတယ်။ 

မက်တွန်မီနေးဟာ နာပိုလီမှာ ခြေစွမ်းပြနေသလို ဖရက်ဒ်လည်း ၂၀၂၃ ခုနှစ်မှာ မန်ချက်စတာ ယူနိုက်တက်ကနေ ဖီနာဘာချီကို ပြောင်းရွှေ့ပြီးနောက် အထင်ကြီးစရာကောင်းတဲ့ ခြေစွမ်းကို ပြသခဲ့ပါတယ်။ ယူနိုက်တက် နည်းပြဟောင်း ဆိုလ်ရှားက မက်တွန်မီနေးကို ရောင်းချခဲ့တဲ့ ကလပ်အသင်းရဲ့ ဆုံးဖြတ်ချက်ကို ထပ်ခါထပ်ခါ မေးခွန်းထုတ်ခဲ့ပြီး မကြာသေးခင်က ဒီဆုံးဖြတ်ချက်ဟာ သူ့အတွက် နားမလည်နိုင်စရာ လို့ ပြောကြားခဲ့ပါတယ်။

"စကော့နဲ့ ဖရက်ဒ် အတူတူဆိုရင် သူတို့ဟာ နေ့တိုင်း ၁၀၀ ရာခိုင်နှုန်း အားထုတ်မှုပေးမယ့် ကောင်လေးတွေပါ။  စကော့ကို ဘယ်လိုအတွက်ကြောင့် ရောင်းချနိုင်လဲဆိုတာ ကျွန်တော့်အတွက် နားမလည်နိုင်စရာပါပဲ" လို့ ဆိုလ်ရှားက ပြောကြားခဲ့ပါတယ်။ အိုးထရက်ဖို့ဒ် ဂန္တဝင် ဂျာ့ပ် စတမ်းကလည်း "စကော့ မက်တွန်မီနေးဟာ ပွဲထွက်ကစားသမား အာမခံချက် မရှိပေမယ့် ယူနိုက်တက်မှာ အလွန်အရေးပါတဲ့ သြဇာလွှမ်းမိုးမှု ရှိခဲ့ပါတယ်"

"သူ ဂိုးတွေ သွင်းယူခဲ့ပြီး ကြီးမားတဲ့ သက်ရောက်မှုတွေ ရှိခဲ့ပြီး ဒါတွေဟာ ဘောလုံးကလပ်တစ်ခုအနေနဲ့ ဆုံးရှုံးချင်တဲ့ ကစားသမားတွေ မဟုတ်ပါဘူး" "သူ ထွက်ခွာသွားတာဟာ သူ့အတွက် ကောင်းတဲ့ ခြေလှမ်းတစ်ခု ဖြစ်နိုင်ပါတယ်။ မားကပ် ရက်ရှ်ဖို့ဒ်နဲ့ ပတ်သက်ပြီး အခု ဆွေးနွေးနေသလိုမျိုးပေါ့ ဒါပေမဲ့ သူ ဆက်နေချင်ခဲ့တာလည်း ဖြစ်နိုင်ပါတယ်"

"သူဟာ နာပိုလီအတွက် အလွန်အရေးပါတဲ့ ကစားသမားတစ်ဦးဖြစ်ပြီး ပွဲအများစုမှာ ပွဲထွက်ကစားနေတာကြောင့် သူ့ရဲ့ ယုံကြည်မှု တိုးပွားလာနေပါတယ်။အလုံးစုံအနေနဲ့ သူ့ကို ရောင်းချခဲ့တာဟာ ယူနိုက်တက်အတွက် မှားယွင်းတဲ့ ဆုံးဖြတ်ချက်တစ်ခုလို့ ကျွန်တော်ထင်ပါတယ်" "တစ်ခါတလေ ကလပ်အသင်းအနေနဲ့ ခက်ခဲတဲ့ ဆုံးဖြတ်ချက်တွေ ချရတတ်တာကို ကျွန်တော် နားလည်ပါတယ်။ ဒါပေမဲ့ မက်တွန်မီနေးကို ရောင်းချဖို့ ကျွန်တော် စိတ်မပါပါဘူး" လို့ ပြောပါတယ်။