ဟယ်ရီကိန်းဟာ ဒီရာသီအစမှာ အကောင်းဆုံးခြေစွမ်းတွေပြသနေပြီး ကမ္ဘာ့ဖလားနဲ့ ဘော်လွန်းဒီအော်ဆုကိုရယူဖို့ ရည်မှန်းထားပါတယ်။  အဲဒီလိုခြေစွမ်းတိုးတက်လာရတာကတော့ ပိုပြီးတင်းကျပ်တဲ့ အစားအသောက်ပုံစံနဲ့ နေထိုင်မှုပုံစံကြောင့်ဖြစ်တယ်လို့ ကိန်းကဆိုပါတယ်။ ဘိုင်ယန်မြူးနစ်တိုက်စစ်မှူးဟာ ဘွန်ဒက်စ်လီဂါသမိုင်းမှာ ပထမဆုံး ၆ ပွဲမှာ ၁၁ ဂိုးသွင်းယူနိုင်ခဲ့တဲ့ ကစားသမားတစ်ဦးဖြစ်လာခဲ့ပြီး ဒီရာသီမှာ ကလပ်အသင်းနဲ့ နိုင်ငံအတွက် ၁၉ ဂိုးအထိ သွင်းယူထားပြီးဖြစ်ပါတယ်။ 

အသက် ၃၂ နှစ်အရွယ် ကိန်းက အာဟာရနဲ့ ကျန်းမာရေးပြန်လည်ကောင်းမွန်လာမှုအပေါ် အာရုံစိုက်ခဲ့တာကြောင့် အရင်ကထက်ပိုပြီး ကောင်းမွန်တဲ့အဆင့်ကိုရောက်ရှိလာခဲ့ပြီး ရေခဲမုန့်နဲ့ ပွဲပြီးတိုင်းစားတဲ့ ပီဇာတွေကိုပါ စွန့်လွှတ်ခဲ့တယ်လို့ ပြောပါတယ်။ ကိန်းက"သင့်ရဲ့ကစားသမားဘဝကနေ အတတ်နိုင်ဆုံးယူရပါမယ်။ အာဟာရ၊ ပြန်လည်နာလန်ထူမှုနဲ့ အားကစားခန်းမမှာ လေ့ကျင့်တာတွေနဲ့ပတ်သက်ပြီး ကျွန်တော် ဒီနှစ်မှာ ပိုပြီးတိုးမြှင့်လိုက်ပါတယ်။ အသေးအဖွဲအချက်လေးတွေပါ၊ ဒါပေမဲ့ အမြင့်ဆုံးအဆင့်မှာ ၀.၅% (သို့) ၁% လောက်ပြောင်းလဲတာက ကြီးမားတဲ့ကွာခြားမှုတစ်ခုကို ဖြစ်စေနိုင်ပါတယ်"လို့ ကိန်းကပြောပါတယ်။

အင်္ဂလန်အသင်းရဲ့ ဝေးလ်နဲ့ လတ်ဗီးယားအသင်းတို့နဲ့ ကစားမယ့်ပွဲစဉ်တွေအတွက် ပြင်ဆင်နေတဲ့ ကိန်းက အရေးကြီးတဲ့လတွေက ရှေ့မှာရှိနေသေးတယ်လို့ ယုံကြည်ပါတယ်။ "အရေးကြီးဆုံးလတွေကတော့ ရာသီရဲ့နောက်ဆုံးအဆင့်တွေဖြစ်တဲ့ ဖေဖော်ဝါရီကနေ မေလနဲ့ ရှင်းရှင်းလင်းလင်းပြောရရင် ကမ္ဘာ့ဖလားပါပဲ။ အဲဒီအချိန်တွေမှာ အကောင်းဆုံးအခြေအနေရောက်အောင် ကျွန်တော်သေချာစေချင်ပါတယ်"လို့ ကိန်းကပြောပါတယ်။

သူရဲ့အံ့မခန်းခြေစွမ်းတွေရှိနေပေမဲ့ ဟာလန်းနဲ့ အမ်ဘာပေတို့လို ထိပ်တန်းကစားသမားတွေနဲ့ ဂိုးသွင်းအများဆုံးပြိုင်ဆိုင်ရမယ်ဆိုတာကို ကိန်းကသိထားပါတယ်။ ကိန်းက"ဘော်လွန်းဒီအော်ဆုကို ရရှိချင်ပါတယ်။ အဲဒါက အခြေခံအားဖြင့် အသင်းဆုဖလားတစ်ခုဖြစ်ပြီး အဲဒီအသင်းက အကောင်းဆုံးကစားသမားကရရှိတာဖြစ်ပါတယ်၊ ဒါကြောင့် ဒီတစ်ခါမှာ ချန်ပီယံလိဂ်အနိုင်ရရှိတဲ့သူ ဒါမှမဟုတ် ကမ္ဘာ့ဖလားအနိုင်ရရှိတဲ့သူဖြစ်လာမှာပါ"လို့ ပြောခဲ့ပါတယ်။