ဒိန်းမတ်လက်ရွေးစင်တိုက်စစ်မှူး ရက်စ်မွတ်စ်ဟွိုက်လန်းဟာ သောကြာနေ့နံနက်က ပေါ်တူဂီကို ၁-၀ နဲ့အနိုင်ရခဲ့တဲ့ ယူအီးအက်ဖ်အေနေရှင်းလိဂ် ပထမအကျော့ပွဲစဉ်မှာ အသင်းအတွက် တစ်လုံးတည်းသောအနိုင်ဂိုးကို သွင်းယူခဲ့ပြီးနောက် ပေါ်တူဂီစူပါစတား ခရစ္စတီယာနိုရော်နယ်ဒိုရဲ့ အောင်ပွဲခံပုံစံကို အတုခိုးပြီး အောင်ပွဲခံခဲ့ပါတယ်။ ယခုအခါမှာတော့ ကစားသမားက ရော်နယ်ဒိုလိုအောင်ပွဲခံခဲ့ခြင်းရဲ့ နောက်ကွယ်ကအကြောင်းအရင်းကို ရှင်းပြပြောဆိုလာခဲ့ပါတယ်။ 

ယခုပွဲစဉ်မှာ ဟွိုက်လန်းဟာ ဒုတိယပိုင်း ၆၉ မိနစ်ရောက်မှ လူစားဝင်ကစားသမားအဖြစ်ကွင်းထဲသို့ဝင်ရောက်လာခဲ့တာဖြစ်ပြီး ၁၂ မိနစ်အကြာမှာပဲ အရေးပါတဲ့အနိုင်ဂိုးကို သွင်းယူပေးခဲ့တာဖြစ်ပါတယ်။ ဂိုးသွင်းယူပြီးနောက်မှာ ယူနိုက်တက်ကြယ်ပွင့်ဟာ သူ့ရဲ့အောင်ပွဲခံပုံစံအတိုင်း အောင်ပွဲမခံခဲ့ဘဲ ရော်နယ်ဒိုလိုမျိုး အောင်ပွဲခံခဲ့ပါတယ်။ 

ပွဲအပြီးမှာ ရော်နယ်ဒိုလို အောင်ပွဲခံခဲ့တဲ့ နောက်ကွယ်ကအကြောင်းအရင်းကို အသက်-၂၂ နှစ်အရွယ်ကစားသမားက "ကျွန်တော်အခုပြောမှာတွေက ချဲ့ကားပြီးပြောတာတွေတစ်ခုမှမပါပါဘူး။ ရော်နယ်ဒိုက ကျွန်တော့်အတွက်အရာရာပါပဲ။ကျွန်တော်ဘောလုံးကိုချစ်မြတ်နိုးလာတာ ရော်နယ်ဒိုကြောင့်ပါ။ မန်ချက်စတာယူနိုက်တက်ပရိသတ်ဖြစ်ခဲ့တာကလည်း ရော်နယ်ဒိုကြောင့်ပါပဲ။ ရော်နယ်ဒိုကြောင့်ပဲ ကျွန်တော်တစ်ကိုယ်တော်လေ့ကျင့်ရေးဆင်းခဲ့ပြီး လေ့ကျင့်ခန်းတွေပုံမှန်ပြုလုပ်ခဲ့ပါတယ်။ ကျွန်တော်ကိုယ်တိုင်က ရော်နယ်ဒိုဖြစ်ချင်ခဲ့ပါတယ်" လို့ပြောကြားခဲ့ပါတယ်။ 

၂၀၂၃ ခုနှစ်နွေရာသီမှာ အတ္တလန္တာမှထွက်ခွာပြီး ယူနိုက်တက်သို့ ပေါင် ၇၂ သန်းနဲ့ပြောင်းရွှေ့ခဲ့တဲ့ ဟွိုက်လန်းက သူ့ရဲ့အဖေဟာ သူ့ကို ရော်နယ်ဒိုကိုအတုယူဖို့ အကြံပေးခဲ့တယ်လို့ဆိုပါတယ်။ ဆက်လက်ပြီး ဒိန်းမတ်ကြယ်ပွင့်က "ကျွန်တော်သိပ်မငယ်တော့တဲ့အချိန်မှာ အဖေက ကျွန်တော့်ကို ရော်နယ်ဒိုနဲ့မိတ်ဆက်ပေးခဲ့ပါတယ်။ ပြီးတော့ ရော်နယ်ဒိုရဲ့စိတ်ဓာတ်ကို စံထားဖို့အတွက်လည်း ပြောခဲ့ပါတယ်။ ရော်နယ်ဒိုက သူ့ရဲ့စိတ်ဓာတ်ကြံ့ခိုင်မှုကြောင့် အခုလို ကမ္ဘာ့အကောင်းဆုံးကစားသမားဖြစ်နေတာပါ။ သူ့မှာပါရမီရှိသလို၊ အလုပ်လည်းအရမ်းကြိုးစားခဲ့ပါတယ်။ ကျွန်တော်ယူနိုက်တက်ကစားသမားဟောင်းတွေနဲ့ အင်တာဗျူးပြုလုပ်ချိန်တိုင်းရော်နယ်ဒိုအကြောင်းကိုမေးခဲ့ပါတယ်။ သူတို့က ရော်နယ်ဒိုအခုလိုအောင်မြင်နေတာ အရမ်းကြိုးစားလို့ဖြစ်တယ်လို့ပြောကြပါတယ်" လို့ပြောကြားခဲ့ပါတယ်။ 

လာမယ့်မတ်လ ၂၄ ရက်နေ့မှာတော့ ဒိန်းမတ်ဟာ နေရှင်းလိဂ်ကွာတားဖိုင်နယ်ဒုတိယအကျော့ပွဲစဉ်အဖြစ် ပေါ်တူဂီကို အဝေးကွင်းမှာသွားရောက်ရင်ဆိုင်ရမှာဖြစ်ပြီး ဒီတစ်ခေါက်မှာလည်း ဟွိုက်လန်းအနေနဲ့ ရော်နယ်ဒိုလို နောက်ထပ်တစ်ကြိမ်အောင်ပွဲခံသွားနိုင်ဦးမလား စောင့်ကြည့်ရပါမယ်။