အာဆင်နယ်အသင်းနည်းပြ မီကယ်လ်အာတီတာက ဒဏ်ရာရကစားသမား အရေအတွက်များပြားနေတာကို အလွန်အံ့အားသင့်မိတယ်လို့ ဝန်ခံခဲ့ပေမယ့် ပီအက်စ်ဂျီနဲ့ ချန်ပီယံလိဂ် ဒုတိယအကျော့ပွဲစဉ်မတိုင်ခင် အသင်းရဲ့ တုံ့ပြန်မှုကြောင့် ပျော်ရွှင်မှုကို ခံစားရတယ်လို့ ထုတ်ဖော်ပြောကြားခဲ့ပါတယ်။

ဘုန်းမောက်အသင်းနဲ့ ပရီးမီးယားလိဂ်ပွဲစဉ်မတိုင်ခင် ပြောကြားရာမှာ အာတီတာက အသင်းရဲ့ဒဏ်ရာအခြေအနေ ဘယ်လောက်ဆိုးရွားလဲဆိုတာကို တကယ်သိလိုက်ရတဲ့အချိန်ကို ပြန်ပြောပြခဲ့ပါတယ်။ အာတီတာက"PSG နဲ့ အိမ်ကွင်းပွဲစဉ်မတိုင်ခင်လေးမှာ ကျွန်တော် အရမ်းအံ့သြခဲ့ပါတယ်။ ဘာလို့လဲဆိုတော့ အဝတ်လဲခန်းထဲ လမ်းလျှောက်ဝင်သွားတဲ့အချိန်မှာ သူတို့အားလုံး တစ်စုတစ်စည်းတည်းထိုင်နေကြတာကို တွေ့လိုက်ရလို့ပါ" လို့ သတင်းထောက်တွေကိုပြောပြခဲ့ပြီး ပထမအသင်းလူစာရင်းရဲ့ အတော်များများဖြစ်တဲ့ တိုမီယာစု၊ ကာလာဖီအိုရီ၊ ဂါဘရီယယ်မာဂယ်ဟေးစ်၊ ပါတေး၊ ဟာဗက်ဇ်၊ ဂျီးဆပ်စ်နဲ့ ဂျော်ဂျင်ဟိုတို့ကို ရည်ညွှန်းပြောဆိုခဲ့ပါတယ်။ "ကျွန်တော်ပြောလိုက်ပါတယ်၊ ဒါက အသင်းရဲ့ ပွဲထွက်လူစာရင်းပါပဲ။ သူတို့ကို ကျွန်တော်တို့ အသုံးပြုလို့မရဘူး" လို့ ပြောကြားခဲ့ပါတယ်။

အစပိုင်းမှာ အံ့သြခဲ့ပေမယ့် အာတီတာက သူ့အသင်းရဲ့ ခံနိုင်ရည်အားကို အလွန်ဂုဏ်ယူမိတယ်လို့ ဆိုပါတယ်။ မိုင်းလ်စ် လူးဝစ်-စကယ်လီနဲ့ အီသန်ဝမ်နရီလို လူငယ်ကစားသမားတွေ ပေါ်ထွက်လာတာအပြင် ဒီခက်ခဲတဲ့ကာလမှာ ကီဝီအော နဲ့ မီရီနိုလို အသင်းသားတွေရဲ့ ကြိုးစားအားထုတ်မှုတွေကိုလည်း မီးမောင်းထိုးပြခဲ့ပါတယ်။

အာတီတာက"ကျွန်တော်တို့ သူတို့ကို လအတော်ကြာကြာ အသုံးမပြုခဲ့ရပါဘူး။ ပြီးတော့ အသင်းနဲ့ပတ်သက်ပြီး သူတို့လုပ်နေတာတွေ၊ သူတို့ကြိုးစားနေတာတွေနဲ့ပတ်သက်ပြီး ကျွန်တော် ပျော်ရွှင်မှုကို ခံစားခဲ့ရပါတယ်၊ အထဲမှာ ဘယ်သူမှ ဒီအကြောင်းမပြောကြပါဘူး။ ဒါပေမဲ့ ဒါက ဖြစ်နေတာပါပဲ၊ ဒီလိုအခြေအနေတွေမှာ ကစားသမားတွေ၊ ဝန်ထမ်းတွေနဲ့ ကလပ်အသင်းက ဘယ်လိုတုံ့ပြန်ကြလဲဆိုတာကို ကျွန်တော် ဂုဏ်ယူမိပါတယ်"လို့ ဆိုပါတယ်။ အာဆင်နယ်အသင်းဟာ ယနေ့ည ဘုန်းမောက်နဲ့ပွဲစဉ်အပြီး လာမယ့် ဗုဒ္ဓဟူးညမှာ ကစားမယ့် ပီအက်စ်ဂျီနဲ့ပွဲစဉ်မှာ comeback ပြန်လာနိုင်ဖို့ မျှော်လင့်နေပါတယ်။