မနေ့ညပိုင်း၊ Gtech Community ကွင်းမှာ ဘရန့်ဖို့ဒ်ကိုအနိုင်ယူခဲ့တဲ့ ပွဲစဉ်ရဲ့ပထမပိုင်းပွဲချိန်အတွင်း ဒဏ်ရာရရှိသွားတဲ့ ရိုဒရီကို ရက်သတ္တပတ် နှစ်ပတ်(သို့မဟုတ်)သုံးပတ်ထက် ပိုကြာအောင် အနားယူသွားရဖို့ မရှိဘူးလို့ မန်စီးတီးနည်းပြပက်ဂွါဒီယိုလာက မျှော်လင့်နေပါတယ်။
ပြင်းထန်းဒူးအရွတ်စုတ်ပြဲဒဏ်ရာကြောင့် ယမန်နှစ်ဘောလုံးရာသီတစ်ခုလုံးနီးပါး လွဲချော်ခဲ့တဲ့ ရိုဒရီက မနေ့ညပိုင်းပွဲစဉ်ရဲ့ပွဲချိန်မိနစ် ၂၀ မှာတင် ဒဏ်ရာပြဿနာတစ်ခုနဲ့ ရင်ဆိုင်လိုက်ရပါတယ်။
ဒါကြောင့် စပိန်လက်ရွေးစင်ကွင်းလယ်ကစားသမားရဲ့နေရာမှာ နီကိုဂွန်ဇာလက်ဇ်ကို အစားထိုးခဲ့ပါတယ်။
ပက်ဂွါဒီယိုလာက “ ကြွက်သားနဲ့ဆိုင်တဲ့ပြဿနာတစ်ခု ဖြစ်ပါတယ်။ ရိုဒရီဆိုတာ ကျွန်တော်တို့အတွက် အရေးကြီးတဲ့ကစားသမားဖြစ်လို့ သူ့ကို မဆုံးရှုံးချင်ပါဘူး။
ကျွန်တော်တို့တွေ သူ့ကိုထိန်းသိမ်းထားနိုင်ဖို့ ကြိုးစားခဲ့ပါတယ်။ ဒါပေမဲ့ ဖြစ်ပြီးတဲ့အရာတွေလည်း ဖြစ်ပြီးသွားပါပြီ”လို့ ပြောပါတယ်။
စပိန်သားလက်ရွေးစင်ကစားသမားက ၂၀၂၃-၂၀၂၄ ဘောလုံးရာသီနောက်ပိုင်း ၁၅ ပွဲမျှသာ ပါဝင်ကစားနိုင်ပြီး ဒူးနာကျင်မှုကြောင့် လွန်ခဲ့တဲ့သီတင်းပတ်၊ ဘန်လေနဲ့ရင်ဆိုင်ရတဲ့ ပရီးမီးယားလိဂ်နိုင်ပွဲကိုလည်း လွဲချော်ခဲ့ပါတယ်။
Sky Sports နဲ့တွေ့ဆုံချိန် ရိုဒရီက “ တံကောက်ကြောမှာ အနည်းငယ်ခံစားရပေမဲ့ အရမ်းကြီးဆိုးရွားနေတာမျိုး မဟုတ်လောက်ဘူးလို့ ထင်ရပါတယ်။
ယူရိုဗိုလ်လုပွဲမှာ ဖြစ်ခဲ့တဲ့ပုံစံမျိုးလိုပဲ ကျွန်တော့်ရဲ့ခြေထောက်တွေ အနည်းငယ်ဆန့်တန်းနေခဲ့ပါတယ်။ ဒါပေမဲ့အရေးအကြီးဆုံးအရာကတော့ ကြီးကြီးမားမားပြဿနာတစ်ရပ် မဖြစ်ခဲ့တာပါပဲ”လို့ ပြောပါတယ်။
ချန်ပီယံလိဂ်ပြိုင်ပွဲမှာ မိုနာကိုနဲ့တစ်ဖက်နှစ်ဂိုးစီသရေကျခဲ့တဲ့ပွဲစဉ်အတွင်း ၂၀၂၄ ဘော်လွန်းဒီအော်ဆုရှင်ကို ပွဲကစားချိန်တစ်နာရီသာ ပေးအပ်ခဲ့ပြီးနောက် သောကြာနေ့ပွဲကြိုသတင်းစာရှင်းလင်းပွဲအတွင်း အသက်-၂၉ နှစ်အရွယ်ကစားသမားရဲ့ကြံ့ခိုင်မှုပိုင်းနဲ့ပတ်သက်တဲ့ မေးခွန်းတွေ ပက်ဂွါဒီယိုလာဆီ ရောက်ရှိလာဖူးပါတယ်။
ပက်ဂွါဒီယိုလာကတော့ စပိန်လက်ရွေးစင်ရဲ့တနင်္ဂနွေနေ့အခြေအနေတွေကြောင့် ပြင်သစ်မြေမှာ ပွဲကစားချိန် တစ်နာရီသာပေးအပ်ခဲ့တဲ့ သူ့ရဲ့ဆုံးဖြတ်ချက် မှန်ကန်တယ်ဆိုတာ သက်သေပြသွားတယ်လို့ တုံ့ပြန်ခဲ့ပါတယ်။
Sky Sports နဲ့တွေ့ဆုံချိန် ဘာစီလိုနာနည်းပြဟောင်းက “ ကျွန်တော့်ရဲ့ဆုံးဖြတ်ချက် မှန်လား၊ မမှန်ဘူးလား? လူတွေကတော့ ရိုဒရီကို ဘာလို့ပွဲချိန်ပြည့်မသုံးတာလဲဆိုပြီး မေးမြန်းနေကြတာပါပဲ။ သတင်းထောက်တွေဆိုရင် ကျွန်တော့်ဆီ ဘာလို့လူစားလဲပစ်တာလဲဆိုပြီး ခဏခဏမေးကြပါတယ်။
အခုလိုအကြောင်းအရင်းတွေကြောင့်သာ ကျွန်တော်တို့က သူ့အတွက် ပွဲကစားချိန်တစ်နာရီလောက်သာပေးပြီး ထိန်းထိန်းသိမ်းသိမ်းအသုံးပြုဖို့ ကြိုးစားခဲ့ရခြင်း ဖြစ်ပါတယ်”လို့ ပြောပါတယ်။
မနေ့ညပိုင်း၊ ဘရန့်ဖို့ဒ်ကို ဟာလန်းရဲ့တစ်လုံးတည်းသောဂိုးဖြင့် အနိုင်ယူပြီးနောက် ပက်ဂွါဒီယိုလာက သူ့ရဲ့ပရီးမီးယားလိဂ်နည်းပြဘဝမှာ နိုင်ပွဲ ၂၅၀ ပြည့်မြောက်သွားခဲ့ပါတယ်။