ပရီးမီးယားလိဂ်ချန်ပီယံပြေးလမ်းထက် အကြိတ်အနယ်ယှဉ်ပြိုင်ပြီးနောက် လီဗာပူးနဲ့ အာဆင်နယ်တို့က လာမယ့်ဘောလုံးရာသီကြိုကာလမှာ အာရှဒေသဘက်ဆီထွက်ခွာမယ့် ခရီးစဉ်အကြောင်းကို အသီးသီးထုတ်ပြန်ကြေညာခဲ့ပါတယ်။

ပရီးမီးယားလိဂ်အမှတ်ပေးဇယားဦးဆောင်သူတွေက ၂၀၁၇ ခုနှစ်နောက်ပိုင်း၊ ပထမဆုံးအကြိမ်အဖြစ် ဟောင်ကောင်ဒေသဆီ ရောက်ရှိလာပြီး စီးရီးအေဘီလူးကြီး အေစီမီလန်နဲ့ Kai Tak Stadium မှာ ခြေစမ်းပွဲကစားသွားပါမယ်။ ဒီနောက်မှာ ကြိုးကြာနီတွေက ဂျပန်နိုင်ငံဆီ ပထမဆုံးနွေရာသီအလည်အပတ်ခရီးစဉ်နဲ့အတူ တရုတ်နိုင်ငံဆီ ခရီးဆက်ကြပါလိမ့်မယ်။ လီဗာပူးအသင်းစီးပွားရေးဆိုင်ရာအရာရှိချုပ်ဘန်လက်တီက အာရှပရိသတ်တွေ အထူးကြိုက်နှစ်သက်မယ့် ရာသီကြိုခရီးစဉ်အကြောင်း ဆွေးနွေးခဲ့ပါတယ်။

ဘန်လက်တီက “ အခုနွေရာသီ၊ ရာသီကြိုခရီးစဉ်အတွက် အာရှဒေသဆီ တဖန်ပြန်လည်ရောက်ရှိလာမှာဖြစ်လို့ ကျွန်တော်တို့ အလွန်စိတ်လှုပ်ရှားမိပါတယ်။အေစီမီလန်နဲ့ရင်ဆိုင်ရမယ့် Standard Chartered Trophy ပွဲစဉ်ကို စီစဉ်ပေးထားလို့ ကျွန်တော်တို့ရဲ့အထူးစပါယ်ရှယ်လုပ်ဖော်ကိုင်ဖက်ကြီးဖြစ်တဲ့ Standard Chartered ဘဏ်ကိုလည်း အထူးကျေးဇူးတင်မိပါတယ်။ လွန်ခဲ့တဲ့နှစ် ၂၀၊ အစ္စတန်ဘူလ်မှော်ဝင်ညကိုလည်း အမှတ်ရမိပါတယ်။ သန်းရာချီရှိတဲ့ အာရှဒေသပရိသတ်တွေဆီ သူတို့ချစ်တဲ့ကလပ်အသင်းနဲ့ ပိုနီးစပ်အောင် စီမံပေးနိုင်မယ်လို့ မျှော်လင့်မိပါတယ်”လို့ ပြောပါတယ်။

အလားတူ အာဆင်နယ်ကလည်း လန်ဒန်မြေပြင်ပမှာ ပထမဆုံးအကြိမ်ယှဉ်ပြိုင်မယ့် မြောက်လန်ဒန်ဒါဘီအဖြစ် ဟောင်ကောင်မှာ တော့တင်ဟမ်နဲ့ ရင်ဆိုင်ကစားသွားမယ်လို့ ကြေညာခဲ့ပါတယ်။ ဒီပွဲစဉ်ကို New Kai Tak Stadium မှာ ကျင်းပသွားပါမယ်။ ဂန်းနားတွေရဲ့ဘဏ္ဍာရေးဆိုင်ရာအရာရှိရိုင်ယန်နော်ရီးစ်ကတော့ ကမ္ဘာမြေတဖက်ခြမ်းမှာရှိတဲ့ ပရိသတ်တွေနဲ့ တွေ့ဆုံခွင့်ရရှိဖို့ ကလပ်အသင်းအနေဖြင့် မစောင့်ဆိုင်းနိုင်တော့ဘူးလို့ ပြောပါတယ်။

နော်ရီးစ်က “ အင်္ဂလိပ်ဘောလုံးလောကမှာ မြောက်လန်ဒန်ဒါဘီထက် ကြီးကျယ်ခမ်းနားတဲ့အရာ အနည်းငယ်သာ ရှိပါတယ်။ ဟောင်ကောင်မှာ ဒီပွဲစဉ်ကိုကစားရခြင်းက အာရှဒေသတဝန်းမှာရှိတဲ့ ကျွန်တော်တို့ရဲ့ပရိသတ်တွေအတွက် ကြီးမားတဲ့အခိုက်အတန့်တစ်ခု ဖြစ်လာပါလိမ့်မယ်။ ဒါ့အပြင် ရာသီသစ်မတိုင်ခင် အသင်းရဲ့ပြင်ဆင်နေမှုတွေကိုလည်း ပရိသတ်တွေ သိရှိသွားနိုင်ပါမယ်။

ခရီးစဉ်ရဲ့အစဉ်အလာအတိုင်း ကလပ်အသင်းရောက်ရှိလာချိန်မှာ ခြေစမ်းပွဲကစားဖို့ဆိုတာထက် ပရဟိတလုပ်ငန်းတွေကို ပံ့ပိုးကူညီဖို့၊ ဒေသဆိုင်ရာရိုးရာယဉ်ကျေးမှုတွေကို ဂုဏ်ပြုပေးဖို့၊ လူငယ်တွေအတွက် ဘောလုံးဆိုင်ရာသင်ခန်းစာတွေ စီမံပေးဖို့အပြင် ကလပ်အသင်းပရိသတ်တွေနဲ့ပါ ပိုမိုထိတွေ့ဆက်ဆံသွားပါမယ်။ ဒီလိုလှပတဲ့ဒေသဆီ နောက်တစ်ကြိမ်သွားလည်ဖို့အတွက် မစောင့်ဆိုင်းနိုင်တော့ပါဘူး”လို့ ပြောပါတယ်။