အာဆင်နယ်နည်းပြ အာတီတာက လာမယ့်အပတ်မှာကန်မယ့် ရီးရဲလ်အသင်းနဲ့ချန်ပီယံလိဂ်ပွဲမတိုင်ခင် တင်းဘား နဲ့ ဂါဘရီရယ်တို့အခြေအနေကို စိုးရိမ်မိတယ်လို့ ပြောကြားလိုက်ပါတယ်။ ဖူလ်ဟမ်ကို ၂-၁ နဲ့အနိုင်ရခဲ့တဲ့ပွဲမှာ အာဆင်နယ်ရဲ့အဓိကကစားသမား ၂ ဦးဒဏ်ရာရရှိခဲ့တာဖြစ်ပါတယ်။ ပထမပိုင်း ၁၅ မိနစ်မှာတင် ဂါဘရီရယ်တစ်ယောက် တံကောက်ကြောဒဏ်ရာရရှိခဲ့တာဖြစ်ပါတယ်။

ဘရာဇီးသားဟာ ဆေးကုသမှုခံယူပြီးနောက် ဆက်မကစားနိုင်တာကြောင့် ခီဗီယောနဲ့ လူစားလဲခဲ့ရပါတယ်။ တင်းဘားကလည်း ဒုတိယပိုင်းမှာ ဒဏ်ရာရရှိခဲ့ပြီး ဆာကာ နဲ့ လူစားလဲ့ရပါတယ်။ နယ်သာလန်သားဟာ ဆက်ကစားနိုင်ခြေရှိခဲ့ပေမယ့် အာတီတာက အရဲမစွန့်လိုတာကြောင့် ထရိုဆက်နဲ့ လူစားလဲခဲ့ရပါတယ်။

တင်းဘားတစ်ယောက် ပြီးခဲ့တဲ့အပတ်တုန်းကလည်း အဖျားဝေဒနာကြောင့် နိုင်ငံအသင်းကနေလည်း နုတ်ထွက်ခဲ့ပါတယ်။ အာဆင်နယ်ဟာ လာမယ့်အပတ်မှာ ချန်ပီယံလိဂ်ပထမအကျော့အဖြစ် ဘာနေဗျူးကိုသွားကန်ရမှာဖြစ်ပြီး အခုတော့ တင်းဘား နဲ့ ဂါဘရီရယ်တို့အခြေအနေက မသေချာသေးတာဖြစ်ပါတယ်။

“ဂါဘရီရယ် နဲ့ တင်းဘားအခြေအနေက မသိရသေးပါဘူး။ ကျွန်တော်တို့ မနက်ဖြန်မှာ အခြေအနေစစ်ဆေးပါမယ်။ ဂါဘရီရယ်က တံကောက်ကြောဒဏ်ရာရခဲ့တာပါ။ ဘယ်လောက်ကြီးမားလဲဆိုတာ မသိသေးပါဘူး။ တင်းဘားကလည်း အစောပိုင်းကတည်းက ရုန်းကန်နေရတာပါ။ သူဆက်မကစားနိုင်ခဲ့ပါဘူး”လို့ အာတီတာက ပြောကြားခဲ့ပါတယ်။

ဘင်ဝှိုက်က ဖူလ်ဟမ်နဲ့ပွဲအတွက် အာဆင်နယ်အသင်းလူစာရင်းထဲမှာ မပါဝင်လာခဲ့ပဲ အသေးစားဒဏ်ရာရရှိနေခဲ့တာလို့ အာတီတာက ထုတ်ဖော်ပြောကြားခဲ့ပါတယ်။ ကာလာဖီအိုရီကလည်း ဒူးဒဏ်ရာအခြေအနေရှိနေတာဖြစ်ပြီး နောက်တန်းမှာ ဆာလီဘာ ၊ ခီဗီယော ၊ ဇင်ချန်ကို နဲ့ တီယာနေးတို့သာရှိနေသလို ညာနောက်ခံလူအဖြစ် ပါတေးကိုရွေးချယ်စရာရှိနေပါတယ်။