နယ်သာလန်ကွင်းလယ်လူ ကွင်တင်တင်းဘားဟာ လေ့ကျင့်ရေးအစီအစဉ်အတွင်း ဒဏ်ရာရရှိခဲ့တာကြောင့် စနေနေ့မှာကစားမယ့် ဆွီဒင်နဲ့ ကမ္ဘာ့ဖလားအုပ်စု (F) ပွဲစဉ်ကို လွဲချော်တော့မှာဖြစ်တယ်လို့ အသင်းက ကြာသပတေးနေ့မှာ အတည်ပြုပြောကြားခဲ့ပါတယ်။

အသက် ၂၅ နှစ်အရွယ် တင်းဘားဟာ ကြာသပတေးနေ့ လေ့ကျင့်ရေးမှာ တိုက်မိမှုတစ်ခုဖြစ်ပွားခဲ့ပြီးနောက် အနည်းငယ် ဦးခေါင်းထိခိုက်မှု (Mild Concussion) ရရှိခဲ့တာဖြစ်တယ်လို့ နိုင်ငံလက်ရွေးစင်အသင်း တာဝန်ရှိသူတွေက အတည်ပြုခဲ့ပါတယ်။

အဆိုပါဖြစ်ရပ်ဖြစ်ပွားပြီးနောက် ဆေးဘက်ဆိုင်ရာအဖွဲ့က ကစားသမားရဲ့အခြေအနေကို ချက်ချင်းစောင့်ကြည့်စစ်ဆေးခဲ့ပြီး ပွဲထွက်လူစာရင်းအတွက် ရွေးချယ်နိုင်မှာမဟုတ်ဘူးလို့ ဆုံးဖြတ်ခဲ့ကြတာပါ။

"ကွင်တင် ဘောလုံးရလိုက်တဲ့အချိန်မှာ ကျွန်တော်က အရှေ့ကို ပြေးတက်သွားတာပါ။ သူက ကျွန်တော့်ဆီကို ဘောလုံးမတင်ပေးဖို့ ကြိုးစားရင်းနဲ့ အခုလိုဖြစ်သွားတာပါ။ ကျွန်တော်နားလည်သလောက်တော့ ဒါဟာ အရမ်းပြင်းထန်တဲ့ တိုက်မိမှုမျိုးမဟုတ်ပေမဲ့ ဂရုစိုက်ဖို့တော့ လိုအပ်ပါတယ်" လို့ အသင်းဖော် တန်ကွပ်မိန်းနားက နယ်သာလန်မီဒီယာတွေကို ပြောကြားခဲ့ပါတယ်။

ပြီးခဲ့တဲ့ ဗုဒ္ဓဟူးနေ့ကမှ အသက် ၂၅ နှစ်ပြည့် မွေးနေ့ကို ကျင်းပခဲ့တဲ့ တင်ဘာဟာ ဂျပန်နဲ့ ၂ ဂိုးစီ သရေကျခဲ့တဲ့ နယ်သာလန်ရဲ့ အဖွင့်ပွဲစဉ်မှာ လူစားဝင်ကစားသမားအဖြစ် ပါဝင်ခဲ့သူလည်း ဖြစ်ပါတယ်။ သူ့ရဲ့အမွှာညီအစ်ကိုဖြစ်သူ ဂျူရီယန်တင်းဘားကလည်း ပေါင်ခြံဒဏ်ရာကြောင့် ဒီပြိုင်ပွဲကို လွဲချော်ဖို့ အရင်ကတည်းက သေချာနေခဲ့တာပါ။

ချန်ပီယံလိဂ်ဗိုလ်လုပွဲမှာ အာဆင်နယ်အသင်းက ပီအက်စ်ဂျီကို ရှုံးနိမ့်ခဲ့ပြီးနောက်ပိုင်းမှ နယ်သာလန်အသင်းရဲ့ ပြင်ဆင်မှုတွေမှာ နောက်ကျပြီးမှ ပူးပေါင်းနိုင်ခဲ့တဲ့ အဆိုပါနောက်ခံလူဟာ နယူးယောက်မှာကစားခဲ့တဲ့ ဥဇဘက်ကစ္စတန်နဲ့ ခြေစမ်းပွဲမတိုင်ခင်လေးမှာတင် လူစာရင်းကနေ နုတ်ထွက်ခဲ့ရတာ ဖြစ်ပါတယ်။