ဝါရင့်နည်းပြကြီးမော်ရင်ဟိုက ဖီနာဘာချီနည်းပြသစ်အဖြစ် တာဝန်ယူဖို့ နီးစပ်နေပြီလို့ အတည်ပြုပေးခဲ့ပေမယ့် တူရကီပြည်တွင်းကလပ်အတွက် လာမယ့်ရာသီချန်ပီယံလိဂ်ပြိုင်ပွဲဝင်ခွင့်ရရှိဖို့ အလွန်ခက်ခဲလိမ့်မယ်လို့ ဝန်ခံပြောဆိုလိုက်ပါတယ်။

ပြီးခဲ့တဲ့ဇန်နဝါရီလအတွင်း ရိုးမားနည်းပြရာထူးမှ ထုတ်ပယ်ခံရပြီးနောက် မော်ရင်ဟိုက အခုနွေရာသီကာလအတွင်း ဘောလုံးလောကဆီ ပြန်လာမယ်လို့ အတိအလင်းပြောကြားခဲ့ဖူးပါတယ်။

ချဲလ်ဆီး၊ မန်ချက်စတာယူနိုက်တက်နဲ့ တော့တင်ဟမ်နည်းပြဟောင်းအတွက် ဆော်ဒီပရိုလိဂ်တန်းတက် အယ်လ်ကွာဒီစီယက်အသင်းရဲ့ မက်လောက်စရာကမ်းလှမ်းမှုတစ်ခုလည်း ရှိထားခဲ့ဖူးပါတယ်။

ဒါပေမယ့် လက်ရှိအချိန်မှာတော့ မော်ရင်ဟိုက တူရကီမြေမှာပဲ ဖီနာဘာချီနဲ့ အလုပ်ဆက်လုပ်ဖို့ နီးစပ်လာနေပါပြီ။ ဖီနာဘာချီအသင်းက ပြည်တွင်းလိဂ်ချန်ပီယံဂါလာတာစာရေးရဲ့နောက် သုံးမှတ်အကွာဖြင့် အခုဘောလုံးရာသီကို ပိတ်သိမ်းခဲ့ပါတယ်။ဖီနာဘာချီနဲ့ အပြောင်းအရွှေ့အကြောင်း မေးမြန်းလာချိန် မော်ရင်ဟိုက “အခုထိတော့ မဖြစ်လာသေးပါဘူး။

ကျွန်တော် သွားမယ်လို့တော့ ဆုံးဖြတ်ထားပြီးပါပြီ။ ဒါပေမယ့် အပြောင်းအရွှေ့ကတော့ အခုအထိ မဖြစ်လာသေးပါဘူး။ ကျွန်တော် တရားဝင်အတည်ပြုပေးလို့ မရသေးပါဘူး။ ဒါပေမယ့် ဖီနာဘာချီနည်းပြရာထူးကို လက်ခံချင်ပါတယ်”လို့ Sky Sports သတင်းဌာနဆီ ပြောကြားခဲ့ပါတယ်။ ဖီနာဘာချီအသင်းရဲ့လာမယ့်ရာသီ၊ ချန်ပီယံလိဂ်ခရီးစဉ်အကြောင်း မေးမြန်းချိန် မော်ရင်ဟိုက “ဖြတ်သန်းရမယ့် ခြေစစ်ပွဲအဆင့် သုံးဆင့်အထိ ရှိနေတာကြောင့် ခက်ခဲပါတယ်။

ဖီနာဘာချီအတွက်လည်း ဥရောပကစားသမား ရှစ်ဦးအထိ ရှိပါတယ်။ သူတို့တွေက ခြေစစ်ပွဲပထမအဆင့်မတိုင်ခင် ရာသီကြိုကာလမှာ အသင်းနဲ့ ပူးပေါင်းနိုင်ဖို့ မရှိပါဘူး။ ဒါပေမယ့် ကျွန်တော်ကိုယ်တိုင်က စိန်ခေါ်မှုတွေကို ကြိုက်နှစ်သက်တယ်ဆိုတာ ခင်ဗျားတို့လည်း သိကြပါတယ်။ ဒါကြောင့် ဖီနာဘာချီဆီ ကျွန်တော် ရောက်သွားမယ်ဆိုရင် ချန်ပီယံလိဂ်ဝင်ခွင့်ရရှိဖို့ တိုက်ပွဲဝင်သွားလိမ့်မယ်ဆိုတာ ခင်ဗျားတို့လည်း သိကြပါလိမ့်မယ်”လို့ ဆက်ပြောပါတယ်။