ဘာစီလိုနာကွင်းလယ်တိုက်စစ်ကစားသမား ဒန်နီအိုလ်မိုက အသင်းဟာ ဘယ်ပြိုင်ပွဲမှာမဆို တိုက်ပွဲဝင်ဖို့ အဆင်သင့်ဖြစ်နေကြောင်း အခိုင်အမာပြောကြားလာခဲ့ပြီး ဒီရာသီမှာ ဆုဖလားတွေအားလုံးကို ဆွတ်ခူးနိုင်ဖို့ ရည်ရွယ်ထားတယ်လို့ဆိုပါတယ်။

လာမယ့်သောကြာနေ့မှာ ဘာစီလိုနာဟာ ရွှေ့ဆိုင်းထားခဲ့တဲ့ လာလီဂါပွဲကျန်အဖြစ် အိုဆာဆူနာနဲ့ယှဉ်ပြိုင်သွားရမှာဖြစ်ပြီး အနိုင်ရခဲ့မယ်ဆိုရင်တော့ အမှတ်ပေးဇယားကို ၃ မှတ်အထိဖြတ်တောက်ပြီးဦးဆောင်နိုင်မှာဖြစ်ပါတယ်။ လာလီဂါအမှတ်ပေးဇယားကိုဦးဆောင်ထားတဲ့ ဘာစီလိုနာဟာ ကိုပါဒယ်ရေးပြိုင်ပွဲမှာ ဆီမီးဖိုင်အထိရောက်ရှိနေသလို၊ ချန်ပီယံလိဂ်မှာလည်း ကွာတားဖိုင်နယ်သို့တက်လှမ်းထားနိုင်တာကြောင့် ဆုဖလား ၃ လုံးအထိရရှိဖို့ အခွင့်အရေးရှိနေတာဖြစ်ပါတယ်။ 

ဒါကြောင့် အိုလ်မိုက "ပရိသတ်တွေကို ဖျော်ဖြေမှုအပြည့်ပေးနိုင်လို့ ဝမ်းသာပါတယ်။ ကျွန်တော်ဘာစီလိုနာကို လာခဲ့တာ အနိုင်ရဖို့ဖြစ်ပြီး အသင်းကလည်း ဘယ်အရာမဆိုတိုက်ပွဲဝင်ဖို့ အဆင်သင့်ရှိနေပါတယ်။ ကျွန်တော်တို့ ပြိုင်ပွဲတိုင်းမှာ ကျန်နေပါသေးတယ်။ အကုန်လုံးကိုအနိုင်ယူကျော်ဖြတ်ပြီး ဆုဖလားတွေဆွတ်ခူးနိုင်ဖို့က အသင်းရဲ့ပန်းတိုင်ပါ။ လောလောဆယ်မှာတော့ ကျွန်တော်တို့ ရာသီရဲ့အရေးပါဆုံးအခိုက်အတန့်ကို ရောက်ရှိနေကြပါတယ်" လို့ပြောကြားခဲ့ပါတယ်။ 

ဆက်လက်ပြီး အိုလ်မိုကို ချန်ပီယံလိဂ်ဗိုလ်လုပွဲမှာ ရီးရဲလ်မက်ဒရစ်နဲ့တွေ့ဆုံနိုင်ချေရှိကြောင်းနဲ့ တကယ်လို့ တွေ့ဆုံခဲ့ပါက ဘယ်လိုဖြစ်လာမလဲလို့မေးမြန်းခဲ့ရာ စပိန်လက်ရွေးစင်က "အရမ်းကောင်းတဲ့ပွဲတစ်ပွဲဖြစ်ပါလိမ့်မယ်" လို့ပြုံးရယ်ရင်း ဖြေကြားခဲ့ပါတယ်။