တနင်္လာနေ့နံနက်ကယှဉ်ပြိုင်ခဲ့တဲ့ လာလီဂါပွဲစဉ်မှာ ဘာစီလိုနာဟာ လာလီဂါဆုဖလားပြိုင်ဘက် အက်သလက်တီကိုမက်ဒရစ်ကို ပွဲကစားချိန် မိနစ် ၇၀ အတွင်း ၂-၀ နဲ့ရှုံးနိမ့်နေခဲ့ပေမယ့် ၄ ဂိုးအထိနောက်ကနေပြန်လိုက်သွင်းပြီး အဝေးကွင်းမှာ ၂-၄ နဲ့ဂိုးပြတ်အနိုင်ယူခဲ့ပါတယ်။ 

ယခုပွဲစဉ်ဟာ လာလီဂါအမှတ်ပေးဖလားချန်ပီယံဆုအတွက်အရေးပါတဲ့ပွဲစဉ်ဖြစ်သလို၊ စပိန်ထိပ်သီးကလပ် ၂ ခုအကြား ဂုဏ်သိက္ခာပိုင်းအရလည်း အရေးကြီးတဲ့ပွဲစဉ်တစ်ပွဲဖြစ်ခဲ့ပါတယ်။ အိမ်ကွင်းပရိသတ်အားပေးမှုနဲ့အတူ အက်သလက်တီကိုဟာ ယခုပွဲစဉ်ကို အကောင်းဆုံးပုံစံနဲ့ စတင်ယှဉ်ပြိုင်နိုင်ခဲ့ပြီး ပွဲကိုထိန်းချုပ်ခဲ့ကာ ပထမပိုင်းမှာ ဂျူလီယန်အယ်လ်ဗာရက်ဇ်ရဲ့ဂိုးနဲ့ ဘာစီလိုနာကို စတင်ဦးဆောင်နိုင်ခဲ့ပါတယ်။ 

ဒုတိယပိုင်း မိနစ် ၇၀ မှာလည်း အက်သလက်တီကိုကပဲ နောက်ထပ်ဦးဆောင်ဂိုးထပ်မံရရှိခဲ့ပြီး အလက်ဇန်းဒါးဆော်လို့သ်က သွင်းယူပေးခဲ့တာကြောင့် ၂-၀ နဲ့ပြတ်ပြတ်သားသားဦးဆောင်နိုင်ခဲ့တာဖြစ်ပါတယ်။ ၂ ဂိုးအထိဦးဆောင်ခံထားခဲ့ရပေမယ့် စိတ်ဓာတ်ကျဆင်းသွားခဲ့ခြင်းမရှိတဲ့ဘာစီလိုနာကတော့ ပွဲကစားချိန် ၇၂ မိနစ်မှာရရှိခဲ့တဲ့ လီဝန်ဒေါစကီးရဲ့သွင်းဂိုး၊ ၇၈ မိနစ်မှာရရှိခဲ့တဲ့ ဖာရန်းတောရက်စ်ရဲ့ဂိုးတွေနဲ့ ၆ မိနစ်အတွင်း ၂ ဂိုးဆက်တိုက် ပြန်လည်ချေပခဲ့ပါတယ်။ 

ပွဲပြီးကာနီးအချိန်ပိုမိနစ်မှာတော့ ဘာစီလိုနာအတွက် တတိမြောက်သွင်းဂိုးကို ပါရမီရှင်လူငယ်တောင်ပံကစားသမားလေး လာမိုင်းယာမယ်လ်က အဝေးကန်ချက်နဲ့ သွင်းယူခဲ့တာကြောင့် အက်သလက်တီကိုတို့ ရှုံးပွဲနဲ့စတင်နီးစပ်ခဲ့ပါတယ်။ ထို့နောက်မှာ အက်သလက်တီကိုရဲ့တိုက်စစ်က အလုပ်မလုပ်တော့ဘဲ ဘာစီလိုနာကသာ ပွဲကိုအဆုံးအထိ ကစားအားမချဘဲ ဆက်လက်ကစားခဲ့တာကြောင့် အနိုင်ပြတ်သားစေမယ့်သွင်းဂိုးကို ထပ်မံရရှိခဲ့ကာ ၉၀+၈ မိနစ်မှာ ဖာရန်းတောရက်စ်ကပဲ ထပ်မံသွင်းယူပေးခဲ့တာဖြစ်ပါတယ်။ 

ယခုအပတ်အတွင်း မက်ဒရစ်မြို့ခံပြိုင်ဘက် ရီးရဲလ်မက်ဒရစ်ကို ပင်နယ်တီအဆုံးအဖြတ်နဲ့အရေးနိမ့်ပြီး ချန်ပီယံလိဂ်ကနေ ထွက်ခွာခဲ့ရတဲ့ အက်သလက်တီကိုဟာ ယခုအခါမှာလည်း ဘာစီလိုနာကို ထပ်မံအရေးနိမ့်ခဲ့တာကြောင့် ပြင်းထန်တဲ့ထိုးနှက်ချက် ၂ ကြိမ်နဲ့ကြုံတွေ့ခဲ့ရတယ်လို့ဆိုရပါမယ်။ ဘာစီလိုနာကတော့ ချန်ပီယံလိဂ်မှာလည်း ဘင်ဖီကာကိုအနိုင်ရကာ ကွာတားဖိုင်နယ်သို့တက်လှမ်းထားနိုင်သလို၊ ယခု အက်သလက်တီကိုကိုလည်း အနိုင်ရခဲ့တာကြောင့် လာလီဂါအမှတ်ပေးဇယားကို ၁ ပွဲလျော့နဲ့ ထိပ်ဆုံးကနေ ဆက်လက်ဦးဆောင်ထားနိုင်ခဲ့ပါတယ်။ 

လာမယ့်ဧပြီလ ၃ ရက်နေ့မှာတော့ အက်သလက်တီကိုနဲ့ ဘာစီလိုနာတို့ဟာ ကိုပါဒယ်ရေးဆီမီးဖိုင်နယ် ဒုတိယအကျော့ပွဲစဉ်ကို ထပ်မံယှဉ်ပြိုင်သွားရဦးမှာဖြစ်ပြီး ပထမအကျော့မှာ ၄-၄ နဲ့သရေကျထားခဲ့တာကြောင့် ဗိုလ်လုပွဲသို့ ဘယ်အသင်းက တက်ရောက်သွားနိုင်မလဲဆိုတာ ဆက်လက်စောင့်ကြည့်သွားရဦးမှာဖြစ်ပါတယ်။