ချန်ပီယံလိဂ်တစ်ပွဲပယ်ပြစ်ဒဏ်နဲ့ လွဲချော်ပြီးနောက် ရီးရဲလ်မက်ဒရစ်ကစားသမားတွေဖြစ်တဲ့ အမ်ဘာပေနဲ့ ရူဒီဂါတို့ အာဆင်နယ်နဲ့ရင်ဆိုင်ရမယ့်ပွဲစဉ်မှာ ပါဝင်ကစားသွားပါလိမ့်မယ်။ ချန်ပီယံလိဂ်နောက်ဆုံး ၁၆-သင်းရှုံးထွက်အဆင့်မှာ မြို့ခံပြိုင်ဘက်ကြီးအက်သလက်တီကိုမက်ဒရစ်ကို အနိုင်ယူပြီးနောက် ဒီကစားသမားနှစ်ဦးလုံးက စည်းကမ်းပိုင်းဆိုင်ရာအရေးယူမှုတစ်ခုနဲ့ ရင်ဆိုင်ခဲ့ရပါတယ်။ အာဏာပိုင်တွေက သူတို့နှစ်ဦးလုံးအတွက် ဆိုင်းငံ့ပွဲပယ်ပြစ်ဒဏ်နဲ့ ဒဏ်ငွေ ယူရို ၃၀,၀၀၀၊ ယူရို ၄၀,၀၀၀ အသီးသီးကျခံစေဖို့ ဆုံးဖြတ်ခဲ့ပါတယ်။

ရူဒီဂါနဲ့ အမ်ဘာပေတို့ရဲ့အမှုတွဲမှာ စီဘယ်လော့စ်နဲ့ ဗင်နီးစီးယက်စ်တို့လည်း ပါဝင်လာပေမယ့် ယူအီးအက်ဖ်အေကတော့ စီဘယ်လော့စ်ကို ငွေဒဏ် ယူရို ၂၀,၀၀၀ သတ်မှတ်ခဲ့ပြီး ဗင်နီးစီးယက်စ်ကို အပြီးအပြတ်ကင်းလွတ်ခွင့် ပေးခဲ့ပါတယ်။ အခုလိုစွဲချက်တွေက ဝမ်ဒါမက်ထရိုပိုလီတာနိုကွင်းအတွင်း ပယ်နယ်တီအဆုံးအဖြတ်ဖြင့် အနိုင်ရရှိပြီးနောက် ဒီကစားသမားလေးဦးရဲ့အောင်ပွဲခံပုံမှတဆင့် ထွက်ပေါ်လာခဲ့တာပါ။ 

ရီးရဲလ်မက်ဒရစ်ကြယ်ပွင့်ဟောင်း စီရော်နယ်ဒိုနဲ့ အက်သလက်တီကိုမက်ဒရစ်နည်းပြ ဆီမြွန်နီတို့အတွက် ချမှတ်ခဲ့တဲ့ ၂၀၁၉ ခုနှစ်၊ ပြစ်ဒဏ်စီရင်ထုံးတစ်ခုက ရူဒီဂါနဲ့ အမ်ဘာပေတို့ကို ကယ်တင်နိုင်ခဲ့တယ်လို့ Marca ရဲ့ဖော်ပြချက်အရ သိရပါတယ်။ အဲ့ဒီအချိန်တုန်းက ဂျူဗင်တပ်စ်တိုက်စစ်မှူး စီရော်နယ်ဒိုဟာ ၁၆ သင်းရှုံးထွက်အဆင့်မှာ အက်သလက်တီကိုမက်ဒရစ်ကို ဟက်ထရစ်သွင်းယူပြီးနောက် ပထမအကျော့၊ ဆီမြွန်နီရဲ့အမူအရာကို တုံ့ပြန်တဲ့အနေဖြင့် ညစ်ညမ်းတဲ့အမူအရာနဲ့ အောင်ပွဲခံခဲ့ပါတယ်။နောက်ပိုင်းမှာတော့ နှစ်ဦးလုံးကို ဒဏ်ငွေ ယူရို ၂၀,၀၀၀ ကျခံဖို့ ဆုံးဖြတ်ခဲ့ပါတယ်။ ရီးရဲလ်မက်ဒရစ်က လာမယ့်အင်္ဂါနေ့၊ ကွာတားဖိုင်နယ်ပထမအကျော့ပွဲစဉ်အဖြစ် အာဆင်နယ်နဲ့ မရင်ဆိုင်ရခင် ဒီညမှာ ဗလန်စီယာနဲ့ လာလီဂါပွဲစဉ်ကို ယှဉ်ပြိုင်ကစားရပါမယ်။