ဝေဖန်အာဆင်နယ်အသင်းဟာ ပရီးမီးယားလိဂ်ဇယားထိပ်ဆုံးကို ပြန်လည်ရောက်ရှိလာခဲ့ပေမဲ့ မန်စီးတီး၊ နယူးကာဆယ်တို့နဲ့ ကစားခဲ့တဲ့ပွဲတွေမှာ ပြိုင်ဘက်ကစားသမားတွေကို အနီကတ်ပြရမယ့် ဆုံးဖြတ်ချက်နှစ်ခုကို ငြင်းပယ်ခံခဲ့ရတာကြောင့် သူတို့ရဲ့ ချန်ပီယံဆု မျှော်လင့်ချက်ကို ထိခိုက်ပျက်စီးသွားစေနိုင်တယ်လို့ မီကယ်အာတီတာက ပြောကြားလိုက်ပါတယ်။ စနေနေ့က ကစားခဲ့တဲ့ နယူးကာဆယ်နဲ့ပွဲမှာ အီဘယ်ရီချီ အီဇေးရဲ့ အစောပိုင်းသွင်းဂိုးနဲ့အတူ ၁-၀ နဲ့ အရေးပါတဲ့ အနိုင်ရလဒ်ကို ဖော်ဆောင်နိုင်ခဲ့တာကြောင့် အာဆင်နယ်ဟာ ဒုတိယနေရာက မန်စီးတီးကို ၃ မှတ်ဖြတ်ပြီး ထိပ်ဆုံးမှာ ရှိနေတာပါ။ ဒါပေမဲ့ အဲမရိတ်စ်ကွင်းမှာ ကစားခဲ့တဲ့ အဲဒီပွဲစဉ် မိနစ် ၇၄ မှာ နယူးကာဆယ်ဂိုးသမား နစ်ပုပ်က ဗစ်တာဂျိုကေးရက်စ်ကို ပြစ်ဒဏ်ကျူးလွန်ခဲ့တာကို အနီကတ်မပြခဲ့တဲ့အပေါ် အာဆင်နယ်နည်းပြက စိတ်ပျက်နေတာ ဖြစ်ပါတယ်။ နစ်ပုပ်ဟာ သူ့ရဲ့ဂိုးဧရိယာအပြင်ဘက်အထိ ထွက်လာပြီး ဂျိုကေးရက်စ်ကို အရှိန်နဲ့ဝင်တိုက်ခဲ့တာဖြစ်ပေမဲ့ ဆွီဒင်တိုက်စစ်မှူးဟာ ညာဘက်အစွန်ကို ရောက်နေပြီး ဂိုးသွင်းဖို့ တိုက်ရိုက်လမ်းကြောင်း မပွင့်နေတာကြောင့် ဒိုင်လူကြီးက အဝါကတ်ပဲ ပြခဲ့တာပါ။ အခုလို အကြိတ်အနယ်ရှိလှတဲ့ ချန်ပီယံလုပွဲမှာ ဂိုးကွာခြားချက်က အဆုံးအဖြတ် ဖြစ်လာနိုင်တာကြောင့် နယူးကာဆယ်ဘက်က တစ်ယောက်လျော့သွားခဲ့ရင် အာဆင်နယ်အနေနဲ့ ဂိုးတွေအများကြီး ပိုသွင်းနိုင်မယ့် အခွင့်အရေးရှိခဲ့တယ်ဆိုတာကို အာတီတာက သိနေပါတယ်။ အခုတော့ သူတို့ဟာ မန်စီးတီးထက် ဂိုးကွာခြားချက် ၁ ဂိုးပဲ အသာရတဲ့ အနေအထားနဲ့ပဲ ကျေနပ်ခဲ့ရပါတယ်။ အာတီတာဟာ ပြီးခဲ့တဲ့အပတ်က မန်စီးတီးကို ၂-၁ နဲ့ ရှုံးခဲ့တဲ့ပွဲတုန်းကလည်း ကိုင်ဟာဗက်ဇ်ကို ဆွဲလှဲခဲ့တဲ့ အဘဒူကိုဒီယာ ခူဆာနော့ဗ် အနီကတ်မထိခဲ့တာကို အခုထိ စိတ်ထဲမှာ မကျေမနပ် ဖြစ်နေဆဲပါ။ ဒီဆုံးဖြတ်ချက်နှစ်ခုဟာ ချန်ပီယံဆု အဆုံးအဖြတ်အတွက် အရေးပါသွားနိုင်တယ်လို့ စပိန်လူမျိုးနည်းပြက ယုံကြည်နေပါတယ်။ "နယူးကာဆယ်ဂိုးသမားကို ဘာလို့ အနီကတ်မပြတာလဲ ကျွန်တော် နားမလည်နိုင်ဘူး။ အဲဒီဖြစ်ရပ်ကို ကျွန်တော် အကြိမ် ၁၀ ခါလောက် ပြန်ကြည့်ပြီးပြီ။ ဘောလုံးပွဲကြည့်ဖူးတဲ့သူဆိုရင် ဒါဟာ အနီကတ်ဆိုတာ သိမှာပါ။ ဒါတွေက ကွာခြားချက်တွေပါပဲ" လို့ အာတီတာက ဆိုပါတယ်။ "အရာအားလုံးကို ရင်းပြီး ကစားနေရတဲ့ အရေးကြီးတဲ့အချိန်တွေမှာ အခုနောက်ဆုံးကစားခဲ့တဲ့ နှစ်ပွဲရဲ့ လက်တွေ့အခြေအနေက ကျွန်တော်တို့ဘက်မှာ ရှိဖို့လိုပါတယ်။ ကျွန်တော် ဆင်ခြေပေးနေတာ မဟုတ်ပါဘူး။ ဒီနေ့ပွဲမှာလည်း အနီကတ်ဖြစ်သင့်သလို မန်ချက်စတာကပွဲမှာလည်း အနီကတ်ပါပဲ။ အဲဒီဆုံးဖြတ်ချက်တွေသာ ကျွန်တော်တို့ဘက်မှာ ရှိခဲ့မယ်ဆိုရင် အခုချိန်မှာ အခြေအနေတွေက တခြားစီ ဖြစ်နေလောက်ပါပြီ" လို့လည်း သူက ဆက်ပြောပါတယ်။ အာတီတာရဲ့ ဒီလိုဒေါသတကြီး ပြောဆိုမှုတွေဟာ ၂၀၀၄ ခုနှစ်နောက်ပိုင်း ပထမဆုံးအကြိမ် အင်္ဂလန်အမှတ်ပေးချန်ပီယံဆုကို ရယူဖို့ ကြိုးစားနေတဲ့ အာဆင်နယ်အသင်းရဲ့ ဖိအားတွေကို ပိုမိုထင်ဟပ်စေပါတယ်။ ကြားရက်က မန်စီးတီးက ဘန်လေကို ၁-၀ နဲ့ နိုင်ခဲ့တာကြောင့် အောက်တိုဘာလနောက်ပိုင်း အာဆင်နယ်ဟာ ပထမဆုံးအကြိမ် ဇယားထိပ်ကနေ ဖယ်ပေးခဲ့ရပြီး ၂၀၂၃ နဲ့ ၂၀၂၄ ခုနှစ်တွေတုန်းကလိုပဲ ပက်ဂွာဒီယိုလာရဲ့အသင်းကို ဖလားလက်ဆောင် ပေးလိုက်ရမယ့် အခြေအနေမျိုး ပြန်ဖြစ်လာမှာကို စိုးရိမ်မှုတွေ ရှိနေခဲ့တာ ဖြစ်ပါတယ်။