ပက်ဂွါဒီယိုလာက မန်စီးတီးကစားသမားတွေရဲ့အခုဘောလုံးရာသီစိတ်ပိုင်းဆိုင်ရာခံယူချက်အပေါ် ပြစ်တင်ဝေဖန်ခဲ့ပေမယ့် ဘုန်းမောက်ကိုအနိုင်ယူခဲ့တဲ့ အက်ဖ်အေဖလားပွဲစဉ်အတွင်း သူတို့ပြန်လာနိုင်ပုံကိုတော့ ကျေနပ်နေခဲ့ပါတယ်။

မန်စီးတီးက ပထမပိုင်းပွဲချိန်အတွင်း ဟာလန်းရဲ့ပယ်နယ်တီလွဲချော်မှုတစ်ကြိမ်ရှိခဲ့ပေမယ့် ပြိုင်ဘက်ကို ၂-၁ ဂိုးဖြင့် အနိုင်ယူပြီး အက်ဖ်အေဖလားဆီမီးဖိုင်နယ်အဆင့်ဆီ ခုနစ်ကြိမ်ဆက်တက်ရောက်ကာ စံချိန်သစ်တစ်ခု စိုက်ထူနိုင်ခဲ့ပါတယ်။ မန်စီးတီးရဲ့အခုပွဲစဉ်စွမ်းဆောင်ရည်ပိုင်းက နိုဝင်ဘာလအတွင်း Vitality ကွင်းကြီးမှာပဲ ရှုံးနိမ့်ခဲ့တဲ့ ပရီးမီးယားလိဂ်ပွဲစဉ်နဲ့ အလွန်ကွာခြားခဲ့ပြီး နည်းပြဖြစ်သူကိုယ်တိုင်လည်း သူ့ရဲ့အသင်းမှာ ဘောလုံးရာသီကာလအများစုအတွက် စိတ်အားထက်သန်မှုပိုင်း အားနည်းနေခဲ့တယ်လို့ ဝန်ခံပါတယ်။

ပက်ဂွါဒီယိုလာက “နိုဝင်ဘာလတုန်းက ကျွန်တော်တို့ကစားခဲ့တဲ့ပွဲစဉ်နဲ့ ပြန်နှိုင်းယှဉ်ကြည့်လိုက်ပါ။ ကျွန်တော်တို့က ပြိုင်ဆိုင်မှုပြင်းထန်တဲ့ပြိုင်ဘက်နဲ့ရင်ဆိုင်ရတဲ့ပွဲစဉ်မှာ အားလပ်ရက်ခရီးထွက်လာသလိုမျိုး လျော့ရဲတဲ့စိတ်ဓါတ်ပိုင်းနဲ့ အခုဘောလုံးကွင်းကြီးဆီ ရောက်ရှိလာခဲ့ပါတယ်။ ဒီနေ့မှာတော့ ကျွန်တော်တို့က စိန်ခေါ်မှုအပြည့်ရှိနေတဲ့ အသင်းတစ်ခု ဖြစ်လာခဲ့ပါတယ်။ဘောလုံးကစားတဲ့နေရာမှာ ပြေးလွှားနေဖို့တော့ လိုအပ်ပါတယ်။ ဒါက နည်းစနစ်ပိုင်းမဟုတ်ပေမယ့် အရေးကြီးတဲ့ကဏ္ဍဖြစ်ပါတယ်။ ဒါပေမယ့် နှစ်ပေါင်းများစွာကြာ ကျွန်တော်တို့မှာ ရှိနေခဲ့တဲ့ စိတ်ဝိညာဉ်နဲ့ စိတ်ပိုင်းဆိုင်ရာခံယူချက်မျိုးကို အခုရာသီမှာ ဆုံးရှုံးခဲ့ပါတယ်။ နည်းပြတစ်ဦးဖြစ်တဲ့ ကျွန်တော့်အတွက်တော့ ဒါက ပြန်လည်ရယူဖို့အတွက် အရေးအကြီးဆုံးအရာဖြစ်ပါတယ်။ဒီလိုစိတ်ဝိညာဉ်နဲ့ စိတ်ပိုင်းဆိုင်ရာခံယူချက်မျိုးကို ပြန်လည်ရယူပါမယ်”လို့ ပြောပါတယ်။

အခုလိုအရေးကြီးတဲ့နိုင်ပွဲမှာ မန်စီးတီးရဲ့အလှည့်အပြောင်းတွေအတွက် လူစားဝင်ကစားသမားတွေဖြစ်တဲ့ နီကိုအိုရွိုင်းလီနဲ့ အိုမာမာမွတ်ရှ်တို့က အကူအညီဖြစ်စေသလို ဒီဘရိုင်း၊ ဘာနာဒိုဆေးလ်ဗားနဲ့ ဂမ်ဒိုဂန်တို့ကလည်း လွှမ်းမိုးမှုလုံးဝကြီးမားတဲ့ ဒုတိယပိုင်းအသင်းလိုက်စွမ်းဆောင်ရည်အတွက် အရေးကြီးတဲ့အခန်းကဏ္ဍတစ်ရပ်မှာ ပါဝင်ခဲ့ပါတယ်။

ပက်ဂွါဒီယိုလာက “ဂန္တဝင်ကစားသမားတွေက ခြေတစ်လှမ်းရှေ့တိုးပြီး ကောင်းမွန်တဲ့စွမ်းဆောင်ရည်တစ်ရပ် ပြသခဲ့ပါတယ်။ ခုနစ်ကြိမ်ဆက် ဝင်ဘာလေကွင်းဆီ အရောက်လှမ်းနိုင်ခဲ့လို့ တကယ်ကျေနပ်အားရမိပါတယ်။ ဒါက မယုံကြည်နိုင်လောက်စရာ အောင်မြင်မှုတစ်ခုပါ”လို့ ပြောပါတယ်။

အခုပွဲစဉ်ရဲ့ဒုတိယပိုင်းပွဲချိန်အတွင်း ခြေဖဝါးဒဏ်ရာရရှိခဲ့တဲ့ ဟာလန်းရဲ့နေရာမှာ အိုမာမာမွတ်ရှ်ကို အစားထိုးခဲ့ပါတယ်။ ဒါပေမယ့် ပက်ဂွါဒီယိုလာကတော့ ဒဏ်ရာအခြေအနေနဲ့ပတ်သက်လို့ တစုံတရာထုတ်ပြောသွားတာမျိုး မရှိပါဘူး။အက်ဖ်အေဖလားဆီမီးဖိုင်နယ်တက်ရောက်နိုင်ပြီးနောက် မန်စီးတီးက လာမယ့်ရာသီ၊ ချန်ပီယံလိဂ်ပြိုင်ပွဲဝင်ခွင့်ရရှိဖို့အတွက် ပရီးမီးယားလိဂ် TOP 4 ဝင်ရောက်နိုင်ရေး အာရုံစိုက်သွားနိုင်ပါပြီ။ ပက်ဂွါဒီယိုလာရဲ့အသင်းက လာမယ့်ဗုဒ္ဓဟူးနေ့မှာ ရုန်းကန်နေရတဲ့လက်စတာကို ဧည့်ခံကစားရဖို့ရှိပြီး လာမယ့်တနင်္ဂနွေနေ့မှာတော့ ခါးသီးမြို့ခံပြိုင်ဘက်မန်ချက်စတာယူနိုက်တက်နဲ့ အဝေးကွင်းပွဲစဉ် ဆင်နွှဲရပါမယ်။