အင်္ဂလန်လက်ရွေးစင်ကစားသမား မော်ဂန်ရော်ဂျာစ်က မကြာသေးမီကမှ အသင်းကိုစတင်ကိုင်တွယ်ခဲ့တဲ့ နည်းပြသစ် သောမတ်စ်တူချယ်လ်ဟာ ကစားသမားတွေရဲ့ ကြီးမားတဲ့လေးစားမှုကို ရရှိထားကြောင်းနဲ့ ဂျာမန်သားဟာ ကမ္ဘာ့ဖလားအောင်မြင်မှုကို အဓိကပစ်မှတ်ထားနေတယ်လို့ ပြောကြားလာခဲ့ပါတယ်။ 

ဂါရတ်ဆောက်ဂိတ်ရဲ့နေရာကို ဆက်ခံခဲ့တဲ့ တူချယ်လ်ဟာ အင်္ဂလန်ကိုစတင်ကိုင်တွယ်ချိန်မှာပဲ အချိန်ဖြုန်းနေခြင်းမရှိဘဲ အမေရိကန်၊ မက္ကဆီကိုနဲ့ ကနေဒါတို့က အိမ်ရှင်အဖြစ်ပူးတွဲကျင်းပသွားမယ့် ၂၀၂၆ ကမ္ဘာ့ဖလားပြိုင်ပွဲမှာ အောင်မြင်မှုရရှိဖို့အတွက် ရည်ရွယ်ထားပြီး အခုကတည်းက ကြိုတင်ပြင်ဆင်မှုတွေပြုလုပ်နေပြီဖြစ်ပါတယ်။ 

ယခုအခါမှာ သောမတ်စ်တူချယ်လ်ရဲ့အင်္ဂလန်အသင်းမှာ ရွေးချယ်ခံထားရတဲ့ အက်စတွန်ဗီလာကြယ်ပွင့် ရော်ဂျာစ်က ဂျာမန်သားရဲ့ ကြီးမားတဲ့ရည်ရွယ်ချက်နဲ့ပတ်သက်ပြီး "ကျွန်တော်တို့ရဲ့အဓိကပစ်မှတ်က ကမ္ဘာ့ဖလားပါ။ တူချယ်လ်ကလည်း ဒီအတွက်ပဲ အဓိကအာရုံစိုက်ထားပါတယ်။ သူဘာလုပ်ချင်တယ်၊ ဘယ်လိုလုပ်ချင်တယ်ဆိုတာတွေကို ကျွန်တော်တို့ကို ပြောပြထားပြီး သူပြောတာတွေက အရမ်းရိုးရှင်းပါတယ်။ ကျွန်တော်တို့ကို ဦးဆောင်ဖို့ အရည်အချင်းပြည့်ဝသူတစ်ယောက်ပါ" လို့ပြောကြားခဲ့ပါတယ်။ 

ဆက်လက်ပြီး တူချယ်လ်ဟာ အင်္ဂလန်လက်ရွေးစင်ကြယ်ပွင့်တွေရဲ့ ကြီးမားတဲ့လေးစားမှုကို ရရှိထားကြောင်းကို ရော်ဂျာစ်က "သူက ယုံကြည်မှုမြင့်မားတဲ့ လူတစ်ယောက်ပါ။ ပြီးတော့ ကျွန်တော်တို့အားလုံးရဲ့ ကြီးမားတဲ့လေးစားမှုကို ရထားပါတယ်။ သူနေတဲ့ပုံစံ၊ သူမြင်တဲ့ပုံစံတွေက ကျွန်တော်တို့ထက်သာပါတယ်။ ပြီးတော့ အေးဆေးတည်ငြိမ်တဲ့လူမျိုးပါ" လို့ပြောကြားခဲ့ပါတယ်။ 

ချန်ပီယံလိဂ်အပါအဝင် ပြည်တွင်းဆုဖလားတွေကိုဆွတ်ခူးထားနိုင်ခဲ့တဲ့ တူချယ်လ်ကို အင်္ဂလန်ကစားသမားတွေအနေနဲ့ အတော်လေးယုံကြည်အားကိုးနေကြရုံသာမက ဂျာမန်သားရဲ့ ဘောလုံးနည်းဗျူဟာနဲ့ အသင်းကိုကိုင်တွယ်ပုံတွေက လေးစားအားကျစရာဖြစ်တယ်လို့ ရော်ဂျာစ်ကဆိုပါတယ်။ ကစားသမားက "ကျွန်တော်တို့ဆီက သူလိုချင်တာ ချစ်ခြင်းမေတ္တာနဲ့ ကတိသစ္စာတည်ကြည်မှုလို့ ပြောပါတယ်။ ပြီးတော့ သူက ကျွန်တော်တို့နဲ့ မိသားစုဝင်တွေလိုပဲဖြစ်ချင်တယ်လို့ပြောပါတယ်။ အသင်းမှာ အကောင်းတွေရော၊ အဆိုးတွေရောကြုံတွေ့ရမှာဖြစ်ပြီး ဘယ်လိုအခြေအနေမျိုးမှာမဆို ကျွန်တော်တို့အားလုံး အတူတူရှိနေရပါတယ်။ တစ်ယောက်နဲ့တစ်ယောက်ဆွေးနွေးတိုင်ပင်ပြီး အမြဲတမ်းချိတ်ဆက်နေရပါမယ်။ အသင်းမှာ ကျွန်တော်တို့အားလုံးလိုချင်တာက မိသားစုဆန်တဲ့ ချစ်ခြင်းမေတ္တာမျိုးပါပဲ" လို့ပြောကြားခဲ့ပါတယ်။ 

လာမယ့်စနေနေ့မနက်မှာတော့ အင်္ဂလန်ဟာ ကမ္ဘာ့ဖလားခြေစစ်ပွဲစဉ်အဖြစ် အယ်လ်ဘေးနီးယားနဲ့ယှဉ်ပြိုင်သွားရမှာဖြစ်ပြီး သောမတ်စ်တူချယ်လ်တစ်ယောက် အင်္ဂလန်နည်းပြဘဝ ပွဲဦးထွက်မှာ အဖွင့်လှအောင်စွမ်းဆောင်သွားနိုင်မလား စောင့်ကြည့်ရပါမယ်။