လက်ရှိချန်ပီယံ အာဂျင်တီးနားအသင်းကို ရှုံးနိမ့်ပြီး ၂၀၂၆ ဖီဖာကမ္ဘာ့ဖလားကနေ ထွက်ခွာခဲ့ရပြီးနောက် အင်္ဂလန်နည်းပြ သောမတ်စ် တူချယ်ဟာ မေးခွန်းထုတ်စရာတွေနဲ့ ထပ်မံရင်ဆိုင်နေရပါတယ်။

အတ္တလန်တာမှာ ကစားခဲ့တဲ့ အဲဒီပွဲမှာ အင်္ဂလန်အသင်းဟာ တစ်ဂိုးအသာနဲ့ ဦးဆောင်နေမှုကို ပွဲအပြီးသတ်ခါနီးမှာ လက်လွှတ်ခဲ့ရပြီး အန်ဇို ဖာနန်ဒက်စ်နဲ့ လူစားဝင်ကစားသမား လော်တာရို မာတီနက်ဇ်တို့ရဲ့ နောက်ကျဂိုးတွေကြောင့် ၂-၁ နဲ့ ရှုံးနိမ့်ခဲ့ရတာပါ။

အင်္ဂလန်အသင်း ၁-ဂိုး ဂိုးမရှိနဲ့ ဦးဆောင်နေချိန်၊ အန်ဇိုရဲ့ ချေပဂိုးမဝင်ခင်လေးမှာပဲ တူချယ်က နောက်ခံလူသုံးဦးကို တစ်ပြိုင်နက်တည်း လူစားလဲဝင်ရောက်စေခဲ့တဲ့ ဆုံးဖြတ်ချက်ဟာ အခုလိုရှုံးနိမ့်ရခြင်းရဲ့ အဓိကအကြောင်းအရင်းအဖြစ် ပြင်းပြင်းထန်ထန် ဝေဖန်ခံနေရပါတယ်။

ပွဲချိန် ၅၅ မိနစ်မှာ အန်သိုနီ ဂေါ်ဒန်ရဲ့ဂိုးနဲ့ ဦးဆောင်နိုင်ခဲ့ပြီးနောက် အင်္ဂလန်အသင်းရဲ့ ဘောလုံးပိုင်ဆိုင်မှု သိသိသာသာ ကျဆင်းသွားခဲ့ပြီး ပွဲနောက်ဆုံးပိုင်းမှာတော့ ပြိုင်ဘက်ကို ယှဉ်နိုင်စွမ်း မရှိတော့ပါဘူး။

၂၀၂၅ ခုနှစ်အစမှာ ဂါရက် ဆောက်ဂိတ်ရဲ့နေရာကို အစားထိုးဝင်ရောက်ခဲ့တဲ့ တူချယ်ရဲ့ တာဝန်တစ်ခုကတော့ ဆောက်ဂိတ်လက်ထက် အင်္ဂလန်အသင်း ယူရိုဗိုလ်လုပွဲတွေမှာ အီတလီနဲ့ စပိန်ကို ဆက်တိုက်ရှုံးနိမ့်ခဲ့ရတဲ့ အားနည်းချက်ဖြစ်တဲ့ ပွဲကြီးပွဲကောင်းတွေမှာ လိုအပ်နေတဲ့ အနိုင်ရလိုစိတ်ကို ရှာဖွေဖြည့်ဆည်းပေးဖို့ပဲ ဖြစ်ပါတယ်။

ဒါပေမဲ့ အင်္ဂလန်ကြယ်ပွင့်ဟောင်းတွေဖြစ်တဲ့ ဝိန်းရွန်းနီနဲ့ ဂျိုးဟတ်တို့ကတော့ တူချယ်ဟာ အရေးကြီးတဲ့အချိန်မှာ အရင်နည်းပြတွေလိုပဲ အမှားဟောင်းထဲကို ပြန်ကျရောက်သွားခဲ့တယ်လို့ ထောက်ပြခဲ့ပါတယ်။

"ဂိုးစရပြီးပြီဆိုရင် ဘောလုံးပိုင်ဆိုင်မှုကို အဆုံးရှုံးခံလိုက်တာမျိုး ဒါမှမဟုတ် ဒုတိယဂိုးသွင်းဖို့ အခွင့်အရေးကို လက်လွှတ်လိုက်တာမျိုး လုပ်လို့မရပါဘူး။ ကိုယ်ကပဲ အသာစီးရအောင် ကစားရမှာပါ။ အာဂျင်တီးနားက ပွဲထဲပြန်ဝင်လာဖို့ ကြိုးစားနေရတဲ့အချိန်မှာ သူတို့ဘာမှလုပ်လို့မရအောင် ဖိအားပေးထားရမှာပါ" လို့ ရွန်းနီက BBC Sport ကို ပြောပါတယ်။

"အာဂျင်တီးနားလို အရည်အချင်းရှိတဲ့ ကစားသမားတွေကို ကိုယ့်ဂိုးဧရိယာအနီးမှာ အချိန်နဲ့ နေရာလွတ်တွေ ပေးလိုက်မယ်ဆိုရင် သူတို့ကတော့ ဂိုးသွင်းသွားမှာပါပဲ" လို့လည်း သူက ဆိုပါတယ်။

"အရင်က ဆောက်ဂိတ်ဟာ အရေးကြီးတဲ့ပွဲတွေမှာ ခံစစ်ကို စောစောစီးစီး အလွန်အကျွံ ကစားတတ်တာကြောင့် အဝေဖန်ခံခဲ့ရဖူးပါတယ်။ ဒါပေမဲ့ အခုလည်း ဘာမှပြောင်းလဲသွားတာ မရှိသေးဘူးလို့ ကျွန်တော်ထင်ပါတယ်" လို့ ဂျိုးဟတ်က ဖြည့်စွက်ပြောကြားခဲ့ပါတယ်။

"တူချယ်အနေနဲ့ အဲဒီလိုအချိန်မှာ လူစားလဲမှုတွေ လုပ်လိုက်တာဟာ သူ့အသင်းအပေါ် သူကိုယ်တိုင် ယုံကြည်မှုမရှိဘူးလို့ ပြောလိုက်တာ ဒါမှမဟုတ် အာဂျင်တီးနားကို ထပ်ပြီး မတိုက်စစ်ဆင်နိုင်တော့ဘူးလို့ ဝန်ခံလိုက်တာနဲ့ အတူတူပါပဲ" လို့လည်း ၎င်းက ဆိုပါတယ်။