အွန်နရီရဲ့ အသင်းဟောင်း အာဆင်နယ်ဟာ အက်သလက်တီကိုအသင်းအား ၄-၀ ဂိုးဖြင့် ဂိုးပြတ် အနိုင်ရရှိပြီးနောက် ယခုရာသီ ချန်ပီယံလိဂ်တွင် ၎င်းတို့၏ ပြီးပြည့်စုံသော ရာသီအစကို ဆက်လက်ထိန်းသိမ်းထားနိုင်ခဲ့ပါတယ်။ အမ်းမရိတ်စ်ကွင်း၌ ယှဉ်ပြိုင်ကစားခဲ့တဲ့ ပွဲစဉ်ရဲ့ပထမပိုင်းတွင် ဂိုးမရှိသရေကျခဲ့သော်လည်း ပွဲပြန်စပြီးနောက် အာဆင်နယ်က ကြီးစိုးနိုင်မှု ကို ပြသခဲ့ပြီး ၁၃ မိနစ်အတွင်း လေးဂိုးသွင်းယူကာ ဧည့်သည်အသင်းကို အလဲထိုးခဲ့ပါတယ်။

ဘရာဇီးနိုင်ငံသားအတွဲဖြစ်တဲ့ ဂါဘရီယယ် မာဂယ်ဟေးစ် နှင့် ဂါဘရီယယ် မာတင်နယ်လီတို့က ဂန်နာတို့အတွက် အကောင်းဆုံး ထိန်းချုပ်နိုင်စေခဲ့ပြီးနောက် ဗစ်တာ ရောကရက်စ်က ကိုးပွဲဆက်တိုက် ဂိုးပေါက်ပျောက်ဆုံးနေမှုကို အဆုံးသတ်ကာ လျင်မြန်သော နှစ်ဂိုးဆက်တိုက် သွင်းယူခဲ့ပါတယ်။

အာဆင်နယ်က ဥရောပပြိုင်ပွဲ သုံးပွဲကစားအပြီး နိုင်ပွဲ ရာနှုန်းပြည့် ရရှိထားတဲ့ အသင်းသုံးသင်းထဲမှ တစ်သင်းဖြစ်လာခဲ့ပြီး ဘိုင်ယန်မြူးနစ်နှင့် ရီးရဲလ်မက်ဒရစ်တို့ကဲ့သို့ အသင်းများကလည်း ဗုဒ္ဓဟူးနေ့ညတွင် ကိုးမှတ်ရရှိကာ ဂန်နာတို့နှင့်အတူ လာရောက် ပူးပေါင်းနိုင်ခဲ့ပါတယ်။

မီခေးလ်အာတီတာရဲ့ အသင်းဟာ ပြီးခဲ့တဲ့ရာသီက ယခုပြိုင်ပွဲရဲ့ ဆီမီးဖိုင်နယ်အဆင့်သို့ တက်ရောက်နိုင်ခဲ့ပြီး နောက်ဆုံးတွင် ချန်ပီယံဖြစ်သွားတဲ့ ပီအက်စ်ဂျီကို ရှုံးနိမ့်ခဲ့ရသော်လည်း ဒီတစ်ကြိမ်တွင်မူ အဆိုပါအဆင့်ထက် တစ်ဆင့်ပို၍ တက်လှမ်းနိုင်မယ်လို့ အွန်နရီက ယုံကြည်နေပါတယ်။

အွန်နရီက အာဆင်နယ်အသင်းကို ဘိုင်ယန်မြူးနစ်နှင့် လက်ရှိချန်ပီယံ ပီအက်စ်ဂျီတို့နှင့်အတူ ချန်ပီယံလိဂ်ဖလား ဆွတ်ခူးရန် 'ရေပန်းအစားဆုံး' အသင်းသုံးသင်းထဲမှ တစ်သင်းအဖြစ် ရှုမြင်ကြောင်း CBS Sports အစီအစဉ်တင်ဆက်သူ ကိတ်စကော့က ပြောကြားခဲ့ပါတယ်။

"သီယာရီက အာဆင်နယ်အကြောင်းကို အရမ်းအထင်ကြီးတဲ့ စကားလုံးတွေနဲ့ ပြောခဲ့ပြီး အခု ဒီပြိုင်ပွဲအတွက် ရေပန်းအစားဆုံး အသင်းတွေအနေနဲ့ ဘိုင်ယန်မြူးနစ်နဲ့ ပီအက်စ်ဂျီတို့ရဲ့ ဘေးမှာ သူတို့ကို ထားရှိခဲ့ပါတယ်" လို့ သူမက အာဆင်နယ်ရဲ့ ချန်ပီယံလိဂ် အခွင့်အလမ်းများအပေါ် ဂျေမီကာရေဂါရဲ့ သဘောထားကို မေးမြန်းရင်း ပြောကြားခဲ့ပါတယ်။

"ခင်ဗျားလည်း အလားတူ ရှုမြင်ပါသလား ဂျေမီရေ" ၂၀၀၅ ခုနှစ်တွင် လီဗာပူးနှင့်အတူ ချန်ပီယံလိဂ်ဖလား ဆွတ်ခူးနိုင်ခဲ့သူ ကာရေဂါက "လက်ရှိအချိန်မှာတော့ အာဆင်နယ်နဲ့ ဘိုင်ယန်တို့ဟာ ပြည်တွင်းမှာရော ချန်ပီယံလိဂ်မှာပါ သူတို့ရဲ့ ခြေစွမ်းတွေကို ကြည့်လိုက်ရင် ကျွန်တော်တွေ့ဖူးသမျှ အထင်ကြီးစရာအကောင်းဆုံး အသင်းနှစ်သင်းပါပဲ"

"ကျွန်တော် ဒီအစီအစဉ်မှာ အရင်ကတည်းက ပြောခဲ့ဖူးပါတယ်၊ အာဆင်နယ်ကို ချန်ပီယံလိဂ် ကလပ်အသင်းတစ်သင်းအဖြစ် ဘယ်တုန်းကမှ မသတ်မှတ်ခဲ့ပါဘူး" "သူတို့ အရင်က တစ်ခါမှ မဆွတ်ခူးဖူးဘူးဆိုတော့ ဒါက သိသာထင်ရှားတယ်လို့ ထင်ရနိုင်ပါတယ်၊ ဒါပေမဲ့ သူတို့နဲ့ ချိတ်ဆက်မမိတဲ့ တစ်ခုခုရှိတယ်လို့ ကျွန်တော် အမြဲတွေးခဲ့တယ်၊ သူတို့ ဘယ်တုန်းကမှ အနီးစပ်ဆုံးတောင် မရောက်ခဲ့ဖူးပါဘူး"

"သီယာရီရဲ့ အာဆင်နယ် အသင်းက ကျွန်တော် ပရီးမီးယားလိဂ်မှာ ရင်ဆိုင်ကစားခဲ့ဖူးသမျှ အကောင်းဆုံးအသင်းပါ၊ အဲ့ဒီအသင်းတောင်မှ ချန်ပီယံလိဂ်ဖလား ဆွတ်ခူးနိုင်ဖို့ လုံလောက်အောင် အနီးစပ်ဆုံး မရောက်ခဲ့ပါဘူး။ ချန်ပီယံလိဂ် ဗိုလ်လုပွဲကို ရောက်ခဲ့တာ အဲ့ဒီအသင်း မဟုတ်ပါဘူး"

"ကျွန်တော် အခု ဒီအသင်းကို ကြည့်လိုက်တဲ့အခါ သူတို့ ခံစစ် ဘယ်လောက်တောင့်တင်းလဲဆိုတာ တွေ့နေရပါတယ်။ ချန်ပီယံလိဂ်ဖလား ဆွတ်ခူးခဲ့တဲ့ ကျွန်တော့်ရဲ့ လီဗာပူးအသင်းက တိုက်စစ်ပိုင်းမှာ သိပ်ကောင်းတဲ့အသင်း မဟုတ်ခဲ့ပေမယ့် ကျွန်တော်တို့ ခံစစ်ပိုင်း တောင့်တင်းခဲ့ပါတယ်"

"ဒါက ခင်ဗျားကို အမြဲတမ်း အခွင့်အရေးတစ်ခု ပေးပါတယ်၊ အထူးသဖြင့် ရှုံးထွက်အဆင့်တွေနဲ့ အိမ်ကွင်းအဝေးကွင်း နှစ်ကျော့ပွဲစဉ်တွေ ရောက်လာတဲ့အခါမှာပေါ့။ ခင်ဗျားသာ ခံစစ်ပိုင်း တောင့်တင်းနေရင် အမြဲတမ်း အခွင့်အရေးရှိပါတယ်"

"ဒါကြောင့် ဟုတ်ကဲ့၊ ကျွန်တော် အာဆင်နယ်ကို ဒီပြိုင်ပွဲကို ဆွတ်ခူးနိုင်တဲ့ လေးငါးသင်းထဲက တစ်သင်းအဖြစ် ရှုမြင်ပါတယ်" လို့ ပြောပါတယ်။ အာဆင်နယ်နည်းပြ အာတီတာက သူ့ရဲ့အသင်း ဂိုးပြတ် နိုင်ပွဲရရှိခဲ့ရုံသာမက ဂိုးပေါက်ပျောက်ဆုံးနေမှုကို အဆုံးသတ်နိုင်ခဲ့တဲ့ ရောကရက်စ်၏ ခြေစွမ်းအတွက်လည်း ဝမ်းမြောက်ဝမ်းသာ ဖြစ်ခဲ့ပါတယ်။

"ကျွန်တော် အရမ်းကျေနပ်မိပါတယ်" လို့ အာဆင်နယ်သို့ ပေါင် ၆၄ သန်းဖြင့် ရောက်လာခဲ့တဲ့ ရောကရက်စ် က UEFA သို့ ပြောကြားခဲ့ပါတယ်။ "သူတို့မှာ အခွင့်အရေးကောင်းတချို့ ရှိခဲ့ပေမယ့် ကျွန်တော်တို့ ခြုံကြည့်လိုက်ရင် ထိန်းချုပ်ထားနိုင်ခဲ့တယ်လို့ ထင်ပါတယ်"

"လေးဂိုးသွင်းပြီး နောက်တစ်ကြိမ် ဂိုးမပေးရအောင် စွမ်းဆောင်နိုင်ခဲ့တာ အရမ်းကောင်းပါတယ်။ ကျွန်တော်တို့ အမြဲတမ်း ကြိုးစားနေမှာပါ။ ကျွန်တော်တို့ ခံစစ်ကစားတဲ့အခါ အမှန်ကန်ဆုံး လုပ်ဆောင်ပြီး အခွင့်အရေးတွေ ရလာတဲ့အခါမှာလည်း အဲ့ဒါတွေကို အရယူရာမှာ အရမ်းအားကောင်းပါတယ်"

"ကျွန်တော့်ရဲ့ ဂိုးနှစ်ဂိုးလုံးက ကောင်းမွန်ခဲ့ပါတယ်။ ကျွန်တော် အမြဲတမ်း အကောင်းဆုံးဖြစ်အောင် ကြိုးစားပြီး အလုပ်ကြိုးစားတယ်၊ မတူညီတဲ့ အရာတွေနဲ့ ကူညီထောက်ပံ့ပေးတယ်၊ ဂိုးတွေကလည်း မကြာခင် ဒါမှမဟုတ် နောက်ကျရင် ဝင်လာမှာပါပဲ"

"ကျွန်တော်တို့ ခြေစွမ်းကောင်းပြချင်တယ်၊ ဘောလုံးပွဲတွေကို အနိုင်ရချင်တယ်၊ ဒါပေမဲ့ သွားရမယ့် ခရီးလမ်းက ရှည်လျားပါသေးတယ်။ ငြီးငွေ့စရာကောင်းတယ်လို့ ထင်ရရင်တောင်မှ ကျွန်တော်တို့ တစ်ပွဲချင်းစီပဲ အာရုံစိုက်သွားမှာပါ" လို့ ရောကရက်စ်က ပြောပါတယ်။