ပေါ်တူဂီနည်းပြ ရော်ဘတ်တိုမာတီနက်ဇ်က တနင်္လာနေ့နံနက်က ယှဉ်ပြိုင်ခဲ့တဲ့ ယူအီးအက်ဖ်အေနေရှင်းလိဂ် ကွာတားဖိုင်နယ် ဒုတိယအကျော့ပွဲစဉ်မှာ ဒိန်းမတ်ကို အချိန်ပိုမိနစ်သွင်းဂိုးတွေနဲ့အတူ ၅-၂ နဲ့အနိုင်ရပြီးနောက် ပွဲအပြီးမှာ အသင်းရဲ့စွမ်းဆောင်ရည်အပေါ်အားကျကျေနပ်မိကြောင်း ပြောကြားလာခဲ့ပါတယ်။ ပေါ်တူဂီဟာ ပထမအကျော့မှာ ဒိန်းမတ်ကို ဂိုးသွင်းယူနိုင်ခဲ့ခြင်းမရှိဘဲ ၁-၀ နဲ့ကပ်ရှုံးခဲ့ပေမယ့် ဒုတိယအကျော့မှာတော့ ဂိုးပြတ်နိုင်ပွဲဖော်ဆောင်ပြီး ဆီမီးဖိုင်နယ်အဆင့်သို့ တက်လှမ်းနိုင်ခဲ့တာဖြစ်ပါတယ်။ 

ပွဲအပြီးမှာ မာတီနက်ဇ်က "ကျွန်တော်တို့ ပထမအကျော့ကခြေစွမ်းနဲ့ လုံးဝကွာခြားတဲ့ခြေစွမ်းမျိုးကို ဒီပွဲမှာ ပြသနိုင်ခဲ့ပါတယ်။ ပွဲအပေါ်ထိန်းချုပ်ကစားနိုင်ခဲ့ပြီး အခွင့်အရေးတွေလည်း ဖန်တီးနိုင်ခဲ့ပါတယ်။ ဒိန်းမတ်လိုအသင်းကို ၅ ဂိုးသွင်းဖို့က လွယ်ကူတဲ့အရာတော့မဟုတ်ပါဘူး။ ကစားသမားတွေ အရမ်းတော်ခဲ့ကြပါတယ်"

"ပထမအကျော့မှာ ကွင်းတွင်းအငွေ့အသက်က ကောင်းခဲ့ပေမယ့် အခုပွဲမှာတော့ ပိုကောင်းခဲ့ပါတယ်။ ဘောလုံးမှာက အမြဲတမ်း ၃-၀ နဲ့ဂိုးပြတ်နိုင်နေမှာမဟုတ်ပါဘူး။ တိုက်ပွဲဝင်၊ အလုပ်ကြိုးစားပြီး ကိုယ့်အလုပ်ကိုယ် ပြီးဆုံးအောင်လုပ်နိုင်ဖို့လိုပါတယ်"

"ကျွန်တော်တို့အသင်းက ပေါ်တူဂီလူမျိုးတွေရဲ့ တန်ဖိုးကို ပြသနိုင်ခဲ့ပါတယ်။အရည်အသွေးမြင့်ကစားသမားတွေ အသင်းမှာရှိနေပြီး ဒီအသင်းအတွက် ကျွန်တော်ဂုဏ်ယူပါတယ်။ အခုတော့ ကျွန်တော်တို့ ဆီမီးဖိုင်နယ်အတွက် အာရုံစိုက်ရပါမယ်" လို့ပြောကြားခဲ့ပါတယ်။ 

ဆက်လက်ပြီး အသင်းအတွက် လူစားဝင်ရောက်ပြီး သွင်းဂိုး ၂ ဂိုးအထိရယူနိုင်ခဲ့တဲ့ တိုက်စစ်မှူး ထရင်ကာအိုကိုလည်း မာတီနက်ဇ်က ချီးကျူးပြောဆိုမှုတွေပြုလုပ်ခဲ့ပါတယ်။ စပိန်သားနည်းပြက "လူစားဝင်ကစားပြီး ဂိုးသွင်းနိုင်ဖို့ဆိုတာ မလွယ်ကူပါဘူး။ ဒါပေမယ့် သူက အမြဲတမ်းအခွင့်အရေးကိုစောင့်နေခဲ့သူဖြစ်ပြီး အလုပ်ကြိုးစားပါတယ်။ အခုလို ခြေစွမ်းမျိုးနဲ့ ဂိုးသွင်းနိုင်ခဲ့လို့ သူ့ကိုချီးကျူးရပါမယ်။ သူ့ရဲ့ကြီးမားတဲ့ ပါရမီကို ဒီပွဲမှာ ပြသနိုင်ခဲ့ပါတယ်" လို့ပြောကြားခဲ့ပါတယ်။ 

ဝေဖန်မှုတွေနဲ့ပတ်သက်ပြီးတော့လည်း မာတီနက်ဇ်က "ကျွန်တော်ဒီကိုရောက်လာတာ ကစားသမားတွေကိုကူညီပြီး အသင်းရဲ့ပန်းတိုင်တွေကို အရောက်လှမ်းဖို့ပါ။ ပရိသတ်တွေထံကနေ ယုံကြည်မှုတွေရရှိထားပါတယ်။ ပြီးတော့ ဥက္ကဌအသစ်၊ ဘုတ်အဖွဲ့နဲ့ ဘောလုံးအဖွဲ့ချုပ်တစ်ခုလုံးက ကျွန်တော့်ကို ယုံကြည်ထားပါတယ်။ ဒီပြိုင်ပွဲမှာ လွယ်ကူတဲ့ပွဲစဉ်ဆိုတာမရှိပါဘူး။ စပိန်နဲ့ ပြင်သစ်တို့တောင် ပင်နယ်တီအဆုံးအဖြတ်တွေနဲ့ နောက်တစ်ဆင့်ကိုတက်နိုင်ခဲ့ကြတာပါ။ ကျွန်တော်တို့ကတော့ ပရိသတ်အားပေးမှုနဲ့ နောက်တစ်ဆင့်ကို တက်ရောက်နိုင်ခဲ့ပါတယ်" လို့ပြောကြားခဲ့ပါတယ်။