လာမယ့်တနင်္ဂနွေနေ့၊ ဖူလ်ဟမ်နဲ့ရင်ဆိုင်ရမယ့် ပရီးမီးယားလိဂ်ရာသီပိတ်ပွဲစဉ်မှာ  ဘာတွေလုပ်သွားဖို့လိုအပ်မလဲဆိုတာကို မန်စီးတီးအသင်း ကောင်းကောင်းသိရှိနေပြီလို့ ပက်ဂွါဒီယိုလာက ပြောပါတယ်။ ပက်ဂွါဒီယိုလာရဲ့အသင်းက ဒီနေ့မနက်ပိုင်း၊ အီတီဟတ်ကွင်းမှာ ဘုန်းမောက်ကို အိုမာမာမွတ်ရှ်၊ ဘာနာဒိုဆေးလ်ဗား၊ နီကိုဂွန်ဇာလက်ဇ်တို့ရဲ့သွင်းဂိုးတွေနဲ့ သက်သောင့်သက်သာအနိုင်ယူခဲ့ပါတယ်။

ဒီပွဲစဉ်ရလဒ်ပိုင်းကြောင့် မန်စီးတီးက ပရီးမီးယားလိဂ်အမှတ်ပေးဇယားတတိယနေရာအထိ ရောက်ရှိလာပေမယ့် လာမယ့်ရာသီ၊ ချန်ပီယံလိဂ်ပြိုင်ပွဲဝင်ခွင့်သေချာပေါက်ရရှိဖို့ ရာသီပိတ်ပွဲစဉ်မှာ အနည်းဆုံးသရေတစ်မှတ်တော့ လိုအပ်နေဆဲပဲ ဖြစ်ပါတယ်။

မန်စီးတီးက အမှတ်ပေးဇယားအဆင့်-၁၀ နေရာရှိ မာကိုဆေးလ်ဗားရဲ့အသင်းနဲ့ အခုသီတင်းပတ်ကုန်၊ ကရာဗန်ကော့တေ့ချ်ကွင်းမှာ ယှဉ်ပြိုင်ကစားရပါမယ်။ ပက်ဂွါဒီယိုလာက “ ရာသီပိတ်ပွဲစဉ်မှာ ကျွန်တော်တို့တွေ ရလဒ်ကောင်းဖို့ လိုအပ်ပါတယ်။ ကျွန်တော်တို့အတွက် လန်ဒန်မှာ ဖိုင်နယ်ပွဲစဉ်တစ်ခု ရှိနေပါပြီ။ ကျွန်တော်တို့လိုအပ်နေတဲ့ ရမှတ်ကို ရယူဖို့ဆိုတာ အတော်လေးခက်ခဲပါလိမ့်မယ်။ ဒါပေမယ့် အဲ့ဒါကလည်း တကယ့်ကို အရေးကြီးနေပါတယ်။ အခုဘောလုံးရာသီမှာ ဘာတွေပဲဖြစ်ခဲ့ဖြစ်ခဲ့၊ ချန်ပီယံလိဂ်ပြိုင်ပွဲဝင်ခွင့်ရရှိမယ်ဆိုရင် ကျေနပ်စရာကောင်းပါတယ်”လို့ ပြောပါတယ်။