သောကြာနေ့နံနက်က ယှဉ်ပြိုင်ခဲ့တဲ့ ပရီးမီးယားလိဂ်ပွဲစဉ်မှာ ချဲလ်ဆီးဟာ တော့တင်ဟမ်ကို ၁-၀ နဲ့ကပ်ပြီး အနိုင်ရခဲ့ပေမယ့် ပွဲအပြီးမှာ နည်းပြအန်ဇိုမာရက်စ်ကာက သူ့အနေနဲ့ ပွဲပြီးကာနီးမှာ လူစားလဲမှုနဲ့ပတ်သက်ပြီး အမှားပြုလုပ်မိခဲ့ကြောင်း ဝန်ခံပြောကြားလာခဲ့ပါတယ်။ 

ယခုပွဲစဉ်မှာ ကွင်းလယ်ဒိုင်ဟာ နာကျင်အချိန်ပိုကို ၁၂ မိနစ်အထိသတ်မှတ်ပေးခဲ့တာဖြစ်ပြီး မာရက်စ်ကာဟာ ပွဲကစားချိန် မိနစ် ၉၀ မပြည့်ခင်မှာပဲ လူစားလဲမှုတွေ ပြုလုပ်မိခဲ့တာဖြစ်ပါတယ်။ မာရက်စ်ကာက "ကျွန်တော်တို့ ပထမပိုင်းမှာ အခွင့်အရေးတွေ အလုံအလောက်ဖန်တီးနိုင်ခဲ့ပါတယ်။ ပြီးတော့ ဒုတိယပိုင်းမှာတော့ ကျွန်တော် အချိန်ပိုမိနစ်ဘယ်လောက်ပေးမယ်ဆိုတာ မသိခဲ့ဘဲ လူစားလဲမှုတွေစောစောစီးစီးပြုလုပ်မိခဲ့ပါတယ်။ ရိုးရိုးသားသားပြောရမယ်ဆိုရင် အဲဒါ ကျွန်တော့်အမှားပါ" 

"အချိန်ပို ၁၂ မိနစ်ပေးတယ်ဆိုတာ မြင်လိုက်ရချိန်မှာတော့ ကျွန်တော် လူစားလဲမှုတွေပြုလုပ်တာ အရမ်းစောသွားတယ်ဆိုတာ သိလိုက်ပါတယ်။ ဒါပေမယ့် ကံကောင်းစွာပဲ အနိုင်ရလဒ်ကိုဖန်တီးနိုင်ခဲ့လို့ တော်ပါသေးတယ်" လို့ပြောကြားခဲ့ပါတယ်။ ချဲလ်ဆီးဟာ ပွဲကစားချိန် မိနစ် ၅၀ မှာရရှိခဲ့တဲ့ အန်ဇိုဖာနန်ဒက်ဇ်ရဲ့ ခေါင်းတိုက်သွင်းဂိုးနဲ့ ပွဲကိုဦးဆောင်ထားခဲ့တာဖြစ်ပြီး မိနစ် ၉၀ ဝန်းကျင်မှာ ကိုးလ်ပယ်လ်မာနဲ့ ဖာနန်ဒက်ဇ်တို့ကို ထုတ်ပယ်ကာ ဒရူစ်ဘူရီဟောလ်နဲ့ အဒရာဘီအိုယိုတို့ကို အစားထိုးထည့်သွင်းကာ ပွဲကိုထိန်းချုပ်ခဲ့ပါတယ်။ အဆိုပါလူစားလဲမှုတွေက အချိန်ပို ၁၂ မိနစ်အတွင်း အခွင့်အရေးကိုအသုံးချသွားနိုင်တဲ့ တော့တင်ဟမ်ကြောင့် ချဲလ်ဆီးအနေနဲ့ စွန့်စားမှုတွေပြုလုပ်ခဲ့ရသလို ဖြစ်ခဲ့ပါတယ်။ 

ယခုပွဲစဉ်ရဲ့ဒုတိယပိုင်းအတွင်းမှာ ချဲလ်ဆီးနဲ့တော့တင်ဟမ်တို့ဟာ သွင်းဂိုးတွေကိုယ်စီထပ်မံ ရရှိခဲ့ကြသေးပေမယ့် VAR နဲ့ပြန်လည်စစ်ဆေးပြီးနောက် အသီးသီးပယ်ဖျက်ခံခဲ့ကြရပါတယ်။ အနိုင် ၃ မှတ်ရခဲ့တဲ့ ချဲလ်ဆီးဟာ ပရီးမီးယားလိဂ်အမှတ်ပေးဇယားရဲ့ အဆင့် ၄ နေရာသို့တက်လှမ်းနိုင်ခဲ့ပြီး နောက်ရာသီချန်ပီယံလိဂ်ဝင်ခွင့်ရရှိဖို့ နီးစပ်ခဲ့ပေမယ့် တော့တင်ဟမ်ကတော့ အဆင့် ၁၄ နေရာမှာသာရပ်တည်ခဲ့ပြီး ပရိသတ်ဝေဖန်မှုတွေနဲ့ ကြုံတွေ့ခဲ့ပါတယ်။ 

ဆက်လက်ပြီး မာရက်စ်ကာက "အသင်းတစ်သင်းတည်ဆောက်ဖို့ဆိုရင် ကျွန်တော်တို့ နောက်ဆုံး ၁၀ မိနစ်အတွင်းကစားခဲ့တဲ့ ကစားပုံကနေ သင်ယူနိုင်ဖို့လိုအပ်ပါတယ်။နောက်ဆုံး ၁၀ မိနစ်အတွင်းမှာကျွန်တော်တို့ ညစ်ပတ်တဲ့နည်းလမ်းနဲ့ အနိုင်ရအောင်ကစားခဲ့ပါတယ်" လို့ပြောကြားခဲ့ပါတယ်။

တိုက်စစ်မှူး နီကိုးလက်စ်ဂျက်ဆန်ပြန်လည်ပါဝင်နိုင်ခြင်းက ချဲလ်ဆီးရဲ့တိုက်စစ်ကို ပိုမိုကောင်းမွန်လာစေကြောင်းကိုလည်း အီတလီသားနည်းပြက "ဂျက်ဆန်ပြန်ကစားနိုင်တာက အသင်းအတွက် သေချာပေါက်ပိုကောင်းလာစေပါတယ်။ သူနဲ့ဆိုရင် အသင်းရဲ့တိုက်စစ်က ပုံမှန်နဲ့မတူဘဲ အရမ်းကောင်းလာပါတယ်" လို့ပြောကြားခဲ့ပါတယ်။ 

တော့တင်ဟမ်နည်းပြ အန်ဂျီပိုစတီကိုဂလူကတော့ VAR နဲ့စစ်ဆေးကာ ပြန်လည်ပယ်ဖျယ်ခံခဲ့ရတဲ့ ပါပေးဆားရဲ့သွင်းဂိုးနဲ့ပတ်သက်ပြီး ကျေနပ်နိုင်ခြင်းမရှိဘဲ ကွင်းလယ်ဒိုင်ရဲ့ဆုံးဖြတ်ချက်အပေါ် ဝေဖန်မှုတွေပြုလုပ်ခဲ့ပါတယ်။ဩစတြေးလျသားက "ကျွန်တော်တို့ ဂိုးသွင်းနိုင်ခဲ့ပါတယ်။ပရိသတ်တွေအနေနဲ့ ဒီဂိုးကို လွတ်လွတ်လပ်လပ်အောင်ပွဲခံရသင့်ပါတယ်။ ဒါပေမယ့် နောက်ဆုံးမှာတော့ ကျွန်တော်တို့ ပရိသတ်တွေရဲ့လှောင်ပြောင်မှုတွေနဲ့ပဲ ကြုံတွေ့ခဲ့ရပါတယ်။လှောင်ပြောင်မှုတွေက ကျွန်တော့်အတွက်တော့ သိပ်မထူးဆန်းပါဘူး။ ဒါက ကျွန်တော့်အတွက် ပထမဆုံးအကြိမ်လည်းမဟုတ်ပါဘူး" လို့ပြောကြားခဲ့ပါတယ်။