အလာဗက်စ်နဲ့ရင်ဆိုင်ရမယ့် လာလီဂါပွဲစဉ်မတိုင်ခင် ဘာစီလိုနာနည်းပြဟန်စီဖလစ်ခ်က ယာမယ်လ်အနေဖြင့် ချဲလ်ဆီးနဲ့ပွဲစဉ်မှာပြသခဲ့တဲ့ စွမ်းဆောင်ရည်ပိုင်းကို မေ့ဖျောက်ပစ်ရမယ်လို့ အားပေးစကားပြောခဲ့ပါတယ်။ ကြားရက်၊ စတမ်းဖို့ဒ်ဘရစ်ချ်ချန်ပီယံလိဂ်ပွဲစဉ်မှာ ချဲလ်ဆီးက ဘာစီလိုနာကို ၃-၀ ဂိုးဖြင့် အနိုင်ယူခဲ့သလို အရူဂျိုလည်း ထုတ်ပယ်ခံခဲ့ရပါတယ်။

အဲ့ဒီပွဲစဉ်အတွင်း ယာမယ်လ်က ဂိုးပေါက်တည့်ကန်ချက်တစ်ကြိမ်သာ ရှိခဲ့ပြီး ဘောလုံးဆွဲပြေးမှု ၁၀ ကြိမ်မှာ လေးကြိမ်သာ အောင်မြင်ခဲ့ပါတယ်။ ဒါပေမယ့် သူက တစ်ဦးချင်းရင်ဆိုင်မှု ၁၇ ကြိမ်မှာ ၁၂ ကြိမ် အနိုင်ရရှိပြီး အခွင့်အရေးကောင်းနှစ်ကြိမ် ဖန်တီးပေးခဲ့ပါတယ်။ ဒါပေမဲ့ တဖက်မှာလည်း သက်တူရွယ်တူအက်စ်တီဗာအိုက ဂိုးသွင်းယူနိုင်ခဲ့သလို တစ်နိုင်ငံတည်းသားကူကူရယ်လာရဲ့ထိန်းချုပ်မှုအောက် ရောက်ရှိနေတဲ့ အသက်-၁၈ နှစ်အရွယ်တောင်ပံကစားသမားကို ပွဲချိန်မိနစ် ၈၀ မှာ လူစားလဲလှယ်ခဲ့ပါတယ်။

ဟန်စီဖလစ်ခ်ကတော့ စနေည၊ အလာဗက်စ်နဲ့ရင်ဆိုင်ရမယ့်ပွဲစဉ်မှာ အရည်အသွေးကောင်းတွေ ထုတ်ပြရင်း စွမ်းဆောင်ရည်ကို မရပ်တန့်ထားဖို့ ယာမယ်လ်ဆီ တိုက်တွန်းခဲ့ပါတယ်။ သတင်းစာရှင်းလင်းပွဲအတွင်း ဘာစီလိုနာနည်းပြက “ လမိုင်းယာမယ်လ်ရဲ့စိတ်ခံစားချက် ကောင်းမွန်နေပါတယ်။ ကစားသမားအများစုက သူတို့ကို လူစားလဲလှယ်ချိန် မပျော်ရွှင်ကြပါဘူး။ ကျွန်တော်ကိုယ်တိုင်လည်း ကစားသမားတစ်ဦးဖြစ်ခဲ့ဖူးပြီး တခါတရံမှာ မှန်ကန်တဲ့တုံ့ပြန်ပုံမျိုး မပြသနိုင်ခဲ့ပါဘူး။ ဒါပေမဲ့ ဒီလိုကိစ္စဆိုတာ ရှိတတ်ပါတယ်။ စိတ်ခံစားမှုနဲ့ သက်ဆိုင်ပါတယ်။

ကျွန်တော့်အတွက်ဆိုရင် ကူကူရယ်လာက ကမ္ဘာ့အကောင်းဆုံးဘယ်အစွန်နောက်ခံလူတစ်ဦး ဖြစ်ပါတယ်။ သူနဲ့ယှဉ်ပြိုင်ကစားဖို့ဆိုတာ မလွယ်ကူပါဘူး။ သူက ခံစစ်မှာ အလွန်စမတ်ကျပြီး အရမ်းထက်မြက်လွန်းပါတယ်။ အခုအချိန်မှာ လမိုင်းယာမယ်လ်အတွက် နောက်ထပ်ခြေလှမ်းတစ်ခုက ချဲလ်ဆီးနဲ့ပွဲစဉ်လိုမဟုတ်ဘဲ သူ့ရဲ့အရည်အချင်းကို ထပ်မံသက်သေပြသွားဖို့ ဖြစ်ပါတယ်။ ချဲလ်ဆီးနဲ့ပွဲစဉ်အကြောင်း မေ့ပစ်လိုက်ပါ။ အလာဗက်စ်နဲ့ပွဲစဉ်သာ အရေးအကြီးဆုံးဖြစ်ပါတယ်။ ဒီပွဲစဉ်မှာ သူ့ရဲ့အကောင်းဆုံးစွမ်းဆောင်ရည်ကို ပြသသွားရပါမယ်”လို့ ပြောပါတယ်။

အလာဗက်စ်နဲ့ပွဲစဉ်ကို ခြေသလုံးဒဏ်ရာကြောင့် နှစ်ပတ်ကြာအနားယူရမယ့် ဖာမင်လိုပက်ဇ်နဲ့ အစာအိမ်ပြဿနာရှိနေတဲ့ အရူဂျိုတို့ လွဲချော်ဖွယ် ရှိနေပါတယ်။ ဒါပေမဲ့ ချဲလ်ဆီးနဲ့ပွဲစဉ်မှာ အရန်ခုံထိုင်ခဲ့ရတဲ့ ရာဖင်ဟာ၊ ရက်ရှ်ဖို့ဒ်တို့နဲ့အတူ ပက်ဒရီလည်း ဘာစီလိုနာအတွက် ပွဲထွက်ကစားပေးနိုင်မယ်လို့ မျှော်လင့်ရပါတယ်။

ဟန်စီဖလစ်ခ်က “ ရာဖင်ဟာကို ကျွန်တော် တကယ့်ကိုလွမ်းနေမိပါတယ်။ ကျွန်တော်တို့အသင်းရဲ့ အတွေးအခေါ်နဲ့ ကစားပုံပိုင်းအတွက် ရာဖင်ဟာဆိုတာ အသင်းရဲ့ အရေးအကြီးအဆုံးကစားသမားတွေထဲမှာ ပါဝင်ပါတယ်။ ကျွန်တော်တို့အသင်း ခံစစ်ကစားချိန်၊ ဖိအားပေးဖို့လိုအပ်လာတဲ့အခါ ကျွန်တော်တို့ရဲ့ကစားပွဲမှာ သူက အလွန်အပေါင်းလက္ခဏာဆောင်တဲ့ ကစားသမားတစ်ဦးဖြစ်ပါတယ်။ ခံစစ်တိုက်စစ်အကူးအပြောင်းတွေမှာလည်း သူက မယုံကြည်နိုင်လောက်အောင် ကောင်းမွန်ပါတယ်။ ပြီးခဲ့တဲ့ရာသီ၊ သူကိုယ်တိုင် ဂိုးတွေ အများကြီးသွင်းယူနိုင်ခဲ့တာ အလကားသက်သက်မဟုတ်ပါဘူး။ ပြီးခဲ့တဲ့ရာသီလိုပဲ အခုရာသီမှာလည်း ဘယ်လောက်အထိစွမ်းဆောင်ရည်ကောင်းသလဲဆိုတာ သက်သေပြနိုင်ဖို့ သူ ဆာလောင်နေပါတယ်”လို့ ပြောပါတယ်။

အလာဗက်စ်က ဆယ်လ်တာဗီဂို၊ ဂျီရိုနာတို့ကို ၁-၀ ဂိုးဖြင့် နှစ်ပွဲဆက်ရှုံးနိမ့်ပြီး အမှတ်ပေးဇယားအဆင့်-၁၄ နေရာမှာ ရပ်တည်နေပါတယ်။ သူတို့တွေက နောက်ဆုံးကစားခဲ့တဲ့လိဂ်ငါးပွဲမှာ တစ်ပွဲသာ အနိုင်ရရှိခဲ့ပါတယ်။