လေဗာကူဆင်နည်းပြ အဲရစ်တန်ဟက်က ဆန်းဒါးလန်းက ချိတ်ဆက်နေတဲ့ အသင်းရဲ့ကွင်းလယ်လူ ဂရာနစ်ဇာခါဟာ အသင်းအတွက်အလွန်အရေးပါတဲ့ကစားသမားဖြစ်တာကြောင့် ထွက်ခွာခွင့်ပြုမှာမဟုတ်ကြောင်း အခိုင်အမာပြောကြားလာခဲ့ပါတယ်။ ယခုနွေရာသီအတွင်း လေဗာကူဆင်ဟာ အသင်းရဲ့တိုက်စစ်ကြယ်ပွင့် ဖလော်ရီယန်ဝစ်ဇ်နဲ့ အရေးပါတဲ့နောက်ခံလူ ဂျရယ်မီဖရင်မ်ပေါင်တို့ကို လီဗာပူးထံဆုံးရှုံးခဲ့ရပြီးဖြစ်သလို၊ ဗဟိုခံစစ်မှူး ဂျိုနသန်တာကိုလည်း ဘိုင်ယန်မြူးနစ်က ခေါ်ယူခဲ့တာကြောင့် အဓိကကစားသမား ၃ ဦးအထိ လက်လွှတ်ထားခဲ့ရတာဖြစ်ပါတယ်။ 

ယခုအခါမှာ ပရီးမီးယားလိဂ်သို့ တန်းတက်လာခဲ့တဲ့ ဆန်းဒါးလည်းကလည်း အသင်းရဲ့ကွင်းလယ်လူ ဇာခါကို ချိတ်ဆက်လာခဲ့တာကြောင့် တန်ဟက်အနေနဲ့ အာဆင်နယ်ကြယ်ပွင့်ဟောင်းကိုတော့ ထပ်မံဆုံးရှုံးခံတော့မှာမဟုတ်ကြောင်း ပြောကြားလာခဲ့ပါတယ်။ နယ်သာလန်သားနည်းပြက "သူ့ရဲ့အေးဂျင့်ဘာပဲပြောပြော ဂရုမစိုက်ပါဘူး။ ဒီအသင်းက အရေးပါတဲ့ကစားသမား ၃ ယောက်အထိ ဆုံးရှုံးခဲ့ရပြီးပါပြီ။ နောက်ထပ်ကစားသမားတွေ ထွက်ခွာခွင့်ပြုတော့မှာမဟုတ်ပါဘူး။ ဒီလိုလုပ်မယ်ဆိုရင် အသင်းရဲ့ပုံစံပျက်သွားပါလိမ့်မယ်။ ဇာခါက အသင်းရဲ့ခေါင်းဆောင်တစ်ဦးပါ။ သူဒီမှာ ၅ နှစ်စာချုပ်ချုပ်ခဲ့ပြီး အခု ၃ နှစ်ကျန်နေပါသေးတယ်။ သူကအရေးပါလွန်းလို့ လက်လွှတ်လို့မပါဘူး" လို့ပြောကြားခဲ့ပါတယ်။ 

အသက်-၃၂ နှစ်အရွယ် ဇာခါဟာ ၂၀၂၃-၂၄ ဘောလုံးရာသီမှာ လေဗာကူဆင်နဲ့အတူ ဘွန်ဒက်စ်လီဂါ ရှုံးပွဲမရှိဘဲ အမှတ်ပေးဖလားကိုဆွတ်ခူးနိုင်ခဲ့သလို၊ အဲဒီနှစ်မှာပဲ ဂျာမန်ပြည်တွင်းဖလားရရှိအောင်စွမ်းဆောင်ပေးနိုင်ခဲ့ပါတယ်။ ဆွစ်ဇာလန်လက်ရွေးစင်ဟာ လေဗာကူဆင်အတွက် စုစုပေါင်း ၉၉ ပွဲကစားပေးထားပြီး ၆ ဂိုးသွင်းကာ ဂိုးဖန်တီးမှု ၉ ကြိမ်ပြုလုပ်ပေးထားပါတယ်။