ဘရာဇီးနဲ့ ရီးရဲလ်မက်ဒရစ်ဂန္ထဝင်ကစားသမားဟောင်း ရော်နယ်ဒိုက သူ့ရဲ့ကစားသမားဘဝတစ်လျှောက်ကြုံတွေ့ခဲ့ဖူးတဲ့ အဆိုးဝါးဆုံးအသင်းဖော်မှာ ပရီးမီးယားလိဂ်ကြယ်ပွင့်ဟောင်း သောမတ်စ်ဂရာဗီဆင်ဖြစ်တယ်လို့ ထုတ်ဖော်ပြောကြားလာခဲ့ပါတယ်။ဂရာဗီဆင်ဟာ ၂၀၀၄-၀၅ ဘောလုံးရာသီကုန်မှာ အဲဗာတန်နဲ့ စာချုပ်သက်တမ်းကုန်ဆုံးပြီးနောက် ၄ နှစ်ခွဲကြာနေထိုင်ခဲ့တဲ့ ပရီးမီးယားလိဂ်ကိုစွန့်ခွာကာ ရီးရဲလ်မက်ဒရစ်သို့ ပေါင် ၂.၅ သန်းနဲ့ပြောင်းရွှေ့ခဲ့ပါတယ်။ ရီးရဲလ်မက်ဒရစ်သို့ရောက်ရှိချိန်မှာ ဂရာဗီဆင်ဟာ ရော်နယ်ဒိုနာဇာရီယိုအပါအဝင် ကမ္ဘာ့ထိပ်တန်း ဘောလုံးကစားသမားတွေနဲ့ တွဲဖက်ကစားခွင့်ရခဲ့ပါတယ်။ 

သို့သော်လည်း ရော်နယ်ဒိုကတော့ ဂရာဗီဆင်ဟာ သူ့ရဲ့ကစားသမားဘဝတစ်လျှောက် ကြုံတွေ့ခဲ့ဖူးတဲ့ အဆိုးဝါးဆုံးအသင်းဖော်ဖြစ်တယ်လို့ ပြောကြားလာခဲ့တာဖြစ်ပါတယ်။ ဘရာဇီးကြယ်ပွင့်ဟောင်းက "ကျွန်တော် ရီးရဲလ်မက်ဒရစ်မှာတုန်းက အတော်လေးရယ်ရတဲ့ အသင်းဖော်တစ်ဦးရှိခဲ့ပါတယ်။ သူကတော့ ဂရာဗီဆင်ပါ။  ဒိန်းမတ်ကွင်းလယ်လူလေ။တကယ်ကိုမိုက်ပြီး တော်တဲ့လူတစ်ယောက်ပါ။ သိပ်မကြာခင်က သူ ပိုကာကစားရင်း ဒေါ်လာသန်း ၅၀ နိုင်တယ်လို့တော့ကြားပါတယ်။ ဒါပေမယ့် သူရဲ့ဘောလုံးကစားပုံကတော့ အရမ်းဆိုးဝါးခဲ့ပါတယ်။ ကျွန်တော်တွေ့ဖူးသမျှအသင်းဖော်တွေထဲမှာ အဆိုးဝါးဆုံးအသင်းဖော်ပါပဲ" လို့ပြောကြားခဲ့ပါတယ်။

ဂရာဗီဆင်ဟာ ဆန်တီယာဂိုဘာနေဗျူးမှာ ၁၈ လသာနေထိုင်ခဲ့ပေမယ့် စပိန်ဘောလုံးသတင်းစာတွေရဲ့ ခေါင်းကြီးပိုင်းမှာ မကြာခဏဆိုသလို ပါဝင်ခဲ့ပြီး ကြမ်းတမ်းတဲ့ကစားသမားတစ်ယောက်အဖြစ် ဂုဏ်သတင်းကျော်ကြားခဲ့ပါတယ်။ ဒါ့အပြင် ဒိန်းမတ်သားဟာ လေ့ကျင့်ရေးအစီအစဉ်မှာ ရော်ဘင်ဟိုနဲ့ ခိုက်ရန်ဖြစ်ပွားခဲ့ဖူးသလို၊ ရော်နယ်ဒိုရဲ့သွားကို ရိုက်ချိုးခဲ့တယ်လို့လည်း သတင်းတွေထွက်ပေါ်ခဲ့ပါသေးတယ်။ 

ဂရာဗီဆင်ရဲ့ စိတ်နေစိတ်ထားနဲ့ပတ်သက်ပြီး ရီးရဲလ်မက်ဒရစ်နည်းပြဟောင်း ဖာဘီယိုကာပယ်လိုက "သူက သိပ်ပြီးတော့ နှစ်မြှို့စရာကောင်းတဲ့လူတစ်ယောက်တော့မဟုတ်ပါဘူး။သူ့ကို ကျွန်တော်သွားမရှုပ်ရဲပါဘူး။ နည်းဗျူဟာအရတော့ သူက ကောင်းကောင်းအလုပ်လုပ်နိုင်ပါတယ်။ ဒါပေမယ့် သူ့ရဲ့အပြုအမူတွေကို ကျွန်တော်မကြိုက်ပါဘူး။ သူက ဘာမဆို သူ့စိတ်ကြိုက်ဖြစ်မှကျေနပ်တတ်တဲ့လူတစ်ယောက်ပါ" လို့ပြောကြားခဲ့ပါတယ်။ 

၂၀၀၆ ခုနှစ်မှာ စပိန်မြေကို စွန့်ခွာပြီး ဆဲလ်တစ်သို့ပြောင်းရွှေ့ခဲ့တဲ့ ဂရာဗီဆင်ဟာ ၂၀၀၇-၀၈ ခုနှစ်ရာသီမှာတော့ ဂူဆင်ပါ့ခ်သို့အငှားနဲ့ပြန်ရောက်လာပြီး အဲဗာတန်အတွက် ပြန်လည်ကစားပေးခဲ့ပါတယ်။ ၂၀၀၉ ခုနှစ်၊ ဇန်နဝါရီမှာတော့ ဂရာဗီဆင်ဟာ ကစားသမားဘဝမှ အနားယူကြောင်း တရားဝင်ကြေညာခဲ့ပါတယ်။