အင်္ဂလန်မြေမှာ အထိုင်ကျဖို့ ရုန်းကန်နေရဆဲဖြစ်ပြီး အသင်းဟောင်းနဲ့ ရင်ဆိုင်ဖို့ ပြင်ဆင်ထားတယ်လို့ ဖွင့်ဟလိုက်တဲ့ တိုနာလီ
နယူးကာဆယ်ကြယ်ပွင့်တိုနာလီက အင်္ဂလန်မြေမှာ အထိုင်ကျဖို့ ရုန်းကန်နေရဆဲဖြစ်တယ်လို့ ဝန်ခံလိုက်ပြီး ကလပ်အသင်းဟောင်း အေစီမီလန်နဲ့ ရင်ဆိုင်ဖို့ ပြင်ဆင်ထားတယ်လို့ ဖွင့်ဟပြောဆိုလိုက်ပါတယ်။ အခုနွေရာသီ အပြောင်းအရွှေ့ကာလအတွင်း အသက်-၂၃ နှစ်အရွယ် ကွင်းလယ်လူက ချန်ပီယံလိဂ်ပြိုင်ပွဲဝင်မယ့် နယူးကာဆယ်ဆီ ပြောင်းရွှေ့ကြေးပေါင် ၅၂ သန်းဖြင့် ရောက်ရှိလာခဲ့ပါတယ်။
တိုနာလီက “ဒီနွေရာသီကတော့ တကယ်ကိုခက်ခဲခဲ့ပြီး ကျွန်တော့်အတွက်လည်း ခက်ခဲတဲ့စတင်မှုတွေ ရှိစေခဲ့ပါတယ်။ အစပိုင်းမှာ ကျွန်တော့်အတွက် နေရာရှာဖို့ မလွယ်ကူခဲ့ပါဘူး။ ဒါပေမယ့် ကျွန်တော်က ကိုယ့်ကို ထောက်ခံပေးမယ့်သူ၊ ကူညီပေးမယ့်သူတွေ ရှာဖွေတွေ့ရှိခဲ့လို့ ပျော်ရွှင်လာခဲ့ပါတယ်။ နည်းပြဟိုဝီနဲ့ အသင်းဖော်တွေက ကျွန်တော့်အပေါ် တကယ့်ကို ကောင်းလွန်းပါတယ်။ သူတို့က ကျွန်တော့်ကို ပုဂ္ဂလိကဘဝမှာရော၊ ပရော်ဖက်ရှင်နယ်ကစားသမားဘဝမှာပါ အကူအညီတွေ ပေးနေပါတယ်။ သူတို့က ကျွန်တော့်ကို အထိုင်ကျအောင် ကူညီပေးခဲ့ပါတယ်။ အစပိုင်းမှာ ဘာသာစကားက ကျွန်တော့်အတွက် အရမ်းကို ခက်ခဲခဲ့ပါတယ်။ အသင်းဖော်တွေနဲ့ ဆက်သွယ်ပြောဆိုဖို့ကိုလည်း ကျွန်တော် အတော်လေး အကျပ်ရိုက်ခဲ့ပါတယ်။ ဒါပေမယ့် ဘာသာစကားကိစ္စက တဖြည်းဖြည်းနဲ့ လွယ်ကူလာပြီး ကျွန်တော့်ကို အရမ်းပျော်ရွှင်စေပါတယ်”လို့ ပြောပါတယ်။
အလားတူ အီတလီလက်ရွေးစင်ကွင်းလယ်ကစားသမားက အသင်းဟောင်းနဲ့ ပြန်လည်ရင်ဆိုင်ရမယ့် ဒီနေ့ညပိုင်း ချန်ပီယံလိဂ်အုပ်စုအဖွင့်ပွဲစဉ်က ထူးခြားတဲ့ခံစားမှုတစ်ခု ရှိစေပြီး ဒါက ပွဲစတင်ဖို့ ဝီစီမှုတ်လိုက်ချိန်မှာပဲ ပြဿနာတစ်ခုတော့ ဖြစ်လာဖို့မရှိဘူးလို့ ရှင်းပြလာပါတယ်။
တနင်္လာနေ့၊ သတင်းထောက်တွေနဲ့ တွေ့ဆုံချိန် တိုနာလီက “ကျွန်တော်က မီလန်မြို့မှာ ကိုယ်နဲ့ရင်းနှီးခဲ့တဲ့ လူအချို့နဲ့ တွေ့ဆုံရပြီး သူတို့နဲ့ ယှဉ်ပြိုင်ကစားသွားရပါမယ်။ ဘောလုံးမှာ အချိန်တိုင်း ဒါမျိုးဖြစ်လေ့ဖြစ်ထမရှိတာကြောင့် ခက်ခဲတဲ့စိတ်ခံစားမှုတွေ ဖြစ်စေပါတယ်။ သူတို့တွေလည်း တကယ့်ကိုကောင်းမွန်ပြီး ကျွန်တော် သူတို့ကို အမြဲတမ်းအမှတ်ရနေမှာပါ။ ဒီအသင်းက ကျွန်တော်အားပေးတဲ့အသင်းဖြစ်ပြီး ဒီအသင်းကပဲ ကျွန်တော့်ကို အောင်မြင်မှုလမ်းစ ဖော်ဆောင်ပေးခဲ့ပါတယ်။ အရာရာတိုင်းကတော့ လုံးဝကိုပြောင်းလဲသွားပါပြီ။ ကျွန်တော် မီလန်မြို့ဆီ ပြိုင်ဘက်တစ်ဦးအဖြစ် ရောက်ရှိလာမှာပါ။ ကျွန်တော်က ဒီအခြေအနေအပေါ် စီမံခန့်ခွဲရမယ်ဆိုပေမယ့် ပြဿနာတော့ မရှိပါဘူး”လို့ ပြောပါတယ်။
ဒါ့အပြင် ဖခင်ဖြစ်သူက အေစီမီလန်အမာခံပရိသတ်ဖြစ်နေမှုနဲ့စပ်လျဉ်းလို့ တိုနာလီက “အဖေ ဘယ်အသင်းကို အားပေးမလဲဆိုတာတော့ ကျွန်တော်လည်း မသိပါဘူး။ သူ့ရဲ့စိတ်ထဲမှာ ရှိနေဖို့ ကျွန်တော်မလိုလားပေမယ့် သူကလည်း ကျွန်တော့်အပေါ် ဂရုစိုက်ပေးလိမ့်မယ်လို့ ထင်ပါတယ်။ ကျွန်တော့်ကို အားပေးဖို့ မျှော်လင့်မိပေမယ့် အသင်းတစ်ခုကို အရူးအမူးကြိုက်နှစ်သက်သူတစ်ဦးရဲ့ စိတ်ကို အပြောင်းအလဲလုပ်ပေးဖို့ အတော်လေးခက်ခဲပါတယ်။ သူက အေစီမီလန်ကိုလည်း အားပေးမယ်၊ ကျွန်တော့်ကိုလည်း အားပေးမယ်လို့ ထင်ပါတယ်။ သရေရလဒ်တစ်ခု သူလိုချင်နေမလားမသိဘူး?”လို့ ဆက်ပြောခဲ့ပါတယ်။
