ဖူလ်ဟမ်ကိုအရေးနိမ့်ခဲ့တဲ့ပွဲစဉ်အတွင်း တော့တင်ဟမ်ပရိသတ်တွေရဲ့ လက်မခံနိုင်စရာလှောင်ပြောင်မှုတွေကို သောမတ်စ်ဖရန့်ခ်ကိုယ်တိုင် ပြင်းပြင်းထန်ထန်ဝေဖန်ခဲ့ပါတယ်။ ယမန်နေ့ညပိုင်း၊ ဖူလ်ဟမ်ကို ၁-၂ ဂိုးဖြင့် အရေးနိမ့်ပြီးနောက် တော့တင်ဟမ်ကိုယ်တိုင်လည်း အိမ်ကွင်းမှာ နောက်ထပ်ရှုံးပွဲတစ်ခုနဲ့ ရင်ဆိုင်လိုက်ရပါတယ်။ သောမတ်စ်ဖရန့်ခ်ရဲ့အသင်းက ပွဲအစ ခြောက်မိနစ်အတွင်းမှာတင် ပြိုင်ဘက်ဆီ ဦးဆောင်ဂိုးနှစ်ဂိုး ခွင့်ပြုပေးခဲ့ရပြီး အသင်းသမိုင်းတလျှောက် ပရီးမီးယားလိဂ်အိမ်ကွင်းပွဲစဉ်မှာ အစောဆုံးနှစ်ဂိုးပြတ်အရေးနိမ့်တဲ့ ပွဲစဉ်အဖြစ် မှတ်တမ်းဝင်သွားခဲ့ပါတယ်။

တီတီ၊ ဟယ်ရီဝီလ်ဆင်တို့ရဲ့သွင်းဂိုးတွေ ပေါ်ပေါက်လာပြီးနောက် အိမ်ကွင်းပရိသတ်တွေဆီမှ လှောင်ပြောင်သံတွေ ကျယ်ကျယ်ပြန့်ပြန့်ထွက်ပေါ်လာခဲ့ပါတယ်။ ပွဲစဉ်ပြီးဆုံးချိန်မှာလည်း ပရိသတ်တွေရဲ့မကျေနပ်မှုတွေ ဆက်လက်ဖြစ်ပေါ်နေခဲ့ပြီး တော့တင်ဟမ်လည်း ခုနစ်ရက်အတွင်း သုံးကြိမ်မြောက်ရှုံးပွဲနဲ့ ရင်ဆိုင်လိုက်ရပါတယ်။ ဒါက ၂၀၂၅ ခုနှစ်အတွင်း တော့တင်ဟမ်ရဲ့ ၁၀ ကြိမ်မြောက်အိမ်ကွင်းရှုံးပွဲဖြစ်လာခဲ့ပြီး ပြက္ခဒိန်နှစ်တစ်ခုရဲ့ အိမ်ကွင်းရှုံးပွဲအများဆုံးစံချိန်ကို လိုက်မီသွားခဲ့ပါတယ်။ သူတို့တွေက ၁၉၉၄ ခုနှစ်နဲ့ ၂၀၀၃ ခုနှစ်မှာလည်း အိမ်ကွင်းရှုံးပွဲ ၁၀ ပွဲစီ ရှိခဲ့ဖူးပါတယ်။

သောမတ်စ်ဖရန့်ခ်က “ ပွဲအစခြောက်မိနစ်အတွင်းမှာတင် နှစ်ဂိုးပြတ်ရှုံးနိမ့်သွားပြီဆိုရင် ပြန်လာနိုင်ဖို့ဆိုတာ အတော်လေးခက်ခဲသွားပါပြီ။ ဆိုးရွားတဲ့အခိုက်အတန့်တစ်ခုဆီ ရောက်ရှိနေချိန် အရာရာတိုင်းက ကိုယ့်ကို ကောင်းကောင်းဆန့်ကျင်နေတယ်လို့ ခံစားရပါတယ်။ ပထမဂိုးဆိုရင် လမ်းကြောင်းပြောင်းဝင်သွားတဲ့ ဂိုးဖြစ်ပြီး ဒုတိယဂိုးမှာလည်း ဗီကာရီယိုရဲ့အမှားတစ်ခု ဖြစ်ပါတယ်။

ကျွန်တော်တို့အသင်းပရိသတ်တွေက သူ့ကို ချက်ချင်းဆိုသလို လှောင်ပြောင်အော်ဟစ်နေတာကို ကျွန်တော် သဘောမကျပါဘူး။ နောက်မှာလည်း အကြိမ်အနည်းငယ်လောက် အော်ဟစ်လှောင်ပြောင်ခဲ့ပါတယ်။ ဒီလူတွေက တော့တင်ဟမ်အသင်းပရိသတ်စစ်စစ် မဖြစ်နိုင်ပါဘူး။ ဘာကြောင့်လဲဆိုတော့ လူတိုင်းက ကွင်းတွင်းမှာရှိနေချိန် တစ်ဦးနဲ့တစ်ဦး ကူညီဖေးမကြလို့ ဖြစ်ပါတယ်။ ကျွန်တော်တို့လည်း အကောင်းဆုံးဖြစ်အောင် အစွမ်းကုန်ကြိုးစားခဲ့ပါတယ်။

ပွဲပြီးချိန်မှာလည်း သူတို့တွေ လှောင်ပြောင်အော်ဟစ်နေပေမယ့် ကျွန်တော့်အတွက် အဆင်ပြေပါတယ်။ ပြဿနာမရှိပါဘူး။ ဒါပေမဲ့ ပွဲချိန်အတွင်းမှာတော့ ဒါမျိုး မရပါဘူး။ ကျွန်တော့်အမြင်အရ ဒါကို လုံးဝလက်သင့်ခံပေးလို့ မရပါဘူး။ ဂိုးတွေပေးလိုက်ရပြီးနောက် ပထမပိုင်းပွဲချိန်အတွင်းမှာ နည်းလမ်းပေါင်းစုံနဲ့ အရှိန်မြှင့်ယှဉ်ပြိုင်ကစားခဲ့ပါတယ်။ ပွဲစဉ်ဆီ ပြန်လာချင်ပေမယ့် ပထမပိုင်းပွဲချိန်အတွင်းမှာ မလုပ်နိုင်ခဲ့ပါဘူး။ ဒါပေမဲ့ ဒုတိယပိုင်းပွဲချိန်တွေမှာတော့ ကျွန်တော်တို့ အများကြီးပိုကောင်းလာခဲ့ပါတယ်။ကျွန်တော်တို့တွေ အရှိန်အဟုန်ရလာခဲ့ပြီး အခွင့်အရေးတွေဆက်တိုက်ဖန်တီးနိုင်ခဲ့ပေမယ့် ဒုတိယဂိုးတော့ မရရှိခဲ့ပါဘူး။

ဒုတိယပိုင်းပွဲချိန်မှာ စိတ်ခံစားမှုပြင်းထန်တဲ့စွမ်းဆောင်ရည်တစ်ခု ရှိခဲ့ပြီး ဒါကို ပုံမှန်အခြေအနေလို့ပဲ ကျွန်တော် ထင်ပါတယ်။ အိမ်ကွင်းမှာ နိုင်ပွဲရချင်တယ်ဆိုတာ ကျွန်တော်တို့သိပါတယ်။ ဒါကြောင့်ကိုယ်လိုချင်တဲ့ပုံစံအတိုင်း မဖြစ်လာချိန် အခက်တွေ့ခဲ့ပါတယ်။ ဒါကြောင့်ပဲ အစီအစဉ်အတိုင်းဆက်သွားနေဖို့၊ စိတ်အေးအေးနဲ့ မိမိကိုယ်ကိုယ် ဖိအားမပေးမိစေဖို့ မဖြစ်မနေလိုအပ်ပါတယ်။  အပြောထက် အလုပ်က ပိုခက်ခဲပါတယ်”လို့ ပြောပါတယ်။

တချိန်တည်းမှာပဲ ဖူလ်ဟမ်က တော့တင်ဟမ်ကို ၂၀၁၃ ခုနှစ် မတ်လနောက်ပိုင်း၊ ပရီးမီးယားလိဂ်အဝေးကွင်းပွဲစဉ်မှာ ပထမဆုံးအကြိမ်အနိုင်ရရှိပြီး တန်းဆင်းဇုန်နဲ့ဝေးရာဆီ လျှောက်လှမ်းလာခဲ့ပါတယ်။ ဒါ့အပြင် မာကိုဆေးလ်ဗားကလည်း ကူဒက်စ်ရဲ့ချေပဂိုးခွင့်ပြုပေးလိုက်ရပြီးနောက် အနိုင်ရလဒ်ကို ဆက်လက်ထိန်းသိမ်းထားနိုင်ဖို့ ကစားသမားတွေရဲ့ကြိုးစားအားထုတ်မှုကို ချီးကျူးဂုဏ်ပြုခဲ့ပါတယ်။

မာကိုဆေးလ်ဗားက “ ကောင်လေးတွေအတွက် အရမ်းဂုဏ်ယူမိပါတယ်။ ကျွန်တော်တို့အတွက် နိုင်ပွဲရရှိဖို့ အလွန်အရေးကြီးပါတယ်။ ပထမပိုင်းပွဲချိန်တွေမှာ ကျွန်တော်တို့အသင်း အရမ်းကောင်းအောင် စွမ်းဆောင်နိုင်ခဲ့ပါတယ်။ ကျွန်တော်တို့တွေ အခုထက်ပိုပြီး ဂိုးတွေသွင်းယူနိုင်ခဲ့သင့်တယ်။ ပထမဆုံး ၃၅ မိနစ်တာကာလအတွင်းမှာဆိုရင် ကျွန်တော်တို့တွေ ပြိုင်ဘက်ဆီ ဘယ်လိုအခွင့်အရေးမျိုးကိုမှ မပေးခဲ့ပါဘူး။ ဒုတိယပိုင်းပွဲချိန်တွေမှာတော့ ကျွန်တော်တို့တွေ ရှိသင့်ရှိထိုက်တာထက် ပိုပြီးဒုက္ခရောက်ခဲ့ပါတယ်။ ကျွန်တော်တို့အသင်း အကောင်းဆုံးမစတင်နိုင်သလို ပြိုင်ဘက်ရဲ့ယုံကြည်မှုပိုင်းလည်း မြင့်တက်လာခဲ့ပါတယ်။ ဒါပေမဲ့ အသင်းရဲ့စည်းလုံးညီညွှတ်မှုကြောင့် အဖိုးတန်သုံးမှတ်ကို ထိုက်ထိုက်တန်တန်ရရှိခဲ့ပါတယ်”လို့ ပြောပါတယ်။