အာဆင်နယ်အသင်းရဲ့ လူငယ်ပါရမီရှင်ကစားသမားလေး အီသန်နွာနီရီဟာ အသင်းအတွက် ပထမဆုံးပွဲဦးထွက်ကို စတင်ကစားပြီး နောက်တစ်နေ့မှာ အိမ်စာထပ်နိုင်ခဲ့သလိုသင်္ချာစာမေးပွဲမှာလည်း ၉၈ မှတ်အထိရရှိအောင်ဖြေဆိုနိုင်ခဲ့တာကြောင့် ကစားသမားဟာ ပညာရေးမှာလည်း အလွန်ထူးချွန်တဲ့ကျောင်းသားတစ်ယောက်ဖြစ်တယ်လို့ အသိအမှတ်ပြုခံထားရပါတယ်။ 

၂၀၂၂ ခုနှစ်၊ စက်တင်ဘာလ၊ ၁၈ ရက်နေ့ ဘရန့်ဖို့ဒ်နဲ့ယှဉ်ပြိုင်ခဲ့တဲ့ ပွဲစဉ်မှာ အာဆင်နယ်အတွက် စတင်ပွဲထွက်ကစားခဲ့တဲ့ နွာနီရီဟာ ထိုစဉ်က အသက်-၁၅ နှစ်နဲ့ ၁၈၁ ရက်သာရှိသေးတာကြောင့် ပရီးမီးယားလိဂ်ရဲ့ အသက်အငယ်ဆုံးကစားသမားဖြစ်လာခဲ့သလို၊ တစ်ဖက်မှာလည်းသူဟာ စိန့်ဂျွန်းစီနီယာကျောင်းရဲ့ ကျောင်းသားတစ်ယောက်အဖြစ် ပညာသင်ကြားနေဆဲဖြစ်ခဲ့ပါတယ်။ 

နွာနီရီနဲ့ပတ်သက်ပြီး သူ့ရဲ့ကျောင်းဆရာ အယ်လီဘျူလီက "အခုပြောမယ့်စကားတွေက နောက်ပြောင်ပြီးပြောတာမဟုတ်ပါဘူး။ တနင်္ဂနွေနေ့မှာ အာဆင်နယ်အတွက် ကစားပေးခဲ့တဲ့ နွာနီရီက တနင်္လာနေ့မှာ ကျောင်းခန်းထဲရောက်နေပြီး အိမ်စာလာထပ်ပါတယ်။ သူ့ကိုကြည့်ရတာ သာသာယာယာပါပဲ။ ဘာဖိအားမှရှိနေတဲ့ပုံမပေါ်ပါဘူး" လို့ပြောကြားခဲ့ပါတယ်။သောကြာနေ့မှာ အသက်-၁၈ နှစ်ပြည့်ခဲ့တဲ့ နွာနီရီဟာ သူ့ရဲ့မွေးနေ့ကို သာမန်လူတစ်ယောက်လို ပါတီတွေပေးပြီးဖြတ်သန်းခြင်းမရှိဘဲ လီကာစလေရဲ့ အင်္ဂလန်ယူ-၂၁ အသင်းမှာ ပုံမှန်အတိုင်းလေ့ကျင့်ရေးဆင်းနေပါတယ်။ 

ယခုရာသီမှာ ကစားသမားဟာ မီခေးလ်အာတီတာရဲ့အာဆင်နယ်အတွက် ပြိုင်ပွဲစုံ ၈ ဂိုးအထိသွင်းယူထားနိုင်ပြီး အသင်းရဲ့အနာဂတ်အတွက် အားကိုးရမယ့်ကစားသမားတစ်ယောက်အဖြစ် ရှုမြင်ခံထားရပါတယ်။ အသက်ငယ်ပေမယ့် နွာနီရီဟာ ရင့်ကျက်ပြီး နှိမ့်ချတာကြောင့် အာဆင်နယ်ပရိသတ်တွေရဲ့ အချစ်တော်ကစားသမားတစ်ဦးအဖြစ်လည်း ရပ်တည်ထားနိုင်တာဖြစ်ပါတယ်။ အခုလို နွာနီရီတစ်ယောက် ငယ်ငယ်ရွယ်ရွယ်နဲ့ဘက်စုံထူးချွန်နေခြင်းမှာ ဖခင်ဖြစ်သူရဲ့လမ်းညွှန်ပြသမှုတွေကြောင့်ဖြစ်တယ်လို့လည်းသိရပါတယ်။ 

၂၀၂၃ ခုနှစ်၊ မေလက ဟန်ဂေရီနဲ့ယှဉ်ပြိုင်ခဲ့ရတဲ့ ယူ-၁၇ ဥရောပချန်ပီယံရှစ်ပြိုင်ပွဲမှာ နွာနီရီဟာ ညဘက်တွေမှာ အပြင်ထွက်ပြီး အချိန်ဖြုန်းနိုင်ခဲ့ခြင်းမရှိဘဲ အာဆင်နယ်အကယ်ဒမီအသင်းဖော် လူးဝစ်စကယ်လီနဲ့အတူ ဟိုတယ်ထဲမှာ စာမေးပွဲအတွက် စာကျက်နေခဲ့ရတယ်လို့သိရပါတယ်။ သတင်းတွေအရ နွာနီရီရဲ့ဖခင်က ပညာရေးဟာ ဘောလုံးထက်ပိုအရေးကြီးတယ်လို့ ခံယူထားသူဖြစ်တယ်လို့သိရပါတယ်။ ဒါကြောင့် ကစားသမားဟာ အထက်ကျောင်းမှာ ဘောလုံးထက်စာရင် ပညာရေးဘက်ကိုပဲ ပိုမိုအချိန်ပေးခဲ့ရတာဖြစ်ပါတယ်။ 

နွာနီရီဟာ ဘာသာရပ်တွေထဲမှာ သင်္ချာကိုအတော်ဆုံးဖြစ်တယ်လို့သိရပြီး ကျောင်းဝင်စာမေးပွဲမှာ ရမှတ် ၉၈ မှတ်အထိရရှိအောင်ဖြေဆိုနိုင်ခဲ့ပါတယ်။ကစားသမားနဲ့ပတ်သက်ပြီး ကျောင်းအုပ်ဆရာ အလက်ဇန်းဒါးတာဒီယော့စ်က "နွာနီရီက ပညာပါရမီထူးချွန်တဲ့ ဘောလုံးသမားပါ။ အနာဂတ်မှာသူ့အနေနဲ့ ကင်းစ်ကောလိပ်မှာ ဘွဲ့ရနိုင်သလို၊ ချန်ပီယံလိဂ်ကိုလည်း လွယ်လွယ်ကူကူပဲဆွတ်ခူးနိုင်ချေရှိပါတယ်" လို့ပြောကြားခဲ့ပါတယ်။ 

နွာနီရီဟာ ကျောင်းသားဘဝမှာ စာမေးပွဲတိုင်းကိုဖြေဆိုထားနိုင်သူဖြစ်ပြီး ဘယ်စာမေးပွဲကိုမှ လွဲချော်ခဲ့ခြင်းမရှိဘူးလို့သိရပါတယ်။ ကျောင်းပိတ်ရက်တွေမှာတော့ သူဟာ အာဆင်နယ်အသင်းဖော် လူးဝစ်စကယ်လီနဲ့အတူ အချိန်ပိုလေ့ကျင့်ရေးအစီအစဉ်တွေကို ပြုလုပ်လေ့ရှိပါတယ်။ အာဆင်နယ်လို့ အသင်းကြီးတစ်သင်းအတွက် အရေးပါတဲ့ကစားသမားတစ်ယောက်ဖြစ်လာချိန်၊ အသင်းဖော်တွေက ဇိမ်ခံကစားကိုယ်စီနဲ့ဖြစ်နေကြချိန်မှာ နွာနီရီကတော့ အိမ်ကနေလာခေါ်မယ့်အချိန်ကို ကားပါကင်မှာ ထိုင်စောင့်နေလေ့ရှိပါတယ်။ 

နွာနီရီဟာ အသက်-၈ နှစ်အရွယ် ၂၀၁၅ ခုနှစ်၊ မေလမှာ အာဆင်နယ်ရဲ့ အသက်-၉ နှစ်အောက်အကယ်ဒမီသို့စတင်ရောက်ရှိလာခဲ့ပြီး ထိုစဉ်က ဝက်စ်ဘရွန်းကို အနိုင်ရခဲ့တဲ့ ပရီးမီးယားလိဂ်ပွဲစဉ်မှာ အာဆင်နယ်ပရိသတ်တွေနဲ့ စတင်တွေ့ဆုံခွင့်ရခဲ့ပါတယ်။ ၄ နှစ်ခွဲအကြာမှာတော့ သူဟာ အာတီတာရဲ့မျက်စိကျခြင်းကို ခံခဲ့ရပါတယ်။ ထို့နောက်သိပ်မကြာမီ အသက်-၁၄ နှစ်အရွယ်မှာပဲ သူဟာ အာဆင်နယ်ယူ-၁၈ အသင်းရဲ့ပွဲစဉ်မှာ စတင်ပါဝင်ကစားခွင့်ရခဲ့ပါတယ်။ 

လူငယ်ကစားသမားဘဝမှာတော့ နွာနီရီဟာ နံပါတ်-၁၀၊ နံပါတ်-၈၊ ဗဟိုတိုက်စစ်မှူး၊ တောင်ပံကစားသမား စသဖြင့် နေရာမျိုးစုံမှာ ပြောင်းလဲကစားခဲ့ရဖူးပါတယ်။ အာဆင်နယ်ကွင်းလယ်လူဟောင်း စတိဗ်မောရိုးက နွာနီရီနဲ့ပတ်သက်ပြီး "ကျွန်တော်တို့ အမြဲတမ်း အသက်အရွယ်နဲ့မလိုက်တဲ့ခြေစွမ်းမျိုးရှိတဲ့ကလေးတွေကို စောင့်ကြည့်လေ့ရှိပြီး သူတို့ရဲ့အတွေးအခေါ်တွေကိုလည်း စစ်ဆေးနေပါတယ်။

 အသက်-၁၁၊ ၁၂ နှစ်အရွယ်မှာ သူတို့ရဲ့ထင်ရှားတဲ့အမူအကျင့်တွေကို မှတ်တင်းတင်ထားပါတယ်။ သူတို့ရဲ့ ဟန်ချက်ညီမှု၊ စွမ်းအားနဲ့ အလားအလာတွေက ဘယ်အထိရောက်နိုင်မလဲပေါ့။ နွာနီရီကတော့ အကုန်လုံးမှာ ပြီးပြည့်စုံတဲ့ကလေးတစ်ယောက်ပါ။ မယုံနိုင်လောက်အောင်သန်မာပြီး အများကြီးတိုးတက်လာဦးမယ်လို့ထင်ပါတယ်"

"တနင်္ဂနွေနေ့တွေမှာ သူ့ရဲ့ခြေစွမ်းကိုကြည့်ဖို့ အသင်းရဲ့အကယ်ဒမီကိုသွားရင် သူက ဂိုးတွေကို အသာအယာပဲဆက်တိုက်သွင်းယူနေခဲ့တာကို မြင်တွေ့ခဲ့ရပါတယ်။ သူ့ရဲ့ သန့်စင်တဲ့ပါရမီ၊ ဉာဏ်ပညာထက်သန်မှုနဲ့ နည်းစနစ်တွေက အထင်ကြီးစရာပါ။ ပြီးတော့ ကိုယ်ကာယကြံ့ခိုင်မှုအပိုင်းမှာလည်း သူကအတော်လေးအားကောင်းပါတယ်" လို့ပြောကြားခဲ့ပါတယ်။ 

၂၀၂၃ ခုနှစ်၊ နွေရာသီအရောက်မှာ နွာနီရီကို ပြိုင်ဘက်ပရီးမီးယားလိဂ်ထိပ်သီးကလပ်တွေဖြစ်တဲ့ မန်ချက်စတာယူနိုက်တက်၊ ချဲလ်ဆီးနဲ့ မန်ချက်စတာစီးတီးတို့က ခေါ်ယူဖို့ချိတ်ဆက်မှုတွေပြုလုပ်ခဲ့ကြပေမယ့် ကစားသမားဟာ အာဆင်နယ်မှာပဲဆက်လက်နေထိုင်ခဲ့ပြီး ၂၀၂၄ ခုနှစ်၊ မတ်လမှာ ပထမဆုံးအကြိမ် ပရော်ဖက်ရှင်နယ်ကစားသမားဘဝ စာချုပ်ကို ချုပ်ဆိုခဲ့ပါတယ်။ 

ပြီးခဲ့တဲ့ဒီဇင်ဘာလက အာဆင်နယ်ရဲ့အဓိကတောင်ပံကစားသမား ဘူကာယိုဆာကာဒဏ်ရာကြောင့် ကာလရှည်အနားယူရချိန်မှာ နွာနီရီတစ်ယောက် ပုံမှန်ပွဲထွက်ခွင့်စတင်ရရှိခဲ့ပြီး အခွင့်အရေးကို အမိအရဆုပ်ကိုင်နိုင်ခဲ့ကာ ပရီးမီးယားလိဂ်မှာရော၊ ချန်ပီယံလိဂ်ပြိုင်ပွဲမှာပါ တောက်ပလာခဲ့ပါတယ်။ လက်ရှိ အာဆင်နယ်ယူ-၁၈ နည်းပြ အဒမ်ဘာချယ်လ်က "ကျွန်တော်တို့သူ့ကို အခြားကစားသမားတွေနဲ့ တန်းတူပဲဆက်ဆံခဲ့ပါတယ်။ ဒီလိုတန်းတူညီမျှဆက်ဆံမှုက ဘယ်လောက်အထိအရေးကြီးတယ်ဆိုတာ သူ့မိဘတွေလည်း ကောင်းကောင်းနားလည်ပါတယ်။ ဒါက အဓိကကျတဲ့အရာတစ်ခုပါ။ ပြီးတော့ တန်းဖိုးလည်းရှိပါတယ်။ သူ့ကို စိတ်ဓာတ်ပိုင်းမှာရော၊ ခြေစွမ်းပိုင်းမှာပါ အကောင်းဆုံးဖြစ်စေဖို့ ကျွန်တော်တို့လမ်းညွှန်ခဲ့ပါတယ်။ ဒါက အာဆင်နယ်အကယ်ဒမီကစားသမားတစ်ယောက်ကို ပုံသွင်းတဲ့နည်းလမ်းပါပဲ" လို့ပြောကြားခဲ့ပါတယ်။