မန်ချက်စတာယူနိုက်တက်နည်းပြရူဘင်အာမိုရင်က အသင်းရဲ့ကွင်းလယ်ကြယ်ပွင့် ကိုဘီမိုင်နူးကို ယခုရာသီအစပွဲစဉ်တွေမှာ ဘာကြောင့်အသုံးမပြုသလဲဆိုတာရှင်းပြလာခဲ့ပြီး ကစားသမားအနေနဲ့ နေရာအတွက် တိုက်ပွဲဝင်သွားရမယ်လို့ ဆိုလာခဲ့ပါတယ်။ 

မိုင်နူးဟာ ယခုနှစ်ရာသီ ယူနိုက်တက်ရဲ့ပထမဆုံးပရီးမီးယားလိဂ်အဖွင့်ပွဲစဉ် ၂ ပွဲမှာ အရန်လူစာရင်းထဲပါဝင်ခဲ့ပေမယ့် ၂ ပွဲစလုံးမှာ လူစားလဲဝင်ရောက်ကစားခွင့်မရခဲ့ပါဘူး။ ယူနိုက်တက်အနေနဲ့လည်း အဆိုပါပွဲစဉ် ၂ ပွဲစလုံးမှာ အနိုင်မရခဲ့ဘဲ အာဆင်နယ်ကို ၀-၁ နဲ့ရှုံးနိမ့်ပြီး ဖူလ်ဟမ်ကို ၁-၁ နဲ့သရေကျခဲ့ပါတယ်။ 

ယခုအခါမှာ အာမိုရင်ကို ဘာကြောင့် အကယ်ဒမီကြယ်ပွင့်ကို အသင်းမှာ ကစားခွင့်မပြုသလဲလို့မေးမြန်းခဲ့ရာ ပေါ်တူဂီသားနည်းပြက ကစားသမားအနေနဲ့ အသင်းခေါင်းဆောင် ဘရူနိုဖာနန်ဒက်စ်နဲ့အပြိုင် နေရာအတွက် တိုက်ပွဲဝင်သွားဖို့လိုအပ်ကြောင်း ပြောကြားလာခဲ့ပါတယ်။ 

ဖူလ်ဟမ်ကို သရေကျပြီးနောက် ပွဲပြီးသတင်းစာရှင်းလင်းပွဲမှာ အာမိုရင်က "မိုင်နူးက ဘရူနိုနဲ့ နေရာအတွက် တိုက်ပွဲဝင်နေပါတယ်။ ကျွန်တော့်အနေနဲ့ ကွင်းလယ်ကစားသမား ၂ ယောက်အသုံးပြုပြီး ကစားကွက်ဖော်မယ်ဆိုရင် မေဆင်မောင့်ကိုလိုအပ်ပါတယ်။ အသင်းက ဂိုးရဖို့ မေဆင်မောင့်ပါမှဖြစ်ပါတယ်။ ဒါကြောင့် မိုင်နူးအနေနဲ့ နေရာရဖို့အတွက် အသင်းရဲ့လေ့ကျင့်ရေးအစီအစဉ်တွေမှာလည်း ဘရူနိုနဲ့ ယှဉ်ပြိုင်သွားရပါမယ်။ မန်ချက်စတာယူနိုက်တက်မှာ နေရာအတွက်တိုက်ပွဲတွေက မထူးဆန်းပါဘူး" လို့ပြောကြားခဲ့ပါတယ်။

မိုင်နူးဟာ ၂၀၂၃ ခုနှစ်မှာ ယူနိုက်တက်အကယ်ဒမီမှ အသင်းကြီးသို့ စတင်ဝင်ရောက်ကစားခွင့်ရခဲ့တာဖြစ်ပြီး အဆိုပါ ၂၀၂၃-၂၄ ရာသီမှာ ပြိုင်ပွဲစုံ ၃၂ ပွဲအထိ ကစားခွင့်ရခဲ့ပါတယ်။ ဒါ့အပြင် အဆိုပါရာသီမှာပဲ အင်္ဂလန်လက်ရွေးစင်ဟာ အက်ဖ်အေဖလားဗိုလ်လုပွဲအတွင်း ဂိုးသွင်းယူပြီး ယူနိုက်တက်နဲ့အတူ ဆုဖလားအောင်မြင်မှုစတင်ရရှိခဲ့ပါတယ်။ ထို့နောက်မှာတော့ မိုင်နူးဟာ အင်္ဂလန်လက်ရွေးစင်အသင်းမှာ ရွေးချယ်ခံခဲ့ရပြီး ၂၀၂၄ ယူရိုပြိုင်ပွဲမှာ အင်္ဂလန်ကို ဗိုလ်လုပွဲအထိရောက်ရှိအောင် စွမ်းဆောင်ပေးနိုင်ခဲ့ပါတယ်။
 
လာမယ့် ကြာသပတေးနေ့မှာတော့ ယူနိုက်တက်ဟာ ကာရာဘောင်ဖလား ဒုတိယအဆင့်ပွဲစဉ်အဖြစ် အင်္ဂလန်လိဂ် ၂ ကလပ် ဂရင်စ်ဘီတောင်းနဲ့ ယှဉ်ပြိုင်သွားရမှာဖြစ်ပြီး အဆိုပါပွဲစဉ်မှာတော့ မိုင်နူးတစ်ယောက် စတင်ပါဝင်ခွင့်ရရှိသွားမလား စောင့်ကြည့်ရပါမယ်။