အိမ်ကွင်း အီသီဟက်မှာ ၃-၂ ဂိုးဖြင့် ရီးရဲလ်မက်ဒရစ်ကို ရှုံးနိမ့်ခဲ့ပြီး အင်္ဂါနေ့ညမှာတော့ မန်စီးတီးရဲ့ ရုန်းကန်ရမှုက နောက်ထပ်ရှိနေခဲ့တာဖြစ်ပါတယ်။ ပက်ဂွါဒီယိုလာရဲ့ အသင်းဟာ ယခင်ရာသီများတွင် မမြင်ဖူးတဲ့ အားနည်းချက်များကို ပြသခဲ့ပြီး အထူးသဖြင့် ကြီးမားတဲ့ပွဲစဉ်များတွင် ရုန်းကန်ခဲ့ရပါတယ်။ ထိုပွဲစဉ်များတွင် အာဆင်နယ်အား ၅-၁ ဂိုး ၊ ပီအက်စ်ဂျီအား ၄-၂ ဂိုး ၊ ယူနိုက်တက်အား ၂-၁ ဂိုးနှင့်ရှုံးကာ ဖီယင်နုနှင့်ပွဲမှာလည်း ဦးဆောင်ဂိုး ၃ ဂိုးရရှိပြီးမှ ချေပဂိုးများ ဆက်တိုက်ပေးလိုက်ရကာ သရေဖြင့် ပွဲပြီးဆုံးခဲ့ခြင်းများ ပါဝင်နေပါတယ်။

ယခုအခါ ယူနိုက်တက်ရဲ့ ကပ္ပတိန်ဟောင်းဖြစ်သူ ရွိုင်ကိန်း က ဂွါဒီယိုလာရဲ့ အသင်းကို ဝေဖန်လိုက်ပြီး ၎င်းတို့ရဲ့ ပြဿနာတွေဟာ ပြီးခဲ့တဲ့နှစ် ဆုဖလားရရှိကာ ဘီယာပါတီကျင်းပပြီးနောက် စတင်ခဲ့တယ်လို့ အံ့သြဖွယ် ပြောဆိုခဲ့ပါတယ်။ Stick to Football အစီအစဉ်တွင် ရွိုင်ကိန်းက "မန်စီးတီးဟာ ပြီးခဲ့တဲ့နှစ်က ပရီးမီးယားလိဂ်ဖလား ရပြီးနောက် ယူနိုက်တက်ကို အက်ဖ်အေဖလားဖိုင်နယ်တွင် ရှုံးနိမ့်ခဲ့ပါတယ်" 

"အဲ့ဒီအချိန်ကစပြီး သူတို့က ဘယ်ပွဲတွေမှာ ကောင်းမွန်စွာကစားခဲ့သလဲ။ သူတို့က ပရီးမီးယားလိဂ်ဖလားကို ရရှိပြီးနောက် ဘယ်ပွဲကြီးပွဲကောင်းကို အနိုင်ရခဲ့သလဲ" လို့ ပြောပါတယ်။ ပြီးခဲ့တဲ့ရာသီတွင် ပရီးမီးယားလိဂ်ဖလားကို ဇာတ်လမ်းဆန်းစွာဖြင့် ရရှိခဲ့ပြီးနောက် စီးတီးကြယ်ပွင့်တွေဟာ မန်ချက်စတာမြို့လမ်းများပေါ်တွင် သမိုင်းဝင် စတုတ္ထမြောက် ပရီးမီးယားလိဂ်ချန်ပီယံဆု အောင်ပွဲခံမှုကို ချက်ချင်းကျင်းပခဲ့ကြပါတယ်။

ထိုပျော်ပွဲရွှင်ပွဲတွေက ဘားများသို့ ရောက်သွားခဲ့ပြီး Fenix ဂရိစားသောက်ဆိုင်တွင် နံနက် ၅ နာရီအထိ ကျင်းပခဲ့ကြပါတယ်။ ကစားသမားတွေက ၎င်းတို့ရဲ့ ဇနီးများနှင့် ချစ်သူများကို ခေါ်ဆောင်လာခဲ့ကြပါတယ်။ ထို့နောက်မကြာမီတွင် မန်စီးတီးဟာ အက်ဖ်အေဖလားဖိုင်နယ်ပွဲတွင် ယူနိုက်တက်ကို ၂-၁ ဂိုး ဖြင့် ရှုံးနိမ့်ခဲ့ပြီး အချို့ပရိသတ်တွေကတော့ ထိုရှုံးနိမ့်မှုကို ပြီးခဲ့တဲ့ရက်သတ္တပတ်က ဘီယာပါတီကျင်းပမှုနှင့် ဆက်စပ် ပြောကြားခဲ့ကြပါတယ်။

စီးတီးကြယ်ပွင့်တွေဟာ မေလတွင် ဖီနစ်မှ နံနက် ၅ နာရီတွင် ထွက်လာခဲ့ကြပြီး ရိုဒရီ နှင့် ဒီဘရိုင်းတို့က ပင်ပန်းနွမ်းနယ်နေပုံရပါတယ်။ ရွိုင်ကိန်းက သူတို့ရဲ့ ရုန်းကန်မှုများ၏ အကြောင်းရင်းကို သူသိပြီလို့ ညွှန်းဆိုခဲ့သော်လည်း စီးတီးခံစစ်မှူး အကီကတော့ ယခုရာသီတွင် မည်သည့်အကြောင်းအရာကြောင့် ရုန်းကန်နေရသည်ကို အတိအကျမသိကြောင်း ဝန်ခံခဲ့ပါတယ်။

"နောက်ဆုံး ၅ မိနစ်အတွင်း ၂ ဂိုး ပေးလိုက်ရတာက စိတ်ပျက်စရာဖြစ်ပြီး ဒီရာသီမှာ အခုလိုဖြစ်နေတဲ့အတွက် သင်ခန်းစာယူရန် လိုအပ်တယ်" လို့ အကီက ပြောကြားခဲ့ပါတယ်။ထိုသို့ဖြစ်ရတဲ့ အကြောင်းရင်းကို မေးမြန်းရာတွင် အကီက "အကြောင်းရင်းကို ရှာဖွေနေဆဲပါ။ အသေးစိတ်အချက်တွေကြောင့် ဖြစ်နိုင်ပါတယ်။ အချို့ပွဲစဉ်များတွင် ဒီလိုဖြစ်နိုင်သော်လည်း ရီးရဲလ်မက်ဒရစ်လို အသင်းကြီးတွေနဲ့ ကစားပါက အခုလိုတော့ မဖြစ်သင့်ပါဘူး။ နောက်ပွဲစဉ်များတွင် ပြင်ဆင်ရန် လိုအပ်ပါတယ်" လို့ ဖြည့်စွက်ပြောကြားခဲ့ပါတယ်။

အန်ဆယ်လော့တီရဲ့အသင်းက စီးတီးကို အလွယ်တကူကျော်ဖြတ်နိုင်ခဲ့တာက စိုးရိမ်ဖွယ်ရာဖြစ်ကြောင်း အကီက ဝန်ခံခဲ့ပါတယ်။ ရီးရဲလ်မက်ဒရစ်ဟာ မိနစ် ၉၀ အတွင်း ဂိုးပေါက်ကန်သွင်မှု အကြိမ် ၂၀ နှင့် ဂိုးပေါက်တည့်မှု ၈ ကြိမ်အထိ ရှိခဲ့တာဖြစ်ပါတယ်။ "ဒီလို ကစားသမားတွေနဲ့ ကစားပါက ဒီလိုအခွင့်အရေးတွေကို ပေးရမည်မှာ သေချာပါတယ်။သို့သော်လည်း ခံစစ်နှင့် အသင်းတစ်ခုလုံးအနေနဲ့ ပိုမိုကောင်းမွန်စွာ ကစားရန် လိုအပ်ပါတယ်"

"အများအားဖြင့် ကျွန်တော်တို့က သူတို့ကို ကာကွယ်နိုင်ခဲ့ပါတယ်။ အီဒါဆင်က တော်တော်များများကာကွယ်ခဲ့ပါတယ်။ဒါပေမဲ့ နောက်ဆုံးတွင် ၂-၁ ဂိုးဖြင့် ဦးဆောင်နေသော်လည်း အနိုင်မရခဲ့တာက အဓိကပြဿနာဖြစ်ပါတယ်" လို့ အကီက ပြောပါတယ်။