အာဆင်နယ်နဲ့ပွဲစဉ်မတိုင်ခင် ကိုးလ်ပယ်လ်မာ ဘောလုံးပြန်ကစားနိုင်ပြီလို့ အတည်ပြုခဲ့တဲ့ မာရက်စ်ကာ
ခြေချောင်းရိုးကျိုးဒဏ်ရာမှ ပြန်သက်သာလာပြီးနောက် အာဆင်နယ်နဲ့ရင်ဆိုင်ရမယ့်ပွဲစဉ်အတွက် ကိုးလ်ပယ်လ်မာပါဝင်ကစားဖို့ ကြံ့ခိုင်မှုအပြည့်အဝရှိနေတယ်လို့ အန်ဇိုမာရက်စ်ကာက အတည်ပြုခဲ့ပါတယ်။ လတ်တလောမှာ မာရက်စ်ကာက ကိုးလ်ပယ်လ်မာကို လာမယ့်တနင်္ဂနွေနေ့၊ စတမ်းဖို့ဒ်ဘရစ်ချ်မှာ အာဆင်နယ်ကို ဧည့်ခံရမယ့်ပွဲစဉ်အတွက် ထုတ်ပယ်ထားဖို့ ဆုံးဖြတ်ခဲ့ပေမယ့် ကစားသမားကိုယ်တိုင်ကတော့ မူလအချိန်ဇယားထက် စောပြီး ဘောလုံးကွင်းဆီ ပြန်လာနိုင်ခဲ့ပါတယ်။
ဒါက ပရီးမီးယားလိဂ်အမှတ်ပေးဇယားဦးဆောင်သူတွေကို အနိုင်ယူဖို့ဆိုတဲ့ ချဲလ်ဆီးရဲ့မျှော်လင့်ချက်ကို အကြီးအကျယ်အားဖြည့်ပေးနိုင်ပါတယ်။ ပယ်လ်မာနဲ့ပတ်သက်လို့ မာရက်စ်ကာက “ သူ ပွဲထွက်ဖို့နဲ့ ပါဝင်ကစားဖို့ အဆင်သင့်ဖြစ်နေပါပြီ။ အသင်းဖော်တွေအပါအဝင် လူတိုင်းလူတိုင်း ပျော်ရွှင်နေကြပါတယ်။ အရေးအကြီးဆုံးအရာကတော့ ပယ်လ်မာကိုယ်တိုင် ပျော်ရွှင်နေဖို့ ဖြစ်ပါတယ်။ ဘာကြောင့်လဲဆိုတော့ ဘောလုံးသမားတစ်ဦးဆိုတာ ပွဲစဉ်တိုင်းကို ပါဝင်ကစားချင်ပြီး နေ့စဉ်နေ့တိုင်း ဆုံးဖြတ်ချက်တွေ ချမှတ်ချင်ကြပါတယ်”လို့ ပြောပါတယ်။
ပယ်လ်မာက အခုရာသီ၊ ပရီးမီးယားလိဂ်ပွဲစဉ် သုံးခုမှာ စုစုပေါင်း ၁၄၅ မိနစ်သာ ကစားထားနိုင်ပါတယ်။ ဒါ့အပြင် အင်္ဂလန်လက်ရွေးစင်က ၂၀၂၅-၂၀၂၆ ဘောလုံးရာသီမှာ ထိပ်တန်းလိဂ်သွင်းဂိုး တစ်ဂိုးပဲ ရရှိထားပါတယ်။ မာရက်စ်ကာက “ ပယ်လ်မာက ကျွန်တော်တို့ရဲ့အကောင်းဆုံးကစားသမား ဖြစ်ပါတယ်။ သူပြန်ကစားနိုင်လို့ ကျွန်တော်တို့ ပျော်ရွှင်မိပါတယ်။ သူ့အတွက် ရာနှုန်းပြည့်ကြံ့ခိုင်မှုရရှိဖို့ အချိန်ပေးသွားရပါမယ်။ အတိတ်မှာ သူကိုယ်တိုင် အကောင်းဆုံးလုပ်ပြခဲ့ပြီးပါပြီ။ အနာဂတ်မှာလည်း ဒီကလပ်အသင်းအတွက် သူကိုယ်တိုင် အကောင်းဆုံးလုပ်ပြလိမ့်မယ်ဆိုတာ သံသယမရှိလိုက်ပါနဲ့”လို့ ပြောပါတယ်။
ပယ်လ်မာမကစားနိုင်ချိန် ချဲလ်ဆီးအတွက် ကစားသမားအများအပြား ခြေစွမ်းပြပေးခဲ့ပါတယ်။ ဒီကစားသမားတွေထဲမှာ ကလပ်အသင်းနဲ့ နိုင်ငံ့လက်ရွေးစင်အသင်းအတွက် အစွမ်းပြနေတဲ့ အက်စ်တီဗာအိုလည်း ပါဝင်ပါတယ်။ အက်စ်တီဗာအိုနဲ့ ပယ်လ်မာတို့ တွဲဖက်ကစားနိုင်မယ်လို့ ယုံကြည်ထားသလားဆိုတဲ့ မေးခွန်းကို မာရက်စ်ကာက “ သူတို့နှစ်ဦး အတူတူတွဲဖက်ကစားနိုင်ပေမယ့် ဒါက ပွဲအစီအမံအပေါ်မှာလည်း မူတည်ပါတယ်။ သူတို့နှစ်ဦးလုံး စိတ်လှုပ်ရှားနေမယ်ဆိုတာ သေချာပါတယ်။ ပရိသတ်တွေလည်း စိတ်လှုပ်ရှားနေသလို ကျွန်တော်တို့လည်း စိတ်လှုပ်ရှားနေပါတယ်။ သူတို့နှစ်ဦးအကြား ဟန်ချက်ညီအောင်လုပ်သွားဖို့လည်း လိုအပ်ပါတယ်”လို့ တုံ့ပြန်ဖြေကြားခဲ့ပါတယ်။
တချိန်တည်းမှာပဲ အာဆင်နယ်နည်းပြအာတီတာက ဘိုင်ယန်မြူးနစ်ကိုအနိုင်ရရှိတဲ့ပွဲစဉ်မှာ ဒဏ်ရာရရှိသွားတဲ့ ထရိုဆက်ဒ်ဟာ ချဲလ်ဆီးနဲ့ရင်ဆိုင်ရမယ့်ပွဲစဉ်ကို ပါဝင်ကစားဖို့ မသေချာဘူးလို့ ပြောပါတယ်။
