အာဂျင်တီးနားအသင်းခေါင်းဆောင် လီယွန်နယ်မက်ဆီ ဒဏ်ရာကြောင့် အသင်းမှနုတ်ထွက်ခဲ့ပြီးနောက် ယခုအခါမှာ အဓိကတိုက်စစ်မှူး လော်တာရိုမာတီနက်ဇ်ကလည်း ဒဏ်ရာပြဿနာကြောင့် အသင်းကနေ နုတ်ထွက်ထားခဲ့တယ်လို့သိရပါတယ်။ 

အင်တာမီလန်ကြယ်ပွင့်ဟာ ဘယ်ဘက်တံကောက်ကြောကြွက်သားဒဏ်ရာရရှိခဲ့တာဖြစ်ပြီး ယခုအခါမှာ အာဂျင်တီးနားအနေနဲ့ အသင်းရဲ့အဓိကတိုက်စစ်ကစားသမားတွေမပါဝင်ဘဲ မတ်လကမ္ဘာ့ဖလားခြေစစ်ပွဲစဉ်တွေ ကစားသွားရတော့မှာဖြစ်ပါတယ်။ မာတီနက်ဇ်ဟာ လေ့ကျင့်ရေးကွင်းအတွင်း ဒဏ်ရာရရှိခဲ့တာဖြစ်ပြီး ဆေးကုသမှုခံယူဖို့အတွက် အာဂျင်တီးမှထွက်ခွာကာ အီတလီသို့ ပြန်သွားခဲ့ပြီဖြစ်ပါတယ်။ 

အင်္ဂါနေ့က အသင်းခေါင်းဆောင်မက်ဆီဟာ ကြွက်သားဒဏ်ရာနဲ့ အသင်းကနေနုတ်ထွက်ပြီး အင်တာမီယာမီမှာပဲ ဆက်လက်ကျန်ရှိခဲ့သလို၊ ယခုအခါမှာ မာတီနက်ဇ်ကပါ ထပ်မံနုတ်ထွက်ခဲ့တာကြောင့် အာဂျင်တီးနားနည်းပြ လီယွန်နယ်စကာလိုနီအတွက် အသင်းရဲ့တိုက်စစ်ပိုင်းမှာ အားကိုးရတဲ့ကစားသမားဆိုလို့ ဂျူလီယန်အယ်လ်ဗာရက်ဇ်တစ်ယောက်သာကျန်ရှိတော့တာဖြစ်ပါတယ်။ ဒီရာသီမှာ အယ်လ်ဗာရက်ဇ်ဟာ အက်သလက်တီကိုမက်ဒရစ်အတွက် အလွန်အရေးပါတဲ့တိုက်စစ်မှူးဖြစ်နေပြီး သွင်းဂိုးတွေလည်း တောက်လျှောက်ရရှိထားတာဖြစ်ပါတယ်။ 

အာဂျင်တီးနားဘောလုံးအဖွဲ့ချုပ်က တွစ်တာမှတစ်ဆင့် "တိုက်စစ်မှူး လော်တာရိုမာတီနက်ဇ်ဟာ ဘယ်ဘက်တံကောက်ကြော ကြွက်သားဒဏ်ရာကြောင့် အသင်းကနေနုတ်ထွက်ခဲ့ပါတယ်" လို့အတည်ပြုထုတ်ပြန်ထားပါတယ်။ကစားသမားတွေအလုံအလောက်မရှိပေမယ့် လက်ရှိအချိန်မှာတော့ အာဂျင်တီးနားဟာ တောင်အမေရိကဇုန်ကမ္ဘာ့ဖလားခြေစစ်ပွဲအတွက် အမှတ်ပေးဇယားကို ထိပ်ဆုံးကနေဦးဆောင်ထားနိုင်ပြီး ဒုတိယနေရာက ဥရုဂွေးကို ၅ မှတ်အထိဖြတ်တောက်ထားပါတယ်။ လာမယ့်မတ်လ ၂၁ ရက်နေ့မှာ အာဂျင်တီးနားဟာ ဥရုဂွေးနဲ့ယှဉ်ပြိုင်သွားရမှာဖြစ်ပြီး ၂၅ ရက်နေ့မှာ ဘရာဇီးနဲ့ယှဉ်ပြိုင်သွားရမှာဖြစ်လို့ စကာလိုနီရဲ့အသင်းဟာ အဓိကတိုက်စစ်ကစားသမား ၂ ဦးမပါဝင်ဘဲ ရလဒ်ကောင်းတွေကို ပုံဖော်သွားနိုင်မလား စောင့်ကြည့်ရပါမယ်။