မန်ချက်စတာယူနိုက်တက်နည်းပြ ရူဘင် အာမိုရင်က အိုးလ်ထရက်ဖို့ဒ်ကွင်းရဲ့ အောင်မြင်မှုအတွက် တောင်းဆိုမှုတွေရှိနေတာကြောင့် အသင်းဟာ ဆင်ခြေမရှိတဲ့ကလပ်တစ်ခုဖြစ်ရမယ်လို့ အခိုင်အမာပြောကြားခဲ့ပါတယ်။

အင်္ဂလိပ်ဘီလူးကြီးတွေဟာ ပေါ်တူဂီနည်းပြလက်အောက် ပထမရာသီမှာ ရုန်းကန်ခဲ့ရပြီး လက်ရှိရာသီအစမှာလည်း အခက်အခဲတွေနဲ့ စတင်ခဲ့ပေမဲ့ နောက်ပိုင်းမှာ သုံးပွဲဆက် အနိုင်ရခဲ့ပါတယ်။ ယူနိုက်တက်ဟာ နော့တင်ဟမ်ဖောရက်စ်နဲ့ တော့တင်ဟမ်တို့နဲ့ပွဲစဉ်တွေမှာ ဦးဆောင်ဂိုးရထားခဲ့ပေမဲ့ မထိန်းထားနိုင်တာကြောင့် ၂-၂ သရေရလဒ်တွေသာ ရခဲ့ပါတယ်။ 
အဲဒီနောက် တနင်္လာနေ့မှာ ၁၀ ယောက်တည်းသာကျန်တဲ့ အဲဗာတန်ကို အိမ်ကွင်းမှာ ၁-၀ နဲ့ ရှုံးနိမ့်ခဲ့ပါတယ်။

ဒီရှုံးပွဲကြောင့် အမှတ်ပေးဇယားအဆင့် ၆ နေရာမှာရှိနေတဲ့ ခရစ္စတယ်ပဲလေ့စ်ကို ရင်ဆိုင်ရမယ့် တနင်္ဂနွေနေ့ ပရီးမီးယားလိဂ်အဝေးကွင်းပွဲစဉ်မတိုင်ခင် ယူနိုက်တက်အပေါ် ဖိအားတွေ ပိုများစေခဲ့ပါတယ်။ အာမိုရင်က"ကျွန်တော်တို့အသင်းမှာ အဲဒီလိုပါပဲ။ ဘာလို့လဲဆိုတော့ ပြီးခဲ့တဲ့နှစ်ကလည်း ကျွန်တော်တို့ ပွဲတိုင်းအနိုင်ရဖို့ လိုအပ်ခဲ့ပါတယ်။ ကျွန်တော်တို့ နိုင်ပွဲမရတဲ့အတွက် ဝေဖန်မှုတွေ အများကြီးခံခဲ့ရပါတယ်။ ဒါကြောင့် ကျွန်တော်တို့မှာ ဆင်ခြေတွေမရှိပါဘူး။

ကျွန်တော် ပြီးခဲ့တဲ့နှစ်က ဥရောပပြိုင်ပွဲမှာရှိတုန်းကလည်း အတူတူပဲပြောခဲ့ပါတယ်။ ဒီနှစ် ဥရောပပြိုင်ပွဲမှာ မပါဝင်တာရဲ့ အားသာချက်နဲ့ အားနည်းချက်ကိုလည်း ပြောခဲ့ပါတယ်။ ဒါကြောင့် ဆင်ခြေတွေမရှိပါဘူး။ ပြီးခဲ့တဲ့နှစ် ဒါမှမဟုတ် ဒီနှစ်မှာ ကျွန်တော်တို့ အမြဲနိုင်ဖို့လိုပါတယ်"လို့ ပြောခဲ့ပါတယ်။ အာမိုရင်ကို မန်ယူအသင်း အဆင့် ၁၀ နေရာမှာရှိနေတာ စိတ်ပျက်မိလားလို့ မေးတဲ့အခါ သူက "ကျွန်တော် ပွဲတွေကိုကြည့်ရင် ကျွန်တော်တို့ ပိုပြီးအမှတ်ရသင့်တယ်လို့ ထင်ပါတယ်။ ဘာလို့လဲဆိုတော့ တချို့ပွဲတွေမှာ ထိန်းချုပ်ထားနိုင်ခဲ့တယ်၊ တချို့ပွဲတွေမှာ ဦးဆောင်ထားနိုင်ခဲ့တယ်၊ ဒါပေမဲ့ အဲဒီထိန်းချုပ်မှုကို ဆုံးရှုံးခဲ့ရတယ်။

ဒါကြောင့် ကျွန်တော်တို့ရဲ့ပွဲတွေကို ကြည့်ရင် ပိုပြီးအမှတ်ရသင့်ပါတယ်။ အဲဒါက တကယ့်ကို စိတ်ပျက်စရာနဲ့ အားမလိုအားမရဖြစ်စရာပါပဲ။ အထူးသဖြင့် နောက်ဆုံးပွဲပါ”လို့ ဖြေကြားခဲ့ပါတယ်။