အသက် ၃၀ နှစ်အရွယ် စပိန်ဂိုးသမား ကီပါ အာရီဇာဘာလာဂါဟာ ပြီးခဲ့တဲ့ရာသီက ဘုန်းမောက်တွင် အငှားဖြင့် သွားရောက်ကစားခဲ့ပြီး ပြိုင်ပွဲစုံတွင် ၃၅ ပွဲ ပါဝင်ခဲ့ပါတယ်။ အာဆင်နယ်ဟာ ယခင်က ရာယာရဲ့ အရန်အဖြစ် နက်တိုကို ဘုန်းမောက်မှ ခေါ်ယူခဲ့ဖူးသော်လည်း ဘရာဇီးကစားသမားက ရာသီကုန်တွင် အငှားစာချုပ်သက်တမ်းကုန်ဆုံးပြီးနောက် မိခင်ကလပ်သို့ ပြန်သွားခဲ့ပါတယ်။

ကီပါက ၂၀၂၃-၂၄ ရာသီကို ရီးရဲလ်မက်ဒရစ်တွင် ကစားခဲ့ပြီးနောက် အာဆင်နယ်က ပေါင် ၅ သန်း ပေးချေရန် သဘောတူပြီး သုံးနှစ်စာချုပ် ချုပ်ဆိုခဲ့ပါတယ်။ "ဒီရောက်ရတာ တကယ်ကို တကယ်ကို ပျော်ပါတယ်။ တကယ်ကို စိတ်လှုပ်ရှားပြီး ဖြစ်လာမယ့် အရာတွေကို မျှော်လင့်နေပါတယ်"

"ဒီကလပ်မှာ ပြသထားတဲ့ ရည်မှန်းချက်၊ နည်းပြ အာတီတာ နဲ့ ဂိုးနည်းပြ အီနာကီ ကာနာ တို့နဲ့ စကားပြောတဲ့အခါ သူတို့ အနိုင်ရချင်စိတ်ကို ဘယ်လောက် ပြသလဲဆိုတာမြင်ခဲ့ရပြီး ကျွန်တော်တို့ အနိုင်ရဖို့ အရမ်းနီးစပ်နေပြီလို့ ထင်ပါတယ် အားလုံးပေါင်းပြီး ကျွန်တော်တို့ အောင်မြင်နိုင်ပါလိမ့်မယ်" လို့ ကီပါက အာဆင်နယ်၏ ဝက်ဘ်ဆိုက်သို့ ပြောကြားခဲ့ပါတယ်။

ကီပါက ၂၀၁၈ ခုနှစ် နွေရာသီတွင် ဘီဘာအိုမှ ချဲလ်ဆီးသို့ ပေါင် ၇၁ သန်းဖြင့် ပြောင်းရွှေ့ခဲ့ရာ ကမ္ဘာ့ဈေးအကြီးဆုံး ဂိုးသမားဖြစ်လာခဲ့ပြီး ချဲလ်ဆီးနှင့်အတူ ယူရိုပါလိဂ်နှင့် ချန်ပီယံလိဂ်ဖလားများအပြင် ၂၀၂၃ ခုနှစ်ရဲ့ နေးရှင်းလိဂ်ကို စပိန်နှင့်အတူ ရရှိခဲ့ပါတယ်။ တစ်ချိန်တည်းတွင် ဒေးဗစ် ရာယာက အာရွန် ရမ်စ်ဒေးလ်ကို ကျော်ဖြတ်ပြီးနောက် ကလပ်ရဲ့ ပထမဦးစားပေး ဂိုးသမားအဖြစ် ခိုင်မာစွာ ရပ်တည်နိုင်ခဲ့ပါတယ်။

ဘရန့်ဖို့ဒ်ကြယ်ပွင့်ဟောင်းက ရွှေလက်အိတ်ဆုကို နှစ်ကြိမ်ဆက်တိုက် ရရှိထားပြီး ကီပါက သူရင်ဆိုင်ရမယ့် စိန်ခေါ်မှုကို ကောင်းစွာ နားလည်ထားသော်လည်း ရာယာကို အပြည့်အဝ ဖိအားပေးရန် အသင့်ရှိနေပါတယ်။ "သူက ဂိုးသမားကောင်းတစ်ယောက်ပါ။ ကျွန်တော်တို့ ဆက်ဆံရေး အရမ်းကောင်းပါတယ်။ ကျွန်တော်တို့ ယှဉ်ပြိုင်မယ် အတူတူ လေ့ကျင့်မယ် အတူတူ အချိန်များစွာ ဖြတ်သန်းကြပါမယ်"

"ကျွန်တော်တို့ ပြိုင်ဆိုင်မှု ရှိမယ်၊ အသင်းရဲ့ တခြားနေရာတွေလိုပါပဲ၊ ဒါပေမဲ့ တစ်ခုတည်းသော ရည်မှန်းချက်ကတော့ အနိုင်ရဖို့နဲ့ အကောင်းဆုံးဖြစ်ဖို့ပါပဲ" လို့ ကီပါက ပြောပါတယ်။ နည်းပြ အာတီတာက "ကီပါက ကျွန်တော်တို့နဲ့ ပူးပေါင်းလာလို့ တကယ်ကို ပျော်ပါတယ်။ သူက ကျွန်တော်တို့ ကောင်းကောင်းသိတဲ့ ကစားသမားပါ၊ မကြာသေးတဲ့ ရာသီတွေမှာ သူ့နဲ့ အကြိမ်ကြိမ် ရင်ဆိုင်ခဲ့ဖူးပါတယ်"

"သူက အတွေ့အကြုံများစွာ ယူဆောင်လာပေးမှာဖြစ်ပြီး သူ့အသင်းဖော်တွေအတွက် အကျိုးရှိစေမှာပါ၊ ပြီးတော့ သူက အနိုင်ရဖို့ တကယ့်ကို ဆာလောင်နေပါတယ်" "ကီပါက ကြိုးကြိုးစားစား ကစားပြီး ကျွန်တော်တို့ရဲ့ အဆင့်အတန်းတွေကို မြှင့်တင်ပေးပါလိမ့်မယ်။ သူ အဆင်ပြေသွားမယ်ဆိုတာ ကျွန်တော် သိပါတယ်။ သူ့အသင်းဖော်အချို့ကိုလည်း သူက သိပြီးသားပါ။ ကျွန်တော်တို့ သူ့ရဲ့ အနာဂတ်အတွက် တကယ်ကို စိတ်လှုပ်ရှားနေပါတယ်" လို့ ထပ်လောင်း ပြောကြားခဲ့ပါတယ်။