အင်္ဂလန်လက်ရွေးစင်အသင်းကပ္ပတိန်ဟယ်ရီကိန်းက ဘောလုံးသမားတွေဟာ သူတို့အတွက် ပွဲစဉ်ဇယားကျပ်တည်းမှုစိုးရိမ်သံတွေကို နားမထောင်ကြဘူးလို့ ပြောဆိုခဲ့ပါတယ်။ လာမယ့်နိုင်ငံတကာသီတင်းပတ်ကို ပရီးမီးယားလိဂ်ပြိုင်ပွဲပြီးဆုံးမယ့် မေ ၂၅ ရက်၊ ချန်ပီယံလိဂ်ဖိုင်နယ်ကျင်းပမယ့် မေ ၃၁ ရက်နောက်ပိုင်း ဇွန် ၂ ရက်မှ ၁၀ ရက်ကြားထားရှိဖို့ သတ်မှတ်ထားပါတယ်။

ဒါ့အပြင် ဟယ်ရီကိန်းရဲ့ဘိုင်ယန်မြူးနစ်အသင်းက ဇွန် ၁၅ ရက်မှ ဇူလိုင် ၁၃ ရက်အထိ ကျင်းပမယ့် အသွင်သစ်ကလပ်ကမ္ဘာ့ဖလားပြိုင်ပွဲကို ဝင်ရောက်ယှဉ်ပြိုင်ဖွယ်ရှိလို့ တိုက်စစ်မှူးအနေဖြင့် အခုနွေရာသီမှာ အနားယူချိန်များများစားစားရရှိဖို့ မသေချာလှပါဘူး။ ဒါပေမယ့် အသက်-၃၁ နှစ်အရွယ်ကစားသမားက ဆုဖလားအောင်မြင်မှုရှာဖွေရေးခရီးလမ်းမှာ ပွဲစဉ်တွေ တက်နိုင်သမျှ ပိုမိုကစားသွားဖို့ ရည်ရွယ်နေပါတယ်။

ဟယ်ရီကိန်းက “ ရိုးသားမှုအပြည့်နဲ့ပြောရမယ်ဆိုရင် ဒီလိုစိုးရိမ်ပေးမှုတွေကို ဘောလုံးသမားတွေ နားမထောင်ကြဘူးလို့ ထင်ပါတယ်။ ဒါပေမယ့် လူတိုင်းက ပြိုင်ပွဲတိုင်းမှာ ဆုဖလားတွေ၊ ဆုတံဆိပ်တွေ လိုချင်ကြပါတယ်။ ဘောလုံးသမားတွေကလည်း ဒီလိုလူတွေပဲဖြစ်လို့ ကိုယ့်လမ်းကြောင်းအတိုင်း ဆက်လျှောက်သွားရပါမယ်။

ဒါပေမယ့် လက်ရှိအခြေအနေကတော့ ဒီအတိုင်းပဲ ဖြစ်နေပါတယ်။ ကျွန်တော်က ဘောလုံးကစားရခြင်းကို ကြိုက်နှစ်သက်ပါတယ်။ ဒါကြောင့် ဘောလုံးကစားရခြင်းနဲ့ပတ်သက်လို့ ဘယ်တော့မှ ညည်းညူနေမှာ မဟုတ်ပါဘူး။ နည်းပြတွေ၊ မန်နေဂျာတွေ၊ ကလပ်အသင်းတွေနဲ့အတူ ပွဲကစားချိန်တွေကို ကောင်းကောင်းစီမံနိုင်မယ်ဆိုရင် အချို့အခိုက်အတန့်တွေမှာ အနားယူချိန်ပိုမိုရရှိမယ့်နည်းလမ်းတွေရှိမယ်လို့ ထင်ပါတယ်။

ဒါပေမယ့် လွယ်ကူတဲ့မေးခွန်းတစ်ခု၊ လွယ်ကူတဲ့အခြေအနေတစ်ခုတော့ မဟုတ်ပါဘူး။ နှစ်ဖက်လုံးအတွက် မျှခြေတစ်ခုတော့ ရှိလိမ့်မယ်လို့ ထင်ပါတယ်။ ဒါပေမယ့် ဘယ်လိုရလဒ်မျိုးထွက်ပေါ်လာမလဲဆိုတာပဲ စောင့်ကြည့်သွားကြတာပေါ့”လို့ ပြောပါတယ်။

ဟယ်ရီကိန်းရဲ့အခုလိုမှတ်ချက်တွေလိုပဲ လီဗာပူးဂိုးသမားအလီဆင်ဘက်ကာက လွန်ခဲ့တဲ့စက်တင်ဘာလအတွင်း ပြောကြားခဲ့ပါတယ်။ တဖက်မှာလည်း မန်စီးတီးနဲ့ ဆွစ်ဇာလန်နောက်ခံလူ၊ အသက်-၂၉ နှစ်အရွယ်ကစားသမားအကန်ဂျီက ပွဲစဉ်ဇယားတွေကြောင့် သူ့ရဲ့နောက်ထပ်မွေးနေ့အလွန်မှာပဲ ဘောလုံးလောကကို စွန့်ခွာသွားနိုင်တယ်လို့ အတိတ်မှာဖွင့်ဟပြောကြားခဲ့ဖူးပါတယ်။

ပရော်ဖက်ရှင်နယ်ဘောလုံးသမားများအဖွဲ့အစည်းကတော့ ဝန်ထုပ်ဝန်ပိုးလိုဖြစ်နေတဲ့ ပွဲစဉ်ဇယားနဲ့ပတ်သက်လို့ ပြီးခဲ့တဲ့နွေရာသီကာလအတွင်း ကမ္ဘာ့ဘောလုံးအဖွဲ့ချုပ်(ဖီဖာ)ကို တရားစွဲဆိုတဲ့ အမှုအခင်းတစ်ခုမှာ ပူးပေါင်းပါဝင်ခဲ့ပါတယ်။